غَلاطیَل 1 - کتاب مقدس به زبان لکی - گویش مرکزی1 اژ پولُس، رسولی گه نه اژ جونِم اِنسونَل ئو نه وَه‌سونگَ اِنسو، بلکِم وَه‌سونگَ عیسی مسیح ئو خداءِ باوِه‌ءَ گه عیسی مسیح اژ مِردیَل زِنیا کِردی، 2 ئو هَمیش اژ کُل بِرالی گه هانَ گَردِم، وَه کلیسائَل غَلاطیَه: 3 فیض ئو سِلامتی اژ جونِم خدا، باوَه ایمَه، ئو خداون عیسی مسیح اَر هُمَه بو 4 گه گیو ووژ اَرِه گنائَل ایمَه داتی تا مِطابق خواس خدامو ئو باوَه‌مو، ایمَه اژ ایی زمونَه شَرَبارَ آزاد بِهِه. 5 جِلال اَر او تا ابد. آمین. انجیلی‌تِر نیَ 6 بِلُجوئیمَ مای گه هُمَه اَخَ زوی اژ او گه هُمَل اِنوم فیض مسیح دَوَت کِردی گِلتوناهُاردیَ، ئو ویرِ انجیلی‌تِرَ مَچینو. 7 اَلوَت انجیلی‌تِر نیَ، مِنتائای کسَلی هَن گه پریشونتونَ مَهَن ئو میا دس بیَرن اِنوم انجیل مسیح. 8 مِنتائای جُ‌جُ اَرّ ایمَه یا فریشدِه‌ی اژ آسمو، انجیلی بِخِر اژ اَ چیئَه گه ایمَه اِلوممو کِردیَس اَرینتو موعظَه بِهِه، لیَن اَرِنی! 9 هَراَ جورَ گه وِر اژ یَه وِتمو، اِسگَه مِه اِدوارَه موشِم: اَرّ کسی انجیلی بِخِر اژ اَوَه گه قبولتو کِردیَ اَرِنتو موعظَه بِهِه، لیَن اَرِنی! 10 یانی مِه هام اَر دُم تایید اِنسو یا تایید خدا؟ یاگَه تقِلا مَهَم وَه دل اِنسو بوئم؟ اَرّ هَنی تقِلامَ مَهَرد گه وَه دل اِنسو بوئم، خُلُم مسیح نوئیم. دَفاع پولُس اژ خِلمت ووژ 11 اِ بِرال، مِم بِذانینو انجیلی گه مِه موعظَه‌م کِرد، انجیل اِنسونی‌ای نیَ، 12 اَرِیَگه مِه اَومَ اژ اِنسو نَگِرت، ئو کسی‌شی اَوَه یام ناتی؛ بلکِم عیسی مسیح اَوَه آشگار کِردی اَر مِه. 13 هُمَه تیَریف زِنِه‌ی مِنتو اَسَه گه یهودی بیم شنَفتیَ، گه چطور کلیسا خدام وَه بی‌ریَمی آزارَ ما ئو اَومَ مَرِمون‌اِر. 14 ئو اِ یهودی‌گری مام اَر قِ فِرَه کسَل اِنوم قومِم گه هُم‌دام بین، ئو اَرِه اَنجوم دائِن رسمِ‌رِسیمَل اَژدادِم خیرَت بی‌حدِحساومی داشد. 15 مِنتائای وخدی او جُ‌جُ وِر اژ یَگه مِه بامَ دی جیاما کِردی ئو وَه‌سونگَ فیض ووژ دَوَتِم کِردی، رضائتَ یَه بیتی 16 گه کُر ووژ اَر مِه ظاهر بِهِه تاگَه اِنوم خِرِیهودیَل اِلوم کَمی، مِه هِرازِه وَه‌گَرد جسم ئو خوین شورِم نَهَرد، 17 ئو نَچم اَرِه اورشلیم‌یش، اَر تک اونَلی گه وِر اژ مِه رسول بین؛ بلکِم چِم اَرِه وِلات عِرَب ئو اِدوارَه گِلماهُارد اَرِه دمشق. 18 اَسَه دُما سه سال، چِم اَرِه اورشلیم تاگَه پطرس بوئینِم، ئو پُنزَه روژ مَنِمی اَرتَک. 19 مِنتائای، بِخِر اژ یعقوب، بِرا خداون عیسی، هُیچ رسولمی نِئی. 20 اَرتَک خدا اطمینونتونَ میَم بی گه اَ چیئَه گه اَرِنتونَ مَنُیسِنِم دِرو نیَ. 21 دُما اَوَه، چِم اَرِه هیالَل سوریَه ئو کیلیکیَه. 22 اِ اَ زمونَ کلیسائَل یهودیَه گه هان اِنوم مسیح، هَنی مِنو وَه شیوَه نِمَشتاسیا. 23 اونَ فَخَد مَشتَفتو گه، موئِتو، «اَ پیاءَ گه قدیم آزارمونَ ماتی، اِسگَه دیری هَراَ ایمونی موعظَه مِهِه گه وِرِکار تقِلا مَهَردی نابود کِیتی.» 24 ئو اونَ وَه خاطر مِه خدائو جِلالَ ما. |
@ 2024 Korpu Company