کارَل رسولَل 26 - کتاب مقدس به زبان لکی - گویش مرکزی1 آگْریپاس وِتیَ پولُس: «صِلا دیرین گه اژ ووژِت دَفاع کِین.» اَسَه پولُس دس ووژ دِریژاِرا کِردی ئو هُنَ اژ ووژ دَفاع کِردی: 2 «اِاِ آگْریپاسِ پاتِشا، اَرِه مِه سعادتَ گه ایمِروژ هام اَرتَک هُمَه تاگَه اِبارَه کُل شکائَتَل یهودیَل اژ ووژِم دَفاع بِهَم. 3 مصقوصاً اَرِیَگه مَذانِم هُمَه اژ کُل رسمِ‌رِسیم یهود ئو اختلافَلی گه ها نومون‌اِر خَوَر دیرینو. اِسَه، مَلالکِم‌ئونتو تاگَه وَه حوصلَه گوش بِگِرینونَ قصَه‌لِم. 4 «یهودیَل کُل، زِنِه‌ی مِن اژ اول جِهالیمَ مَذانِن، هِر اژ اَ اولا گه اِنوم قوم ووژِم ئو اِنوم اورشلیم زِنِه‌یمَ مَهَرد. 5 اونَل هِر اژ قدیم مِنَ مَشتاسِن ئو اَرّ بِئو مَتونِن شاتی بیَن گه مِه مِطابق سخدگیرتِرین فرقَه دینمو، اِجور یِه فَریسی زِنِه‌یمَ مَهَرد. 6 ئو ایمِرو اَر ایرَه مِحاکمَه موئم، وَه خاطر امید اَر اَ وَدِه‌ی گه خدا داسیَ باوَه‌لمو. 7 یَه هَراَ وَدَه‌‌سَ گه دوازَه طائفَه‌مو اژ تیَه دلا، شو ئو روژ وَه ایی امیدَ گه بارنیَ دس، عَبادتَ مَهَن. اِاِ پاتِشا، هَراَ خاطر ایی امیدَسَ گه یهودیَل مِه مَکومَ مَهَن. 8 اَرِه‌چَه باس هُمَه بِلُجوئیتو بای گه خدا مِردیَل زِنیا مِهِه؟ 9 «مِن‌یش عخیدَه‌م یَه بیَ گه هر کاری ماو اَرضد نُم عیسیِ ناصری بِهَم. 10 ئو مِه هَر ایی کارمَ اِنوم شیَر اورشلیم کِرد. دُما یَگه ایی قدِرت‌واختیارمَ اژ رِئیسَل کاهنَل گِرت، نه فَخَد ایمودارَل فِرَه‌می ماوشدِ زندو، بلکِم وخدی مَکومَ موئیانَ مِردِن، اَرضد اونَل رِأمَ ما. 11 اونَلم اِنوم کُل عَبادتگائَل یهود مِجازاتَ مَهَرد ئو وادارمَ مَهَردِن کِفِر بِهَن. مِه اَخَ اَژینو خِض‌اَری بیم، گه جُ‌جُ تاگَه شیَرَل اَژنَوی‌ش مَچیامَ دُمونا. 12 «اِنوم یَکی اژ ایی سفرِلَ، وَه قدِرت‌واختیار ئو حکِم رِئیسَل کاهنَل، مَچیام اِرَه شیَر دمشق. 13 اِاِ پاتِشا، نیمَرو، اَرنوم رئی وَه یِگِل نُیری روشتاتِر اژ نُیر هویَر اژ آسمو دَرشخیَ دور مِن ئو کسَلی گه وَه‌گَردِم بین. 14 کُل هاوِنتیم اَر دل زَمی ئو مِه دَنگمی شنَفت گه وَه زوئو عبرانیِلَ موئِتی‌ئونِم: ”شائول، شائول، اَرِه‌چَه عذاومَ مِین؟ لَخَه شَنِن اَر میخَل اَرِه تو سخدَ!“ 15 «پِرسیم: ”اِاِ خداون، تو کیئین؟