اَفِسُسیَل 4 - کتاب مقدس به زبان لکی - گویش مرکزییَکیبیئین اِنوم لار مسیح 1 اِسَه مِه گه وَه خاطر خداون زندونیِم، خواهشد اَژینتونَ مَهَم گه لائق دَوَتی گه اَژینتو بیَ، رفدار بِهَن، 2 اِ تاواضی کامل ئو مِلائمت، وَه صبِر ئو اِنوم مِحبت یَکتِری تیَمِل بِهَن. 3 تقِلا بِهَن تا وَه یاری رَسَن صُئل‌وصفا اَ یَک‌بیئینی گه اژ روحِ خداءَ حفظ کِینو. 4 هَرهُنَ گه یِه لار ئو یِه روح هَس، خدایش گه دَوَت اَژینتو گِرتیَسی، یِه امید داسیَ بینتو؛ 5 یِه خداون، یِه ایمو، یِه تیَمید؛ 6 ئو یِه خدا ئو باوَه آسمونی کُل گه ها بِلِنگ کُل، ئو اِنوم کُل کارَ مِهِه ئو ها اِنوم کُل. 7 مِنتائای وَه هرکُم اَژینمو، مِطابق بشخِش مسیح، فیض بَشخیاءَ. 8 اَژونَسَ اِنوم کِتاو زبورَ موشی: «وخدی گه ویرِ عرشِ برین چیِ بِلِنگ، لشکری اژ اسیرَل وَه‌گَرد ووژ بِردی ئو پیشکَشیَل داءَ اِنسونَل.» 9 مصقود اژ ’چیِ بِلِنگ‘ چیَ، بِخِر اژ یَگه او وَه جائَل هُارتِر زمین‌یش هاتوئیَ هُار؟ 10 اَوَه گه هاتَ هُار، هَر اَوَه‌‌سَ گه ویرِ رُ چیِ بِلِنگ کُل آسمونَل، تاگَه کُل چی پِرا کِ. 11 ئو اَوَه‌‌سَ گه رسولَل بَشخیتی، نبوّت‌کَرَل، بشارت‌کَرَل، شوئونَل ئو مَلِمَل، 12 تا ایمودارَل اَرِه کار خِلمت آمادَه بِهَن، اَرِه بِنا لار مسیح، 13 تا وخدی گه کُل ایمَه اِنوم ایمو بوئیمونَ یَکی ئو درکمون اژ کُر خدا یَکی بو تاگَه هُنَ چَن آم کاملی رشد بِهِیم ئو برَسیمَ چَن پِری دائول مسیح. 14 تا دیَر اِجور آیلَل نوئیمو تا وَه موجَل ویرِ هر لای هُوَ بیریم ئو وا تیَلیمَل جوراجور ایمَه بیَری ویرِ ایلا ئو اَلا ئو فن آمَلی بیریم گه اَرِه اژ رئی اِرآوِردِن نشقَه مَکیشِن. 15 بلکِم وَه وِتِن حخیخت اِنوم مِحبت، ایمَه باس اِ کُل چی اِنوم او گه سِرَ، یانی مسیح، رشد بِهِیم. 16 او سِرآو رشد کُل لارَ، لاری گه وَه‌سونگَ کُل مَفصِلَل ووژ، وَه یَکتِری پِوَنَ میری ئو مَنِری اَر قِ یَکا ئو وَه خاطر کار هر عضو رشدَ مِهِه ئو ووژ اِنوم مِحبت بِناءَ مِهِه. زِنِه‌ی نوو 17 اِسَه یَه موشِم ئو اِنوم خداون شاتیَ میَم گه رفدارتو دیَر نَباس اِجور خِرِیهودیَل بو گه اِنوم فگِرَل باطل ووژو رفدارَ مَهَن. 18 عَخِلو کور بیَ، ئو وَه خاطر نایونی‌ای گه اژ سخددلیو ها نومون‌اِر، اژ ژییاین خدا دویرا کَتِنَ. 19 اونَل سنگدلا بینَ ئو ووژو داونَسَ دس هُواوهوسا، هانَ هَلگَ‌هَلگ اَرِه اَنجوم دائِن هر جور ناپاکی. 20 مِنتائای هُمَه مسیحتو هُنَ نَگِرتا، 21 فرضَ مَنِم اَر یَگه اِبارَه اوتو شنَفتیَ ئو مِطابق اَ حخیختَ گه اِنوم عیسی هَس، اِنوم او تیَلیمتو گِرت. 22 تا طُرُخ زِنِه‌ی قدیم ووژتو، یانی اَ اِنسو قدیمَ گه وَه خاطر هُواوهوس گنا گَنیائی، اِ وَرتو بِکَنینو. 23 باس اِنوم روحِ خدا فگِرَلتو تازه‌آ بو، 24 ئو اِنسونی تازَه بِهِینونِ وَر، گه اِ صالحبیئِن ئو قدوسیّت حخیخی، اِجور خدا خَلک بیَ. 25 اِسَه، دِرو وِتِن بِنِنِ لا، هَر کُم اَژینتو وَه‌گَرد هُمسای وَه راسی قصَه بِهِه، اَرِیَگه ایمَه کُل، عضا یَکتِریئیمو. 26 «عصبونی بوئن، مِنتائای گنا نَهَن»؛ نِیلِن خِضتو بِکیشیِ ایوارَه. 27 مِجال نیَنَ ابلیس. 28 دُز دیَر دُزی نِهِه، بلکِم کار بِهِه، ئو وَه دَسَل ووژ وَه آوِری‌داری کار بِهِه، تاگَه بتونی چیئی بیَ ژارَل. 29 دَمتو وَه قصَه‌ل گَن واز نَهَن، بلکِم قصَه‌لتو اَرِه بِنا آمَلی‌تِر وَه کار بای تا هَوَجَه یَکی بِگِری، ئو فیض برَسِنیَ کسَلی گه مَشتوئِن. 30 روحِ قدوس خدا گه وَه او اَرِه روژ نجاد میر بینونَ، خَمین نَهَن. 31 هر جور تیَلی، خَضو ئو خِض، قارَه، بُختِم ئو هر جور گَنی هِستِن اژ ووژتو دویرا کَن. 32 وَه‌گَرد یَک مِرِبو بوئن ئو دلسوز یَکتِری بوئن ئو یَکتِری بوئَشخِن، هَرهُنَ گه خدا هُمَل اِنوم مسیح بَشخیتی. |
@ 2024 Korpu Company