اَفِسُسیَل 3 - کتاب مقدس به زبان لکی - گویش مرکزیراز انجیل آشگارا بی 1 اَژونَسَ مِه، پولُس، گه وَه خاطر هُمَه خِرِیهودیَل اَرِه مسیحْ عیسی زندونیِم، - 2 حکماً اِبارَه نظارت فیض خدا گه اَرِه خِلمت اَر هُمَه بَشخیاسَ مِه، شنَفتِتونَ. 3 هَرهُنَ گه کم تا کُتی نُیسونِم، گه چطور ایی رازَ وَه مِکاشفَه آشگارا بی اَر مِه. 4 ئو وخدی یَه بحیوَنینو مَتونینو درک مِه اژ راز مسیح بِفیَمینو، 5 ایی رازَ هَراَ جورَ گه اِسگَه وَه‌سونگَ روحِ خدا اَر رسولَل مقدّس او ئو پِخَمَرَلی آشگارا بیَ، اَر کُرَل اِنسو اِ نسِلَلی‌تِر آشگارا نوئیَ. 6 اَ رازَ یَسَ گه خِرِیهودیَل‌یش اِنوم مسیح ئو وَه‌سونگَ انجیل، هُم‌میراتِن ئو عضا یِه لارِن ئو اِ وَدَه او هُم‌بیَرِن. 7 مِه مِطابق عطاءِ فیض خدا بیمَسَ خادم ایی انجیلَ گه یَه وَه‌سونگَ قدِرت او گه کارَ مِهِه، بَشخیاسَ بینِم. 8 وَه‌یاآگه اژ کُل ایمودارَل مسیح کمتِرِم، مِنتائای ایی فیضَ بَشخیاءَ بینِم تا گنجَل مسیح گه حدِحساو نِری، اِلوم بِهَم اَر خِرِیهودیَل، 9 ئو اَرِه کُل کس باوژمِ در گه نشقَه رازی گه اِ دورَه‌ل قدیم اَر تک خدای گه کُل چی خَلک کِردی پنهو مَنوئی، چَه بی. 10 تا وَه‌سونگَ کلیسا اِسگَه حکمت جوراجور خدا آشگارا بو اَر حکِمرونَل ئو قدِرتَل اِ جائَل آسمونی، 11 یَه مِطابق اَ قَص ازلی خدا بی گه او اِنوم خداون ایمَه مسیحْ عیسی وَه اَنجوم رَسونی. 12 ایمَه اِنوم مسیح وَه‌سونگَ ایمونی گه اَر او دیریم، مَتونیم وَه جورَت ئو وَه اطمینو نزیک بوئیم اَر خدا. 13 اِسَه خواهشد اَژینتونَ مَهَم وَه خاطر جُورَلی گه اَرِه هُمَه مَکیشِم، دلسردا نوئن، اَرِیَگه اونَل باعث افتخارتونِن. دوعا اَرِه ایمودارَل شیَر اَفِسُس 14 هَر وَه ایی خاطرَ اِ بِرُوَر اَ باوِه زُنیَ میَم گه 15 هر خانوادَه اِنوم آسمو ئو اَر رُی زَمی، نُم ووژ اژ اوءَ مَگِری، 16 گه مِطابق دولَمَنی جِلال ووژ بوئَشخیَ بینتو تاگَه وَه‌سونگَ روح خدا اِ دَرین ووژتو وَه قویَت زوردار بوئینو، 17 تاگَه مسیح وَه‌سونگَ ایمو لیز بِگِری اِنوم دلَلتو، ئو اِنوم مِحبت ریشیا بِینو ئو پایارا بوئینو، 18 تا قویَتتو داشدوئی گه وَه‌گَرد کُل ایمودارَل، دِریژی ئو پیَنی ئو قویلی ئو بِلِنگی مِحبت مسیح بفیَمینو 19 ئو مِحبت مسیح گه بِلِنگ‌تِر اژ درک ئو فیَم بشرَ، بشتاسینو- تا اژ پِری کامل خدا پِرا بوئینو. 20 اِسگَه جِلال اَر خدای گه مَتونی وَه‌سونگَ اَ قدِرتَ گه اِنوم ایمَه کارَ مِهِه، فِرَه ویشتِر اژ اَ چیئَه گه ایمَه بِمو یا فگِر کِیمی، اَنجوم بِ. 21 اِنوم کلیسا ئو اِنوم مسیحْ عیسی، ئو اِنوم تموم نسِلَل، تا ابد، جِلال اَر خدا بو! آمین. |
@ 2024 Korpu Company