کارَل رسولَل 27 - کتاب مقدس به زبان لکی - گویش مرکزیپولُس اژ رئی دریا مَچو اِرَه روم 1 وخدی بِنا بی گه وَه دریااِرا بِچیم اِرَه ایتالیا، پولُس ئو چَن زندونی‌تِرو، داءَ دس افسر یولیوس نُمیکا، گه اژ گردان امپراطور روم بی. 2 اَسَه سُوار کشتی‌‌ایکا بیمو گه اِ شیَر اَدرامیتینوس بی ئو داشدی مَچیا اِرَه بندرَل هیال آسیا ئو کَتیمونِ رئی. آریستارخوسِ مقدونی، اژ مردِم تِسالونیکی‌‌یشَ گَردمو بی. 3 وَه صوایکا رَسیمون اَر بندر صِیدون، ئو یولیوس لِفط کِردی اَر پولُس ئو صِلا داتی تاگَه اَرِه کَل‌حاجت گِرتِن بِچو اِرَه تک رِقیفَلی. 4 اَر اورَه وَه کَشتیا کَتیمونِ رئی ئو وَه‌چوینا گه وا برعسک ایمَه‌آ ماهات، وَه پِنَه آوَل قپرس‌اِرا رد بیمو. 5 ئو وخدی اژ رئی دریا اژ آوَل کلیکیَه ئو پامفیلیَه رد بیمو، اَر بندر میرا گه ها وِلات لیکیه‌اِر هاتیمونَ هُار. 6 اَر اورَه افسر رومیِهَه کَشتی اسکندریَه آدیتی گه مَچیا اِرَه ایتالیا ئو ایمَل سُوار اَوَه کِردی. 7 روژَل فِرِه وَه یاواشا چیمونِ نوا ئو هِرَ سخدی رَسیمونَ بندر کْنیدوس. وَه‌چوینا وا برعسک ایمَه‌آ ماهات ئو نِمِیشتی بِچیمِ نواتِر، وَه پِنَه آوَل کْرِت رد بیمو، تاگَه هِناس شیَر سالمونی چیمونِ وَر. 8 هِرَ سخدی اژ کَش اَوا رد بیمو ئو رَسیمونَ جای گه نُم ’بندرَل خاص‘ بیتی گه اَر هِناس شیَر لاسائیَه بی. 9 زَمو فِرِه اژ کیسمون اِرچوئی ئو اِ ایی موقَع سال‌یشَ سفر دریایی خطر داشدی، جُ‌جُ زَمو روژی گِرتِن‌یش گُذشتوئی. اِسَه پولُس هُشتار دانی‌ئون ئو وِتی: 10 «اِاِ آقال، مِنَ مَتونِم بوئینِم گه اَژیرِ دُما سفر خطرناکی ها نوامون‌اِر ئو ضِرَد فِرِه مَرَسی اَر نه فَخَد کَشتی ئو بارِهِه بلکِم اَر گیون‌یشمو.» 11 مِنتائای افسر رومی وَه قصَه‌ل ناخدا ئو صائای کَشتی ویشتِر هَمیَتَ ماتی تاگَه وَه قصَه‌ل پولُس. 12 وَه‌چوینا گه اَ بندرَ اَرِه زِمِسو مَنِن خو نوئی، ویشتِرو قَصو کِرد گه اَر اورَه بِکُوئِنِ رئی تاگَه هر جوری بیَ ووژو برَسِنِنَ بندر فینیکس ئو زِمِسو بِمینِن اَر اورَه. ایی بندرَ اِنوم جزیرَه کْرِت بی ئو هم ویر اَر جنوبِ غربی بیتی ئو هم اَر شمال غربی. رُحِیل دریا 13 وخدی وا مِلومی اژ جنوب یِهات گُمونو کِرد وَه اَ چیئَه گه دلونَ مِهِستی رَسینَ؛ اِسَه لنگرو کیشی ئو اژ ساحل کْرِت کَتِنِ رئی. 14 مِنتائای چیئی اَژی نَچِتی گه وا تُنی، گه موئِتون‌ئون وا شمالِ شرقی، اژ حشگی هات ویرِ ایمَه. 15 وخدی کَشتی گرفدار رُحِیل بی، ئو نتونستی برعسک وا بِچوءِ نوا؛ ایمَه ووژمو دامونَ دس واآ ئو وا ایمَه موئردی. 16 وَه پِنَه جزیرَه گُجَریکا گه نُم کُودا بیتی چیمونِ نوا ئو هِرَ سخدی تونِستمو اختیار قائِق نجاد بِگِریمِ دس. 17 اَسَه هَریَگه مَلاوِنَل قائِقو کیشی اَررُی عرشَه کَشتی، وَه قَرص، سفدِسخد بَسدونَ دور کَشتیا تاگَه نَشکی ئو اَرِیَگه زِلَئونَ مَچیا گه ناخواد کَشتی اِنوم هُسکو سیرتیس بنیشی اَر هَری، لنگرو دُرّاِرا کِردَ هُار ئو کَشتیِهَه وِل بیَ دس واآ. 18 رُحِیل هُنَ وَه زَوَردا ماوِنت اَرینمو گه وَه صوایکا اونَل بِنیائو نا بارَل کَشتیو آوشد اِنوم دریا. 19 روژ سِئِم وَه دس ووژو چیئَلی گه هِن کَشتی بینو آوشد اِنوم دریا. 20 روژَل هِرَهُنَ مَگُذریان ئو ایمَه رنگ هویَر ئو آسارَه‌لمونَ چیَم نِموئینیا ئو رُحِیل صا نِمَهَردی، هُنَ گه کُل، دیَر هُیچ امیدمونی اَر نجاد ناآشد. 