کولُسیَل 2 - کتاب مقدس به زبان لکی - گویش مرکزی

¹ اَرِیَگه مِم بِذانینو چَنی اَرِه هُمَه ئو اَرِه کسَلی گه هانِ لائودیکیَه ئو اَرِه کُل اونَلی گه مِنو اِ ویراَرویر نِئیَ، تقِلاءَ مَهَم.

² تاگَه دلگرم بوئن، اِنوم مِحبت بوئنَ یَکی ئو اژ پِری بی‌حدِحساو اطمینو کاملی گه اژ فیَمَ ماءَ دس بیَردارا بوئن ئو هُنَ راز خدا گه مسیحَ، بفیَمِن.

³ هَراَ مسیحَ گه کُل گنجَل حکمت ئو شناخت خدا اِنوم او پنهونَ.

⁴ مِه یَه موشِم تا هُیچ‌کس وَه دلیلَلی گه مَتونی قانیتو بِهِه، فَنتو نِ.

⁵ اَرِیَگه وَه‌یاآگه جسماً اَر تَکتو نیِم، مِنتائای اِ روح هامَ گَردتو، ئو خَوشالیَ مَهَم گه نظم خو ئو سفدِسخدی ایمونتون اَر مسیحَ موئینِم.

زِنِه‌ی اِنوم مسیح

⁶ اِسَه هَرهُنَ گه مسیحْ عیسی خداونتو قبول کِرد، اِنوم او زِنِه‌ی بِهَن.

⁷ اِنوم او ریشیا بیَن ئو بِنا بوئن، ئو هَرهُنَ گه گِرتِتونَسا اِنوم ایمون اَر او پایار بِمینِن، پِرا بوئن اژ شگِر کِردِن.

⁸ حُواستو بو کسی وَه فلسفَه ئو رِنگَری پُیچ، اسیرتو نِهِه، گه نه مِطابق مسیح، بلکِم مِطابق رسمِ‌رِسیم بشری ئو مِطابق اصول ایی دنیاسَ.

⁹ اَرِیَگه کُل پِری ذات الهی وَه طور جسمونی‌ای لیز گِرتیَس اِنوم مسیح.

¹⁰ ئو هُمَه اِنوم مسیح پِرا بینونَ، گه سر کُل حکِمرونیَل ئو قدرتِلَ.

¹¹ ئو اِنوم او هُمَه ختینِه‌یش بینونَ، ختینِه‌ی گه وَه دس نوئیَ، بلکِم وَه اِوَر کَنِن لار جسمونی، وَه‌سونگَ ختینَه مسیح اَنجوم گِرتیَ.

¹² اِ خُسِل تیَمید، وَه‌گَرد او چال بینونَ، گه اِنوم اَوَه وَه‌سونگَ ایمون اَر کار پِرقویَت‌ خدای گه مسیح اژ مِردیَل زِنیا کِردی، وَه‌گَرد او اژ مِردیَل زِنیا بینو.

¹³ ئو خدا هُمَه گه اِ گنائَل ئو جسم ختینَه‌نکَریاتو مِردوئینو، وَه‌گَرد مسیح زِنیا کِردی. او کُل گنائَل ایمَه بَشخیتی

¹⁴ ئو اَ سند قَرتی گه وَه قانونَلی اَرضد ایمَه بی باطل کِردی، ئو اژ نومجا هیزدا میخکو کِردی اَر صلیب.

¹⁵ او اسلحَه اژ حکِمرونَل ئو قدِرتَل گِرتی، ئو وَه فائق هاتن اَر اونَل اِنوم ووژ گه اَررُی صلیب بی، اِوَر چیَم کُل رُسبائو کِردی.

¹⁶ اِسَه نِیلِن کسی اِبارَه اَ چیئَه گه میرینون ئو خُرَّ مِینو، یا اِبارَه عِد ئو مُنگ نوو ئو روژ شَمَه مقدّس اَرِنتو قضاوت کِ.

¹⁷ یوئنَ یِه سای اژ چیئَلی کِن گه میا بای، مِنتائای اصِل اونَل ها نوم مسیح‌اِر.

¹⁸ نِیلِن کسی گه مَجُرّی اَر یَگه باس لار خوار بو ئو فریشدَه‌ل عَبادت بوئن، محرومتو کِ. هُنَ کسی میا ووژَ رویائَل ووژ مشغول بِهِه ئو بی‌یَگه دلیلی داشدوئیتی وَه فگِرَل اِلَکی ووژ، قُراتا ماو.

¹⁹ هُنَ کسی دیَر نچسبیَسَ سرا، اَ سِرَ گه کُل لار اژ اَوَه گیونَ مَگِری ئو وَه گُشبَن ئو گیسَه مَنِریَ قِ یَکا، ئو هَراَ جورَ گه خدا مِیتی رشدَ مِهِه.

²⁰ اَرّ وَه‌گَرد مسیح وَه اصول ایی دنیاءَ مِردینونَ، اَرِه‌چَه اِجور کسَلی گه هَماری هَنی هِن ایی دنیانَ، مچینون‌ِ گِرد حکمَل اَوَه، حکمَلی گه موشی:

²¹ «دس نَن، طُم نِهَه، دس نَنتی اَر قِ!»؟

²² یوئنَ کُل چیئَلی کِن گه هَریَگه استفادَه موئن، نابودَ موئن -مِطابق حکمَل ئو تیَلیمَل بشری.

²³ وَه‌یاآگه یوئنَ وخدی اژ ایی دینی گه ووژو ساخدونَ، سزا دائِن اَر لار ئو سخد گِرتِن اَر لار، قصَه مَهَن، ظاهرو عاقلونه‌ءَ، مِنتائای اَرِیَگه نوا هُواوهوس جسم بِگِرِن، هُیچ اِ دَسون اِرنِمای.