کولُسیَل 1 - کتاب مقدس به زبان لکی - گویش مرکزی1 اژ پولُس گه وَه خواس خدا، رسول مسیحْ عیسیَ، ئو اژ بِرامو، تیموتائوس، 2 وَه ایمودارَل مسیح ئو بِرال وفادار اِنوم مسیح گه هانِ شیَر کولُسی‌اِر: فیض ئو سِلامتی اژ جونِم خدا، باوَه آسمونی ایمَه، اَر هُمَه بو. شگِر کِردِن ئو دوعا 3 وخدی ایمَه اَرِه هُمَه دوعا مِهِیم، هَر شگِر خدا، باوَه خداونمو عیسی مسیحَ مِهِیم. 4 اَرِیَگه اژ ایمونتون اَر مسیحْ عیسی ئو مِحبتی گه اَر ایمودارَل دیرینو، شنَفتِمونَ. 5 گه یوئنَ اژ امیدی گه اِ آسمو اَرِه هُمِه‌ئو هُیشتیَ مای، گه وِرِکار اِنوم کلوم حخیخت یانی انجیلتو شنَفتیَ، 6 انجیلی گه رَسیَسَ بینتو هَرهُنَ گه اِ سِرُسَر دنیا ثمرَ مِ ئو رشدَ مِهِه، هَرهُنِ‌یشَ اژ روژی گه هُمَه اَوتونَ شنَفت ئو فیض خداتون اِنوم حخیخت فیَمی، اِنوم هُمِه‌یش کار کِردیِ. 7 هُمَه اَوتون اژ هُمکار عزیزمو، اِپافْراس گِرتا. او خادم وفادار مسیح اِجال هُمِئَه. 8 او ایمَه اژ مِحبتی گه هُمَه اِنوم روحِ خدا دیرینو خَوَردارا کِردی. 9 وَه ایی خاطرَ، اژ روژی گه یَمونَ شنَفت، دَسمون اژ دوعا کِردِن اَرِنتو نکیشیَ، بلکِم یِمِجو اژ خدامونَ مِ گه پِر بوئینون اژ شناخت خواس او، اِ هر حکمت ئو فیَم روحانی، 10 تا رفدارتو لائق خداون بو، اِ هر لِحاظ خَوشالا کِینونی، ئو اِ هر کار خوئی ثمر بارینو ئو اِ شناخت خدا رشد کِینو 11 ئو وَه تموم قویَتی گه اژ قدِرت پر جِلال اوءَ، قدِرت بِگِرینو تا وَه خَوشالی، صبِر ئو تیَمِل کاملتو داشدوئی؛ 12 تا شگِر باوَه آسمونی بِهِینو گه هُمَه کِردیَسیَ لائق شیَریکی اِ میراتی گه ایمودارَل مسیح، اِنوم نُیر دیرِن. 13 اَرِیَگه قدِرت تیَریکی اژ ایمَه آوشدیَسِ لا ئو جاوازمو کِردیَسیَ پاتِشائی کُر عزیزگرامی ووژ، 14 گه ایمَه اِنوم او آزادی دیریم یانی بشخِش گنائَلمو. مسیح کی بی 15 او رُی خدای کَ گه نِماو بوئینینی، اول‌زا نواتِر ئو سرتِر اژ کُل خلقت. 16 اَرِیَگه کُل چی وَه‌سونگَ او خَلک بی: اَ چیئَه گه ها آسمون‌اِر ئو اَ چیئَه گه ها رُی زَمی، چیئَلی گه ماو بوئینیو ئو چیئَلی گه نِماو بوئینیو، تختَل ئو حکِمرونیَل، ریاستَل ئو قدِرتَل، کُل وَه‌سونگَ او ئو اَرِه او خَلک بین. 17 او وِر اژ کُل چی بیَسی، ئو کُل چی اِنوم او چِفتَ ماوَ قِ یَکا. 18 او سر لار یانی سر کلیساءَ ئو بِنیاءَ، اول‌زا اژ مِردیِلَ، تاگَه اِ کُل چی، او سر بو. 19 اَرِیَگه تموم پِری خدا کِفَ مَهَردی گه لیز بِگِری اِنوم او. 20 ئو وَه‌سونگَ او، کُل چی، چه اَر زَمی چه اِ آسمو، دوسی بیَ گَرد ووژ، وَه‌سونگَ صُئلی گه وَه خوین ووژ اَر رُی صلیب، آوِردی. 21 هُمِه‌یش زمونی وَه‌گَرد خدا بیگونَه ئو اِ فگِرتو دشمن بینونی، ئو یَه اِنوم شَرَباریتو دیارَ موئیا. 22 اِسگَه مسیح وَه‌سونگَ مرگ ووژ اِنوم لار جسمونی ووژ، هُمَه دوسی داسی، تا مقدّس ئو بی‌عِو ئو بی‌هُیچ خِضی باریتون اَرِه تک خدا، 23 اَرّ هُمَه سفدِسخد ئو پایار بِمینینون اَرسر ایمونتو ئو اژ امید انجیلی گه شنَفتِتونَ تَکو نیرینو، هَراَ انجیلی گه اِنوم تموم خلقت ژیر آسمو اِلوم بیَ، ئو مِه، پولُس، بیمَسَ خادم اَوَه. خِلمت پولُس اژ کلیسا 24 اِسگَه اژ جُورَلی گه وَه خاطر هُمَه‌م کیشیَ خَوشالِم ئو وَه خاطر لار او گه کلیساءَ، اَ چیئَه گه اِ جُورَل مسیح کمَ، اِنوم جسم ووژِم پِرا مَهَم. 25 مِه مِطابق اَ خِلمت نظارتی گه خدا اَرِه هُمَه سپارتیَ بینِم، بیمَ خادم کلیسا، تا کلوم خدا کامل وَه اَنجوم برَسِنِم، 26 یانی اَ سِرّی گه اِ زمونَل ئو نسِلَل پنهو مَنوئی، مِنتائای اِسگَه آشگارا بیَس اَر ایمودارَل او. 27 خدا هُنَ هِستی تا اَرِنو آشگارا بِهِه گه ایی سِرَّ چه جِلال بی‌حدِحساوی اِنوم خِرِیهودیَل دیری، ایی سِرَّ یَسَ گه مسیح، گه امید جِلالَ، ها اِنوم هُمَه. 28 ایمَه مسیح اِلومَ مِهِیم، ئو هُشتارَ مِیمَ کُل کس، ئو وَه تموم حکمت تیَلیمَ مِیمَ کُل کس، تاگَه اِنوم مسیح کُل کس بالغ باریم اَرِه تک خدا. 29 اَژونَسَ مِه جُورَ مَکیشِم ئو وَه‌سونگَ او گه وَه قدِرت اِنوم مِه کارَ مِهِه، وَه تموم قویَتِم تقِلاءَ مَهَم. |
@ 2024 Korpu Company