کارَل رسولَل 28 - کتاب مقدس به زبان لکی - گویش مرکزیجزیرَه مالت 1 وخدی وَه سِلامت رَسیمون اَر حشگی، فیَمیمو اَ جزیرَه مالت نُمَسی. 2 کسَلی گه اِنوم جزیرَه زِنِه‌یونَ مَهَرد فِرَه مِحبتونَ مَهَردَ ایمَه. وَه‌چوینا گه وارونَ ماواریا ئو هاوا سرد بی، آگِرونی اَرِه ایمَه اِرکِرد ئو ایمِه‌ئونَ گرمیا هُیشتِ گِرد. 3 پولُس قِری هیزِم جیَم داتی ئو حِنی گه مَنیاتی اَررُی آگِر، اِ زور تاو آگِر، ماری هاتَ دِریر ئو چسبیتی اَر قِ دَسا. 4 مردِم اَ جزیرَه، وخدی دییو گه مار اژ دس دُ‌رِّرا بیتی، وِتونَ یَکتِری: «چِرچی نیَ گه ایی پیا خوینی‌ای کَ گه وَه‌یاآگه اژ دریا نجاد گِرتیَ مِنتائای عدالت نِمِیلی زِنی بِمینی.» 5 مِنتائای پولُس مارِهَه آوشدی اِنوم آگِر ئو هُیچ ضِرَدی‌ئون نَرَسیتی. 6 اونَل چیَمَ‌رئی بین لار بِپِنَمِتی یاگَه وَه یِگِل بِکُوءِ ئو بِمِری. مِنتائای دُما قِیلی، وخدی دییو گه هُیچ ضِرَدی‌ئون نَرَسیتی، عخیدِه‌ئون اِرگیردو ئو وِتو او خدای کَ. 7 اَر اَ هِناسَ زمینَلی بی گه هِن رِئیس جزیرَه بین گه نُم پوبلیوس بیتی. او مِکیس کِردیمی اِرَه مال ووژ ئو سه روژ وَه رُی خَوشا هُن‌هاوونی کِردیمی. 8 تُمَرز، باوَه پوبلیوس مریض بی ئو کَتوئیِ توجا ئو تُو ئو بَلَه‌ریقَه داشدی. پولُس چِتی اِرَه تک ئو دوعا کِردی ئو دس نا اَر قِ ئو شِفا داتی. 9 دُما ایی گپَ، مریضَلی گه اِنوم اَ جزیرَه بین هاتِن ئو شِفائو گِرت. 10 اونَل فِرَه عزّتونَ مَنیا اَر ایمَه، ئو حِنی گه مِهِستمو وَه کَشتیا بِچیم، هر چی گه اِکَلمو بی اَرِنمو تیارِکو دی. پولُسَ مَرَسی روم 11 دُما سه مُنگ، وَه کَشتی‌ای گه زِمِسو مَنوئی اِنوم جزیرَه، کَتیمِ رئی چیمون اِنوم دریا. اَ کَشتیَ هِن اسکندریَه بی ئو نشونَه جوزا داشدی. 12 رَسیمون اَر شیَر سیراکوز ئو لنگَرمو آوشد ئو سه روژ مَنیم اَر اورَه. 13 اژ اورَه دورمو دا ئو رَسیمون اَر شیَر ریگیون. وَه‌صوایکا وا جنوبی هیزگِرتی ئو وَه دوصوایکا رَسیمونَ شیَر پوتیولی. 14 اَر اورَه چَن بِرامو کِردَ دی گه مِکیس ایمَه‌ئو کِرد یِه هفتَه‌مونَ گَرد سر کِردِن. آخِرسر رَسیمون اَر روم 15 ئو بِرال اورَه وخدی گه شنَفتوئیو هایمونَ رئیا، تاگَه بازار آپیوس ئو آبادی ’سه میخونَه‘ هاتِنِ نوامو. پولُس وخدی اونَل دیتی شگِر خدا کِردی ئو دل قُرصا بیتی. 16 وخدی گه رَسیمون اَر روم، صِلائو داءَ پولُس گه وَه‌گَرد سروازی گه قِلااوری کِیتی، بِمینی اِنوم مال ووژ. پولُس اِنوم روم 17 دُما سه روژ، پولُس کَلِنگَل یهود دَنگ کِردی. وخدی جیَم بین، وِتی‌ئونو: «اِاِ بِرال، وَه‌یاآگه مِه کارمی اَرضد قوم ووژِم یاگَه اَرضد رسمِ‌رِسیم باوَه‌لمو نَهَردوئی، مِنون اِ شیَر اورشلیم گِرت ئو دائونَ دس رومیَلا. 18 اونَل اژ مِه بازخواسو کِرد ئو مِهِستو وِلِم کَن اَرِیَگه جرمونی اِنوم مِه نَهَردَ دی گه سزا مِردِن بوتی. 19 مِنتائای وخدی یهودیَل بی‌دلیو کِرد، اژ ناحِلاجی دییونِم بِرد اَرِه امپراطور روم، اَلوَت شکائَتمی اَرضد قوم ووژِم ناآشد. 20 اِسَه وَه ایی خاطرَ هِستِم هُمَه بوئینِم ئو قصَه‌تونَ گَرد بِهَم اَرِیَگه وَه خاطر امید قوم اسرائیلَ گه وَه ایی زنجیرَ بوئنیامَسا.» 21 اونَل وِتون‌ئون: «ایمَه هُیچ نُامَه‌مونی اژ هیال یهودیَه اِبارَه تو نَگِرتیَ، ئو هُیچ کُم اژ بِرالی گه اژ اورَه هاتِنَ، خَوَر یاگَه لاپِرت گَنونی اِبارَه تو ناوِردیَ. 22 مِنتائای دوس دیریم عخیدَه‌لِت بشتوئیم، اَرِیَگه مَذانیم گه مردِم، اِ کُل جا اَرضد ایی فرقَه قصَه مَهَن.» 23 اَسَه روژونی اَرِه او مَیِّن کِرد ئو فِرَه کسَل هاتِنی اِرَه مال اَرِه تکی. او اژ شفق تاگَه شو گپ اَرِه دانی ئو شاتی داتی اَر پاتِشائی خدا ئو تقِلا کِردی اژ تورات موسی ئو نُسَخ پِخَمَرَل، اونَل اِبارَه عیسی قانی کِ. 24 بِری وَه قصَه‌ل او قانی بین مِنتائای بِری‌تِر ایمونو ناوِرد. 25 اِسَه هَرهُنَ گه دَمَرَگئونَ گَرد یَکَ مَهَرد، اژ اورَه چِن. مِنتائای وِر اژ یَگه اژ اورَه بِچِن، پولُس قصَه آخِر ووژ کِردی ئو وِتی: «روح‌القدس چَنی خوءَ گَرد باوَه‌ل هُمَه قصَه کِردی، اَسَه گه وَه‌سونگَ اِشعیا پِخَمَر وِتی: 26 «”بِچُ اِرَه تک ایی قومَ ئو بوش، ’اِراسی وَه گوش ووژتونَ مَشتوئینو، مِنتائای هرگِس نِمَفیَمینو؛ اِراسی وَه چیَم ووژتونَ موئینینو، مِنتائای هرگِس درک نِمِهِینو.‘ 27 اَرِیَگه دل ایی قومَ بیَسَ بَرد، گوشَلو سنگینا بیَ، ئو چیَمَل ووژونا بَسدیَ، ناخواد وَه چیَمَلونا بوئینِن، ئو وَه گوشَلونا بشتوئِن، ئو اِنوم دل ووژونا بفیَمِن ئو گِلابیرِنِ دُما ئو مِه شِفائو دَم.“ 28 «اِسَه بِذانِن گه نجاد خدا کِل‌بیَس اَرِه خِرِیهودیَل ئو اونَل گوشَ مَگِرِن!» 29 [وخدی یَه وِتی، یهودیَل هَرهُنَ گه سخد دَمَرَگَئونَ گَرد یَکَ مَهَرد، اژ اورَه چِن.] 30 پولُس دو سال تموم اِنوم مالی گه کِرا کِردوئیتی زِنِه‌ی کِردی ئو هر کی گه ماهاتی اِرَه تک مِئیشتِ گِرد. 31 او پاتِشائی خدا اِلومَ مَهَردی ئو وَه جورَت بی‌یَگه کس نوا بِگِرتی اِبارَه عیسی مسیح خداون تیَلیمَ ماتی. |
@ 2024 Korpu Company