اَفِسُسیَل 5 - کتاب مقدس به زبان لکی - گویش مرکزیاِنوم مِحبت رفدار بِهَن 1 اِسَه اِجور آیلَل عزیزگرامی، اژ خدا سرمقشا بِگِرِن. 2 ئو اِنوم مِحبت رفدار بِهَن، هَرهُنَ گه مسیح‌یش مِحبت کِردی اَر ایمَه ئو گیو ووژ اِجور قُرونی ئو پیشکَشی عطِرداری اَرِه ایمَه تقدیم خدا کِردی. 3 مِنتائای اِنوم هُمَه اژ بی‌عصمتی یا هر جور ناپاکی یا شَوَت‌پِرَسی جُ‌جُ نَباس قصه‌ی بو، اَرِیَگه ایی چیئِلَ لائق ایمودارَل مسیح نیَ. 4 قصَه‌ل گَن ئو چِنَه‌مِفت ئو تیتالیَل گَن اِنومتو ناو گه دُریس نیَ؛ اِجالی باس شگِر خدا بِهِینو. 5 اَرِیَگه زقینتو داشدوئی گه هُیچ آم بی‌عصمت یا ناپاک یا شَوَت‌پِرَس گه هَراَ بِت‌پِرَسیَسَ، اِنوم پاتِشائی مسیح ئو خدا بیَری نِری. 6 نِیلِن کسی وَه قصَه‌ل پیک فَنتو دِ، اَرِیَگه وَه خاطر هَرایی چیئِلَسَ گه خَضو خدا مَرِشی اَرسر آیلَل کورفِربونی‌اِرا. 7 اِسَه شیَریکیَ گَردو نَهَن. 8 اَرِیَگه هُمَه زمونی تیَریکی بینو، مِنتائای اِسگَه اِنوم خداون نُیرینو. اِسَه اِجور آیلَل نُیر رفدار بِهَن. 9 اَرِیَگه ثمر نُیر، اِ هر خوئی ئو صالح‌بیئین ئو دُریسی، ماوَ دی. 10 تقِلا بِهَن تا بِفیَمینو اَ چیئَه گه وَه دل خداونَ چیَ. 11 اِ کارَل بی‌ثمر تیَریکی هُم‌بیَر نوئن، بلکِم اونِلَ آشگارا کَن. 12 اَرِیَگه جُ‌جُ اَر زوئو آوِردِن چیئَلی گه اُوُ وَه بی‌کِشکی اَنجومَ میَن، باعث خجالتَ. 13 مِنتائای وخدی چیئی بِکُوءِ وَر نُیر، آشگارا ماو. 14 اَرِیَگه هر چیئی گه آشگارا ماو نُیرَ. اَژونَسَ موشی: «اِ کسی گه هاینِ خاواِر، بوءَ خَوَر، اژ مِردیَل هیزگِر، ئو مسیح مَدَرشخی اَرینِت.» 15 اِسَه، خو حُواستو بو گه چطور رفدارَ مِهِینو، رفداری نه اِجور نایونَل بلکِم اِجور دونائَل. 16 قدِر ایی وخدَ بِذانِن، اَرِیَگه ایی روژِلَ، روژَل گَنی کِن. 17 اِسَه نایو نوئن، بلکِم بِذانِن گه خواس خداون چیَ. 18 مَس شِراو نوئن، اَرِیَگه شِراو مَکیشیتو ویرِ کارَل گَن؛ بلکِم پِرا بوئن اژ روحِ خدا. 19 وَه مزامیر، سروءَل ئو بِیتَلی گه اژ روح خداءَ وَه‌گَرد یَک گپ بیَن ئو اژ تیَه دلا اَرِه خداون بِژَنِن ئو بحیوَنِن. 20 یِمِجو وَه نُم خداونمو عیسی مسیح اَرِه کُل چی شگِر خداءِ باوَه بِهَن. ژِنَل ئو میردَه‌ل 21 وَه خاطر قُرپی گه مسیح اَر تَکتو دیری، فِربوبَر یَکتِری بوئن. 22 اِاِ ژِنَل، فِربوبَر میردَه‌لتو بوئن، هَراَ جورَ گه فِربوبَر خداونینو. 23 اَرِیَگه میردَه سر ژِنَ، هَرهُنَ گه مسیح‌یش سر کلیساءَ، گه لارَسی، ئو او ووژ نجاددهندَه اَوَه‌‌سَ. 24 اِسَه هَرهُنَ گه کلیسا فِربوبَر مسیحَ، ژِنَل‌یش باس اِ کُل چی فِربوبَر میردَه‌لو بوئن. 25 اِاِ میردَه‌ل، ژِنَلتو دوس داشدوئی، هَرهُنَ گه مسیح کلیسا دوس داشدی ئو گیو ووژ کِردَ خِر، 26 تا کلیسا تقدیس بِهِه ئو وَه آو کلوم خدا پاکا کِیتی، 27 ئو کلیسا اِ اَ جِلال ئو رنگینیَ گه دیری باری اَرِه تک ووژ بی‌هُیچ لکَه ئو لوچی ئو هُنَ چیئَلی، تا کلیسا مقدّس ئو بی‌عِو بو. 28 هَرهُنَ، میردَه‌ل باس ژِنَلو اِجور لار ووژو دوس داشدوئی. اَوَه گه ژَن ووژ دوس دیری، ووژ دوس دیری. 29 اَرِیَگه هرگِس کسی اژ لار ووژ بیزار نیَ، بلکِم خوراکَ مِیتیَ بی ئو مِتیَه‌جیَ ماوتی، هَرهُنَ گه مسیح مِتیَه‌جی کلیساءَ؛ 30 اَرِیَگه ایمَه عضا لار اوئیم. 31 «اَژونَسَ گه پیا، اژ باوَه ئو دا ووژ جیاآ ماو، ئو مَچسبیَ قِ ژَن ووژا، ئو اَ دوءَ موئنَ یِه لار.» 32 حخیخت کَلِنگی ها نوم ایی رازَ - گه مِنَ موشِم هَشارَه مِهِه اَر مسیح ئو کلیسا. 33 خلاصَه هرکُم اژ هُمِه‌یش باس ژَنتو اِجور ووژتو دوس داشدوئی، ئو ژَن‌یش باس حُواس بوتی گه عزّت بِنی اَر میردِه‌ی. |
@ 2024 Korpu Company