اَفِسُسیَل 2 - کتاب مقدس به زبان لکی - گویش مرکزیوَه فیض ئو وَه‌سونگَ ایمو 1 ئو هُمَه اِنوم خطائَل ئو گنائَل ووژتو مِردوئینو، 2 ئو زمونی اِنوم اونَل زِنِه‌یتونَ مَهَرد، اَسَه گه مَچیاینونِ تُرّ ریئَل ایی دنیا ئو رِئیس قدِرت هُوا، ابلیس، یانی هَراَ روحی گه اِسگِه‌یشَ اِنوم آیلَل کورفِربونی کارَ مِهِه. 3 ایمِه‌یش کُل، زمونی اِنوم یوئنَ اِنوم هُواوهوس جسمو زِنِه‌یمونَ مَهَرد، ئو چیئَلی گه لار ئو فگِرمونَ مِهِستی انجوممونَ ما؛ ئو اِجور کسَلی‌تِر، مِطابق طبیعتمو مَکوم بیمون اَر آیلَل خَضو. 4 مِنتائای خدای گه اِ ریَمَت دولَمَنَ، وَه خاطر مِحبت بی‌حدِحساوی گه اَر ایمَه دیری، 5 جُ‌جُ وخدی اِنوم خطائَلمو مِردوئیمو، وَه‌گَرد مسیح زِنیا کِردیمی -اِسَه، وَه‌سونگَ فیض نجادتو گِرتیَ؛ 6 ئو خدا وَه‌گَرد مسیح زِنیا کِردیمی ئو وَه‌گَرد مسیحْ عیسی نیشونی اَر جائَل آسمونی، 7 تاگَه اِ اَ زمونَلی گه میا بان، دولَمَنی بی‌حدِحساو فیض ووژ اِنوم مسیحْ عیسی، اِ مِرِبونی اَر ایمَه، نِشو بِ. 8 اَرِیَگه وَه فیض ئو وَه‌سونگَ ایمو نجادتو گِرتیَ -ئو یَه اژ ووژتو نیَ، بلکِم عطا خداءَ- 9 ئو نه ثمر کارَل، تاگَه هُیچ‌کس نتونی وَه ووژ بنازی. 10 اَرِیَگه ایمَه کار دس خدائیم، ئو اِنوم مسیحْ عیسی اَرِه کارَل خو خَلک بیمونَ، گه خدا وِرِکار تیارِک دیتی تا اِنوم اونَ زِنِه‌ی بِهِیم. یَکی‌بیئین اِنوم مسیح 11 اِسَه اَویرتو بو اونَلی گه ووژونَ ’ختینَه‌کَریا‘ مَذِناسد، هُمِه‌ئو گه زمونی اِ جسم خِرِیهودیَل وَه حساوَ ماهاتینو ’ختینَه‌نکَریا‘ هِناءَ مَهَرد -وَه‌یاآگه ختینَه اونَل کار جسمونی‌ای کَ گه وَه دس اِنسو اَنجومَ ماو- 12 بارِنَ ویر گه اِ اَ زمونَ، اژ مسیح جیا بینو، ئو جُزم قوم اسرائیل وَه حساو نِماهاتینو ئو وَه‌گَرد عَتَل وَدَه بیگونَه بینو، ئو ناامید ئو بی‌خدا اِنوم ایی دنیاءَ زِنِه‌یتونَ مَهَرد. 13 مِنتائای اِسگَه اِنوم مسیحْ عیسی، هُمَه گه زمونی دویر بینو، وَه‌سونگَ خوین مسیح نزیکا بینونَ. 14 اَرِیَگه مسیح ووژ صُئل ئو سِلامتی ایمِئَه، گه ایمَه هَردِک یانی یهود ئو خِرِیهود کِردیَسیَ یَکی ئو اِنوم لار ووژ تیخَه جیایی گه باعث دشمنی بی رِمونیِ، 15 او رسمِ‌رِسیمی گه اِ حکمَل شریعت بی، بی‌اتبار کِردی، تاگَه اِنوم ووژ اِجال دو، یِه اِنسو تازَه خَلک بِهِه، تا باعث صُئل ئو سِلامتی بو. 16 ئو ایمَه هَردِک اِنوم یِه لار وَه‌گَرد خدا دوسی دِ، وَه‌سونگَ صلیب گه اَر رُی اَوَه دشمنی کُشتی. 17 او هات ئو خَوَر خَوش صُئل اِلوم کِردی اَر هُمَه گه دویر بینو ئو اَر اونَلی گه نزیک بین، 18 اَرِیَگه وَه‌سونگَ او هَردِکَ مَتونیم اِنوم یِه روح بایم اَرِه تک باوَه آسمونی. 19 اِسَه هُمَه دیَر نه بیگونَه ئو نه اَژنَوی، بلکِم هُم‌خاک ایمودارَل مسیح ئو اژ هوز خدائینو؛ 20 ئو اَر رُی بِناوِه‌ی گه رسولَل ئو پِخَمَرَلو ناءَ بِنا بینونَ، گه مسیحْ عیسی ووژ، بَرد بِنچین اَوَه‌‌سَ. 21 اِنوم او کُل ایی ساخدِمونَ مَنِریَ قِ یَکا ئو ماوَ معبد مقدّسی اِنوم خداون. 22 ئو اِنوم او هُمِه‌یش وَه‌گَرد یَک بِنا موئینو تا بوئینونَ مالی گه خدا وَه‌سونگَ روحِ ووژ لیز گِرتیَسی اِنوم. |
@ 2024 Korpu Company