اَفِسُسیَل 6 - کتاب مقدس به زبان لکی - گویش مرکزیآیلَل ئو داباوَه 1 اِاِ آیلَل، اژ داباوَه ووژتو اِنوم خداون فِربو بیَرِن، اَرِیَگه کار دُریس هَر یَسَ. 2 «عزّت بِن اَر باوَه ئو دات»، گه یَه اول حکمی کَ گه وَدَه خدا هاتیَ گَرد: 3 «تا عاقویَتِت خِر بو ئو اَر زَمی عمِر فِرِه‌ی بِهِین.» 4 اِاِ باوَه‌ل، آیلَل ووژتو عصبونی نَهَن، بلکِم اونَل وَه تیَلیم ئو تربیت خداون کَلِنگ بِهَن. خُلُمَل ئو اَرباوَل 5 اِاِ خُلُمَل، وَه عزّت ئو ترسِم‌لرزِم، ئو اژ تیَه دلا، اژ اَرباوَل زمینیتو فِربو بیَرِن، هَرهُنَ گه مَری اژ مسیح فِربونَ میَرینو. 6 ئو یوئیشَ نه فَخَد وخدی گه هاینونِ وَر چیَمَلو، اِجور کسَلی گه هانَ دُم یَگه وَه دل اِنسونَل بوئن، بلکِم اِجور خُلُمَل مسیح گه خواس خدا وَه دل ئو گیونَ مارِن‌َ جا. 7 وَه نیّت خو خِلمت بِهَن، هَرهُنَ گه مَری خِلمت اژ خداونَ مِهِینو نه اِنسو، 8 اَرِیَگه مَذانینو هر کی هر کار خوئی بِهِه، اژ خداونَ مَسینِتیا، چه خُلُم بو، چه آزاد. 9 اِاِ اَرباوَل، وَه‌گَرد خُلُمَلتو هَرهُنَ رفدار بِهَن، ئو اژ سیَم‌سی کِردِن اَرینو دس هیزدَن، اَرِیَگه مَذانینو اَوَه گه هم اَرباو اُوُنَ ئو هم هُمَه، ها آسمون‌اِر ئو او اَژی وِلِ‌بی‌جهتَ اژ کسی جونِمداری نِمِهِه. اسلحَه کامل خدا 10 خلاصَه، اِنوم خداون ئو اِ قویَتی گه اژ قدِرت اوءَ مای، زوردار بوئن. 11 اسلحَه کامل خدا بِهَنِ وَرتو تا بتونینو بوسینون اَر نوا فن‌ِفیتَل ابلیس. 12 اَرِیَگه ایمَه وَه‌گَرد جسم ئو خوین زورو نِمَگِریم، بلکِم ایمَه اَرضد حکِمرونَل، اَرضد رِئیسَل، اَرضد قدِرتَلی گه اَر دنیا تیَریکی حکِمرونیَ مَهَن، اَرضد قدِرتَل روحانی شر اِ جائَل آسمونی، جنگَ مِهِیم. 13 اِسَه اسلحَه کامل خدا بِهَنِ وَرتو، تا اِ روژ شر بتونینو طاخَت بارینو، ئو بتونینو دُما اَنجوم دائِن کُل چی، بوسینون اَرسر پا. 14 اِسَه بوسِن، هُنَ گه قِ‌وَن حخیختتو بسدیَس اَر قِ ئو زِری صالح‌بیئینتو کِردیَسِ وَر، 15 ئو کِلاش آمادَه بیئِن اَرِه اِلوم کِردِن انجیل سِلامتیتو کِردیَسِ پا. 16 اِ کُل حالِ‌روژی، سپَر ایمو هیزدَن، تا بتونینو وَه اَوَه، کُل تیرَل آگِر اَ شریرَ کورا کِینو. 17 کِلاوخور نجاد بِنِنِ سرتو ئو شِمشیر روح گه کلوم خداءَ، بِگِرِنِ دس. 18 ئو اِ کُل زمونی، وَه کُلِ جور دوعا ئو لالکَ‌حُاس، اِنوم روح خدا دوعا بِهَن ئو اَرِه یَه وَه‌خَوَر ئو هوشیار بوئن، ئو یِسَر ئو وَه پایاری اَرِه کُل ایمودارَل مسیح دوعا بِهَن. 19 اَرِه مِن‌یش دوعا بِهَن، تا هَر یَگه دَمِم اَرِه قصَه کِردِن وازَ مَهَم، قدِرت کلوم بَشخیا بوءَ بینِم تا راز انجیل وَه جورَت اِلوم بِهَم، 20 هَراَ انجیلی گه سفیر اَوِمَ، وَه‌یاآگه هامِ بَن‌اِر! دوعا بِهَن گه وَه جورَت اِلوم بِهَمی، هَرهُنَ گه باس بوشِم. آخِرسر 21 اَرِیَگه اژ حال مِه باخَوَرا بوئینو ئو بِذانینو چَه مَهَم، تیخیکوس، بِرا عزیزِم ئو خادم وفادار اِنوم خداون، کُل چیَ موشیَ بینتو. 22 مِه هَراَ ایی خاطرَ کِلَ‌مَهَمی اَرِه تَکتو تا اژ حال ایمَه باخَوَرا بوئینو ئو تشویقتو کِ. 23 اژ جونِم خداءِ باوَه ئو عیسی مسیح خداون، سِلامتی ئو مِحبتی گه وَه‌گَرد ایمونَ اَر بِرال بو. 24 فیض اَر کُل کسَلی گه خداون ایمَه عیسی مسیح وَه مِحبتی گه اژ بِن نِمَچو، دوس دیرِن. |
@ 2024 Korpu Company