اَفِسُسیَل 1 - کتاب مقدس به زبان لکی - گویش مرکزی1 اژ پولُس گه وَه خواس خدا رسول مسیحْ عیسیَ، وَه ایمودارَلی گه هانِ شیَر اَفِسُس‌اِر، وَه اونَ گه اِنوم مسیحْ عیسی وفادارِن: 2 فیض ئو سِلامتی اژ جونِم خدا، باوَه‌مو، ئو خداون عیسی مسیح، اَر هُمَه بو. بِرَکتَل روحانی اِنوم مسیح 3 بِمارِک بو خدا ئو باوَه خداونمو عیسی مسیح، گه ایمَه اِنوم مسیح وَه هر بِرَکت روحانی اِ جائَل آسمونی بِرَکت داسی. 4 اَرِیَگه وِر اژ یَگه بِنیا دنیا باوِنی، ایمَه اِنوم مسیح اِنتخاو کِردی تا اَر تک ووژ مقدّس ئو بی‌عِو بوئیم. ئو اِنوم مِحبت، 5 او مِطابق مصقود خواس ووژ، وِرِکار ایمَه اَرِه آویل‌اقراری ووژ مَیِّن کِردی تا وَه‌سونگَ عیسی مسیح اِ مقوم کُرَل خدا بوئیمو؛ 6 تا هُنَ فیض پِرجِلال او شگِر بو، فیضی گه اِنوم اَ عزیزگرامی ووژَ ایمَه بِرَکت داتی. 7 اِنوم مسیح، ایمَه وَه خیمت خوین او آزاد بیمونَ، گه یَه هَراَ بشخِش گنائِلَ گه مِطابق دولَمَنی فیض ووژ، 8 وَه‌گَرد حکمت ئو فیَم کامل، چَل‌چَل بَشخیتیَ ایمَه. 9 خدا وَه ایی کارَ راز قَص ووژ شناسونی اَر ایمَه، ئو هُنَ گه ووژ صِلا دیتی اِنوم مسیح آشگارا کِردی 10 نشقَه خدا یَه بیَ گه وخدی موقَع مَیِّن برَسی، کُل چی، چه اِنوم آسمو چه اَر رُی زَمی، اِنوم یَکی یانی مسیح، گِردا کِ. 11 ایمَه اِنوم او بیمونَسَ وارثَل. هُنَ گه خدا کُل چیئَل مِطابق خواس ووژ اَنجومَ مِ، ایمِه‌یش مِطابق مصقود او وِر اژ یَه اِنتخاو بیمونَ. 12 تا ایمَه گه اول کسَلی بیمو گه امیدمو بَسدَ مسیح، باعث شگِر کِردِن جِلال او بوئیم. 13 هُمِه‌یش وخدی گه کلوم حخیختتو شنَفت، یانی هَراَ خَوَر خَوش نجادتونَ؛ ئو ایمونتو آوِرد اَر او، اِنوم او وَه روح‌القدسی گه وَدَه هاوِنتیَ میر بینو، 14 روح‌القدسی گه بِعونَه میرات ایمِئَه تا زمونی گه تمومِ‌کمال بِهِیمیَ هِن ووژمو، تاگَه جِلال او شگِر بو. شگِر کِردِن ئو دوعا 15 اَژونَسَ مِن‌یش وخدی اِبارَه ایمونتون اَر عیسی خداون ئو مِحبتتون اَر کُل ایمودارَل مسیحِم شنَفتیَ، 16 اژ شگِر کِردِن اَرِه هُمَه آنموسِم، بلکِم یِمِجو اِ دوعائَل ووژمَ مارِمتون‌ِ ویر، 17 تاگَه خداءِ خداونمو عیسی مسیح، اَ باوَه پِرجِلالَ، روحِ حکمت ئو مِکاشفَه بوئَشخیَ بینتو تاگَه او بشتاسینو. 18 تا چیَم دلتو روشِه بو، تاگَه امیدی گه خدا دَوَتتو کِردیَسیَ بی، بشتاسینو ئو اَ میرات بی‌حدِحساو ئو پِرجِلال خدا اِنوم ایمودارَل مسیحَ، بِفیَمینو. 19 ئو اژ قدِرت بی‌حدِحساو او اَر ایمَه گه ایمو دیریم باخَوَر بوئینو. ایی قویَتَ اژ قدِرت بی‌حدِحساو خدا گه دیری کارَ مِهِه، مای. 20 گه اَوَه اِنوم مسیح بِردیِ کار، زمونی گه او اژ مِردیَل زِنیا کِردی ئو اَر جائَل آسمونی، نیشونی اَر دس راس ووژ، 21 بِلِنگ‌تِر اژ هر ریاست ئو قدِرت ئو قویَت ئو حکومت، ئو بِلِنگ‌تِر اژ هر نُمی گه نه فَخَد اِ ایی زمونَه بلکِم اِنوم زمونی گه میا بای هِنا ماو. 22 ئو خدا کُل چی نا اِژیر پال مسیح، ئو مَیِّن کِردی گه اَرِه کلیسا سر کُل چی بو، 23 کلیسای گه لارَسی، یانی پِری او گه کُل چی اَر کُل جا پِرا مِهِه. |
@ 2024 Korpu Company