کارَل رسولَل 25 - کتاب مقدس به زبان لکی - گویش مرکزی

مِحاکمَه اَرتَک فِستوس

¹ فِستوس سه روژ دُما یَگه رَسیَ حوزَه فرمونداری ووژ، اژ هیال قیصریَه چی اِرَه شیَر اورشلیم.

² اَر اورَه رِیئسَل کاهنَل ئو کَلِنگَل قوم یهود، اتهامَل ووژون اَرضد پولُسو نا اَر وَر او ئو لالکینی‌ئون.

³ اُوُ اژ فِستوسو هِست تاگَه لِفط بِهِه پولُس کِل‌کِ اِرَه اورشلیم، اَرِیَگه قَصو داشد اَرنوم رئی کُل اِرابِگرِن تاگَه بِکُشِنی.

⁴ مِنتائای فِستوس جوواوا داتی: «پولُس اِ قیصریَه ها زندون‌اِر ئو ووژِم میا وَه ایی زویَ بِچِم اِرَه اورَه.

⁵ بِیلِن کسَلی اژ هُمَه گه اِتِبار ئو قدِرت دیرِن وَه‌گَرد مِه بان تاگَه اَرّ ایی پیا خطای کِردیِ، اَرضد شکائَت کَنی.»

⁶ فِستوس دُما یَگه نزیک اَر هشت تا دیَه روژ مَن اَرتَک اونَل، گِلاهُاردی اِرَه هیال قیصریَه ئو روژ دُماینی محکمه‌ی آوشدیِ رئی ئو فِربو داتی تاگَه پولُس بارِن.

⁷ وخدی پولُس یِهات اِنوم، یهودیَلی گه اژ اورشلیم هاتوئین، هوسیانیَ دورا ئو اتهامَل فِرَه ئو سخدونی دا اَری، مِنتائای نتونستو ثابتو کَن.

⁸ پولُس اَرِه دَفاع اژ ووژ، وِتی: «مِه هُیچ خطامی نَهَردیَ، نه اَرضد شریعت یهود نه اَرضد معبد خدا نه اَرضد امپراطور روم.»

⁹ فِستوس گه مِهِستی منّتی بِنی اَر سر یهودیَل، وِتیَ پولُس: «آیا مِت بِچین اِرَه شیَر اورشلیم تاگَه اَر اورَه اَرِه ایی اتهامِلَ اَرتَک مِه مِحاکمَه بوئین؟»

¹⁰ پولُس جوواوا داتی: «هَراِسگِه‌یشَ هوسیامَس اِنوم محکمَه امپراطور روم، جای گه باس اِنوم مِحاکمَه بوئمی. ووژیشِت خوءَ مَذانین گه مِه هُیچ جرمِمی اَرضد یهودیَل نَهَردیَ.

¹¹ اَرّ مجرمِم یاگَه کارمی کِردیَ گه سزا مِردِنِ، دَروَن مِردِن نیِم. مِنتائای اَرّ ایی اتهامَلی گه مَنِن اَر پا مِه، کُل دِروئِن، کس نِمَتونی مِه بیَ دس اونِلا. دییونَ میَرِم اَرِه امپراطور روم.»

¹² فِستوس دُما شور کِردِنَ گَرد عضا شورا، اِلوم کِردی: «دییونَ میَرین اَرِه امپراطور روم؟ اِسَه مَچین اِرَه تک امپراطور روم!»

پولُس اَرتَک آگْریپاس

¹³ دُما چَن روژ، آگْریپاسِ پاتِشا ئو بِرنیکی اَرِیَگه بوشِنَ فِستوس خَوش هاتینَ، هاتِن اِرَه قیصریَه.

¹⁴ وخدی گه چَن روژ مَنِن اَر اورَه، فِستوس گَپِهَه پولُس اَرِه پاتِشا تیَریف کِردی ئو وِتی: «پیای هار ایرَه گه فِلیکْس او هُیشتیَس اِنوم زندو.

