کولُسیَل 3 - کتاب مقدس به زبان لکی - گویش مرکزی

اِنسو نوو بِهَنِ وَرتو

¹ اِسَه اَرّ وَه‌گَرد مسیح اژ مِردیَل زِنیا بینونَ، اِ دُم چیئَلیا بوئن گه هانِ بِلِنگ، جای گه مسیح نیشتیَس اَر دس راس خدا.

² وَه چیئَلی گه هانِ بِلِنگ فگِر بِهَن، نه وَه چیئَلی گه هان اَررُی زَمی.

³ اَرِیَگه هُمَه مِردینو ئو زِنِه‌ی هُمَه اِسگَه وَه‌گَرد مسیح اِنوم خدا پنهونَ.

⁴ وخدی مسیح گه زِنِه‌ی هُمِئَه ظاهر بو، اَسَه هُمِه‌یش وَه‌گَرد او اِنوم جِلال ظاهرَ موئینو.

⁵ اِسَه هر چیئی گه اِنوم هُمَه زمینیَ بِکُشِن، یانی بی‌عصمتی، ناپاکی، شَوَت، چیئَل گَن هِستِن، طَما گه هَر بِت‌پِرَسیَ.

⁶ وَه خاطر یوئنَسَ گه خَضو خدا ماءَ سر آیلَل کورفِربونی.

⁷ هُمِه‌یش زمونی اِنوم یوئنَ رفدارتونَ مَهَرد، اَسگَه گه اِنوم اونَل زِنِه‌یتونَ مَهَرد.

⁸ مِنتائای اِسگَه باس کُل یوئنَ اژ ووژتو دویرا کِینو، یانی خِض، خَضو، گَن هِستِن اَرِه یَکتِری، بُختِم ئو قصَه‌ل گَنی گه اژ دَمتون‌ اِرَمای.

⁹ دِرو نوشِنَ یَکتِری، اَرِیَگه اَ اِنسو قدیمَ وَه‌گَرد کارَلیا اِوَر ووژتو کَنیَ.

¹⁰ ئو اِنسو نووتو کِردیَسِ وَر، گه دیری اِنوم میَرفت حخیخی تازه‌آ ماو تا بو اِجور خالق ووژ.

¹¹ ئو اِنوم ایی اِنسو نووءَ، دیَر یونانی ئو یهودی، ختینَه‌کَریا ئو نَکَریا، بَربَر، سَکایی، خُلُم ئو آزاد میَنا نِری، بلکِم مسیح کُل چیَ ئو ها اِنوم کُل.

¹² اِسَه اِجور کسَلی گه خدا دیاری کِردِنِ ئو مقدّس ئو عزیزگرامیِن، دلسوزی، مِرِبونی، تاواضی، مِلائمت ئو صبِر بِهَنِ وَر.

¹³ یَکتِری تیَمِل کَن ئو اَرّ کسی اَرضد کسی‌تِر شکائَت دیری، یَکتِری بوئَشخِن. هَرهُنَ گه خداون هُمَه بَشخیتی، هُمِه‌یش باس یَکتِری بوئَشخینو.

¹⁴ ئو اَر رُی یوئنَ کُل، مِحبت بِهَنِ وَر گه کُل چی اِ اتحاد کامل مَنیَ قِ یَکا.

¹⁵ صُئل مسیح حکِمرون دلَلتو بو گه هَر اِراسی اَرِه یَه دَوَت بینو‌نَسَ یِه لار، ئو شگِرگزار بوئن.

¹⁶ کلوم مسیح وَه دولَمَنیا لیز بِگِری اِنوم هُمَه، وَه تموم حکمت یَکتِری تیَلیم ئو پَن بیَن، اَرِه خدا سروءَل، مزامیر ئو بِیتَلی گه اژ روحِ خداءَ وَه شگِر کِردِن اِ دلَلتو، بحیوَنِن.

¹⁷ ئو هرچی مِهِینو، اِ قصَه کِردِن یا کردار، کُل چی وَه نُم خداون عیسی اَنجوم دَن، ئو وَه‌سونگَ او شگِر خداءِ باوَه بِهَن.

قانونَل اَرِه خانوادَه‌ل مسیحی

¹⁸ اِاِ ژِنَل، فِربوبَر میردَه‌لتو بوئن، هُنَ گه اِنوم خداون لائقَ.

¹⁹ اِاِ میردَه‌ل، ژِنَل ووژتو دوس داشدوئی ئو خِض نَهَن اَرِنو.

²⁰ اِاِ آیلَل، اِ کُل چی فِربوبَر داباوَه‌تو بوئن، اَرِیَگه یَه وَه دل خداونَ.

²¹ اِاِ باوَه‌ل، آیلَلتو نارِن اَر سر خِض، تاناخواد دلسرد بوئن.

²² اِاِ خُلُمَل، اِ کُل چی فِربوبَر اَرباوَل زمینیتو بوئن، نه فَخَد وخدی گه هاینونِ وَر چیَمَلو اِجور کسَلی گه هانَ دُم یَگه وَه دل اِنسونَل بوئن، بلکِم اژ دل ئو وَه رُی‌راسی ئو ترس اژ خداون.

²³ هر کاری مِهِینو اژ تیَه دلا بِهَن، هُنَ گه هَماری اَرِه خداونَ مِهِینو نه اَرِه اِنسو،

²⁴ اَرِیَگه مَذانینو اَجِرتو میراتی کَ گه اژ خداون مَرَسی بینتو، هُمَه خِلمتَ مِهِینون اژ خداون مسیح.

²⁵ اَرِیَگه خطاکار سزا خطای گه کِردیِ موئینی، دوچیَمکی‌ای نیَ.