21 اَرِیَگه مِدت فِرِه بی‌خوراک مَنوئین، پولُس هوسیا اِنومو، وِتی: «آقال، هُمَه باس قصَه‌ل مِنتو گوشَ ما ئو اژ جزیرَه کْرِت نِمَهَردتونَ دِریر تاگَه اَخِنکَ لَدمَه ئو ضِرَدتون‌ئون نِمَرَسیا. 22 اِسگِه‌یشَ مَلالکِم‌ئونتو گه دلِ‌دَرینتو داشدوئی، اَرِیَگه ضِرَدی نِمَرَسیَ گیو هُیچ‌کُمتو؛ فَخَد کَشتی اژ کیستون اِرَمای. 23 اَرِیَگه دَشو فریشدَه اَ خدای گه مِه هِن اوئِم ئو خِلمت اَژینَ مَهَمی، هوسیا اَرتَکِم 24 ئو وِتی: ”پولُس، زِلَت نَچو. تو باس بوسین اَر حضور امپراطور روم، ئو اِسگِه‌یشَ، خدا گیو کُل هُمسفرَلِت بَشخیَسیَ تو.“ 25 اِسَه اِاِ پیال، دلِ‌دَرینتو داشدوئی، اَرِیَگه ایمون اَر خدا دیرِم گه هَراَ جورَ گه وِتیَسی‌ئونِم، ماو. 26 مِنتائای کَشتی ایمَه باس اِنوم جزیره‌ی بنیشیِ هَری.» کَشتی اژ یَکَ مَچویچی 27 شو چواردَهِم مُنگ، وا حالامی اِنوم دریا آدریاتیک ایمَه موئردیَ ایلا ئو اَلا، گه نزیک اَر نِصمِ شو، مَلاوِنَل کَشتی گُمونو کِرد دیرِن نزیکا موئن اَر حشگی. 28 اِسَه اَخت قویلی آوُ گِرت ئو فیَمین گه چِل مترَ. گِری‌تِر اِدوارَه اَختو گِرت ئو دییو سی مترَ. 29 ئو اَرِیَگه زِلَئونَ مَچیا باوِنیم اَر بَردَل، چوار لنگرو اژ دُما کَشتی آوشدَ هُار، ئو دوعائونَ مَهَرد زویتِر روژا بو. 30 مَلاوِنَل کَشتی اَرِیَگه مِهِستو اژ کَشتی بِحوان، وَه ایی دَسپیچَ گه میا چَن لنگر اژ وَر کَشتی باوژِن اِنوم دریا، قائِق نجادو آوشد اِنوم دریا. 31 پولُس وِتیَ افسرِهَه ئو سَروازَل: «اَرّ ایی پیالَ نوسِن اِنوم کَشتی، نِمَتونینو نجاد بِگِرینو.» 32 اَسَه سَروازَل قَرصَل قائِق نجادو بِری ئو هُیشتو قائِق بِچو. 33 کمی وِر اژ یَگه هویَر بِ، پولُس لالکیَ کُلو گه چیئی بیرِن. وِتی: «ایمِرو چواردَه روژَ گه چیَمَ‌رئی بینونَ ئو چیتونی نَهُاردیَ، بی‌خوراک مَنینونَ. 34 اِسَه خواهشدتون اَژینَ مَهَم چیئی بیرِن اَرِیَگه قویَتتونَ مِئون. اَرِیَگه موی‌‌‌ای اژ سر هُیچ کُمتو کَما نِماو.» 35 وخدی یَه وِتی نونی گِرتی ئو اَر وَر کُلو شگِر خدا کِردی ئو نونِهَه کُت کِردی ئو بِنیا ناتی اَر هُاردِن. 36 اِسَه کُل دلگرما بین ئو خوراکو هُارد. 37 کُلمون اِنوم کَشتی، دوهیس ئو هفتاد ئو شَش نفر بیمو. 38 وخدی سیرا بین باقی گَنِم ئو جو رِشون اِنوم دریا ئو کَشتیو سُئِکا کِرد. 39 وخدی چیَم روژ تِرَکی، حُشگیو نشتاسی، مِنتائای خلیجونی دی گه ساحل هُسکوئی داشدی. اَسَه مِهِستو گه اَرّ بو کَشتیِهَه بِرَسِنِن اَر اورَه. 40 قَرص لنگرَلو بِری ئو اونَلو وِل کِرد اِنوم دریا ئو قَرصَلی گه فرمون کَشتیو گِرتوئیو واز کِرد. اَسَه بادبون وَر کَشتیو اِ لا واآ کیشیِ رُ ئو ویرِ حشگی مِل رئیو گِرت، چِن. 41 مِنتائای کَشتی هاوِنت اَر یَکی اژ بَرزیَل ژیر آو ئو چُکیا اِ هَری. وَر کَشتی دَکو نَهُاردی ئو حُشگ ئو راق مَن مِنتائای دُما کَشتی اَخِنکَ تافَل هاوِنتوئینی اَرنوم گه اژ یَک چویچیا. 42 سَروازَل هاتِن زندونیَل بِکُشِن تاناخواد کسی مَلَه بِهِه ئو بِحوای. 43 مِنتائای افسر رومی گه مِهِستی گیو پولُس نجاد دِ، نوا گِرتِنی ئو فِربو داتی اول‌بار کسَلی گه مَتونِن مَلَه بِهَن ووژو باوژِن اِنوم دریا ئو برَسِنَ حشگی. 44 باقی‌ش اَرسر تختَه‌چوئَل کَشتی، ووژو بِرَسِنِن. اُهُنَ کُل وَه سِلامت رَسین اَر حشگی. |
@ 2024 Korpu Company