“ «خداون وِتی: ”مِه هَراَ عیسی‌مَ گه تو عذاوَ مِینی. 16 مِنتائای هیزگِر ئو بوس اَرسر پائلتا. اَرِیَگه مِه ظاهر بیمَس اَر تو تاگَه بِهَمتَ خادم ئو شات ووژِم، تا اَر اَ چیئَه گه تو مِنِت اِنوم دیَ ئو اَ چیئَه گه اِنوم اَوَه ظاهرَ موئم اَرِنِت، شاتی بِین. 17 مِن اژ چِنگ قوم ووژِت ئو اژ چِنگ خِرِیهودیَل آزادتَ مَهَم ئو کِلتَ‌مَهَم اِرَه تَکو 18 تاگَه چیَمَلو واز کِین تاگَه اژ تیَریکی ویرِ روشتایی ئو اژ قدِرت شِطو گِلارِن ویرِ خدا، تاگَه وَه‌سونگَ ایمون اَر مِه گنائَلو بَشخیا بو ئو اِنوم کسَلی گه تقدیس بینَ، بیَرونی داشدوئی.“ 19 «اِسَه، اِاِ آگْریپاسِ پاتِشا، مِن اژ رویا آسمونی نافِربونیِم نَهَرد. 20 بلکِم اول‌بار وَه اونَلی گه اِنوم دمشق بین، اَسَه اِنوم شیَر اورشلیم ئو سِرُسَر هیال یهودیَه، ئو هَمیش اِنوم خِرِیهودیَل، اِلومِم کِرد گه باس توئَه بِهَن ئو گِلارِن ویرِ خدا ئو کارَلی بِهَن گه دیار بو توئه‌ئو کِردیَ. 21 اَژونَبیَ گه یهودیَل مِنون اِنوم معبد گِرت ئو هِستو بِکُشِنِم. 22 مِنتائای تاگَه ایمِرو، خدا مِه یاری داسی ئو اِسگِه‌یشَ هوسیامَس اَر ایرَه ئو شاتیَ میَمَ کُل، اژ گُجَر تاگَه کَلِنگ. مِه چیئی نِموشِم بِخِر اژ اَ چیئَه گه پِخَمَرَل ئو موسی وِتونَ گه باس اَنجوم بِگِری: 23 یَگه مسیح باس عذاو بِکیشی ئو اول کسی بو گه اژ مِردیَل زِنیا ماو، تاگَه نُیر اِلوم بِهِه اَر ایی قومَ ئو قومَل خِرِیهود.» 24 وخدی پولُس وَه ایی قصه‌لَ اژ ووژ دَفاعَ مَهَردی، فِستوس وَه دَنگ کَلِنگا وِتی: «پولُس، لیوَه بینَ! علم فِرَه لیوَه کِردینَسی.» 25 پولُس جوواوا داتی: «لیوَه نیِم، عالی‌مَقوم فِستوس، بلکِم هوشِ‌حُواسِم هار جا ئو عینِ حخیختَ موشِم. 26 اَرِیَگه پاتِشا ووژ اژ ایی چیئِلَ خَوَر دیری ئو مِن‌یش رُک قصَئَه گَردَ مَهَمی، اَرِیَگه اطمینو دیرِم هُیچ کُم اژ یوئنَ اژ چیَم پنهو نَمَنیِ، اَرِیَگه ایی اتفاقَ اِ خلوت اَنجوم نَگِرتیِ. 27 اِاِ آگْریپاسِ پاتِشا، آیا پِخَمَرَل باوار دیرین؟ مَذانِم گه دیرین.» 28 آگْریپاس وِتیَ پولُس: «میا هَرِ ایی زویَ، مسیحیما کِین؟» 29 پولُس وِتی: «اژ خدامَ مِ گه دیر یا زوی، نه فَخَد جنابعالی بلکِم کُل کسَلی گه ایمِرو گوشَ میَنِ مِه، بوئن اِجور مِه، اَلوَت نه اِ زنجیر!» 30 اَسَه پاتِشا هیزگِرتی ئو وَه‌گَرد او والی ئو بِرنیکی ئو باقی کسَلی گه اِنوم مِجِلیس بین‌یش، هیزو گِرت، 31 ئو هَرهُنَ گه داشدون اژ اورَه مَهَردونَ دِریر، موئِتونَ یَکتِری: «ایی پیا کاری نَهَردیِ گه سزا مِردِن یاگَه زندو بوتی.» 32 آگْریپاس وِتیَ فِستوس: «اَرّ ایی پیا دییو نوئردوئیتی اَرِه امپراطور روم، هَراِسگَه موئیا آزاد بو.» |
@ 2024 Korpu Company