¹⁵ وخدی چِم اِرَه اورشلیم، رِئیسَل کاهنَل ئو شیخَل یهود اتهامَلونی نا اَر پا ئو هِستو گه مَکوم بو.

¹⁶ «مِه جوواوما دان، گه رومیَل هُنَ رسمی نِرِن گه مِتهمی بیَنَ گیر وِر اژ یَگه وَه‌گَرد شاکیَلی ویرَرویرا بو ئو مِجال‌ئون دَنی گه اَرِه اتهامَلی گه میَنی اَری، اژ ووژ دَفاع کِ.

¹⁷ هَریَگه اونَل جیَم بین اَر ایرَه، اَنگِلاتِم نَهَرد بلکِم روژ دُماینی محکمَه‌می آوشدِ رئی ئو فِربونِم دا تاگَه بارنی اِرَه ایرَه.

¹⁸ وخدی شاکیِلِهِه هیزو گِرت تاگَه اَرضد قصَه بِهَنی، مِتهمو نَهَردَ هُیچ کُم اژ اتهامَلی گه مِه انتظارِم داشد.

¹⁹ بلکِم اَرسر چَن چی اِبارَه دین ووژو ئو عیسی نُمی گه مِردیَ ئو پولُس ادعاءَ مِهِه زِنیَ، بینَ دَمَرَگَ.

²⁰ مِه گه نِمَذِناسدِم چطور باس رَسیدَگی بِهَمَ هُنَ چیئَلی، اَژینِم پِرسی گه آیا مِیتی بِچو اِرَه اورشلیم تاگَه اَر اورَه اَرِه ایی اتهامِلَ مِحاکمَه بو.

²¹ مِنتائای وخدی پولُس هِستی تا موقَع حکِم امپراطور روم بِمینیِ زندو، مِه فِربونِم دا گه بِیلِنی اِنوم زندو، تا وخدی گه بتونِم کِل‌کَمی اِرَه تک امپراطور روم.»

²² آگْریپاس وِتیَ فِستوس: «مِه ووژِم میا قصَه‌ل بشتوئِمی.» وِتی: «صوءَ مَشتوئین.»

²³ اِسَه روژ دُماینی، آگْریپاس ئو بِرنیکی وَه تشریفات کَلِنگیکا هاتِن ئو وَه‌گَرد فرموندَه‌ل نظامی ئو پیال سرشناس شیَر چِنَ نوم تالار شیَرا. وَه فِربو فِستوس، پولُسو آوِرد.

²⁴ فِستوس وِتی: «اِاِ آگْریپاسِ پاتِشا، اِاِ کسَلی گه هاینون اَر ایرَه! کُل مردِم یهود، چه اِ اورشلیم ئو چه اَر ایرَه، اَرتَک مِه اژ ایی پیاءَ گه موئینینو شکائَتو کِردیَ ئو قارونونَ گه نَباس زِنی بِمینی.

²⁵ مِنتائای مِه فیَمیم گه او کاری نَهَردیِ گه سزا مِردِن بوتی. مِنتائای اَرِیَگه ووژ هِستی دییو بیَری اَرِه امپراطور روم، قَصِم کِرد کِل‌کَمی اِرَه روم.

²⁶ مِنتائای دَسپیچ دُریس‌حِساوی نِرِم گه اِبارَه او اَرِه سرور ووژِم بِنُیسِنِم. اِسَه اوئِم آوِرد اِرَه تک کُل هُمَه ئو مصقوصاً اَرتَک جنابعالی، اِاِ آگْریپاسِ پاتِشا، تاگَه هایتِر دُما بازخواس، چیئی اَرِه نُیسونِن بِهَمَ دی.

²⁷ اَرِیَگه وَه نظر مِنا عقلونی نیَ گه زندونی‌ای کِل‌کَم‌ بی‌یَگه اتهامَل دیاری کَمی.»