کارَل رسولَل 24 - کتاب مقدس به زبان لکی - گویش مرکزیمِحاکمَه اَرتَک فِلیکْس 1 دُما پنج روژ، کاهن اعظم، حَنانیا، وَه‌گَرد چَن نفر اژ شیخَل ئو وکیلی گه نُم تِرتولُس بیتی، شکائَتَل ووژون اَرضد پولُسو آوِرد اِرَه تک والی. 2 وخدی پولُسو احضار کِرد، تِرتولُس هُنَ بِنیا شکائَت ووژ اَرتَک فِلیکْس ناتی: «عالی‌مَقوم، اَرِیَگه اِژیر سا جنابعالی هایمِ آسائشت‌اِر ئو وَه خاطر حکمت ئو فیَم جنابعالی، وضِ‌حال ایی ملتَ بیتِرا بیَ، 3 ایمَه اِ هر زمون ئو هر جای اَرِه کُل یوئنَ منّت‌بارتیم. 4 مِنتائای اَرِیَگه دیَر ویشتِر اژ یَه مِزاحم وَخدِت نوئیمو، خواهشدَ مَهَم لِفط کَ، گوش بیَ عرض کُئلِ‌کوتامو. 5 «اَرِیَگه فیَمیمونَ ایی پیا چولَه آشوئی کَ. او یهودیَل سِرُسَر دنیا مَرِشِنی‌ِ یَک ئو یَکی اژ سردسَه‌ل فرقَه ناصریَ. 6 او جُ‌جُ تقِلاءَ مَهَردی معبد خدا بی‌حرمت کِ؛ مِنتائای ایمَه نوامو گِرت.[ئو هِستمو گه مِطابق شریعت ووژمو مِحاکمَه کِیمونی 7 مِنتائای لیسیاسِ فرموندَه هات ئو هِرَ زور او اژ چِنگمون اِرآوِردی، 8 ئو فِربو داءَ شاکیَلی تاگَه بان اِرَه تک جنابعالی.] اِسگَه، اَرّ جنابعالی ووژِت بازخواس کِینی، حخیخت اَ چیئَه گه ایمَه مِتهمَ مِهِیمونی اَری، آشگارا ماو اَرِنِت.» 9 یهودیَل‌یش کُلَ گَرد یَک قصَه‌ل اوُ تایید کِرد. 10 وخدی والی هَشارَه کِردیَ پولُس گه قصَه بِهِه، او هُنَ جوواوا داتی: «مِنَ مَذانِم سالَل فِرِه کَ گه قضاوت اَر ایی ملتَ هار مِل جنابعالی؛ اِسَه وَه خَوشی فِرِه، اژ ووژِم دَفاعَ مَهَم. 11 جنابعالی ووژتَ مَتونین پِرسِ‌جو کِین ئو بفیَمین دوازَه روژ ویشتِر اَژی نِمَچوتی گه مِن اَرِه عَبادت چِم اِرَه شیَر اورشلیم 12 ئو اِ ایی مِدتَ نِئیونَ گه مِن اِنوم معبد یاگَه اِنوم عَبادتگال یهود یاگَه اِنوم شیَر، وَه‌گَرد کسی بوئمَ دَمَرَگَ یا کاری بِهَم تاگَه مردِم بِهَنَ گالِ‌راو. 13 اُوُ نِمَتونِن اتهامَلی گه دائونَس اَر مِه، ثابت کَن. 14 مِنتائای اَرتَک هُمَه اعترافَ مَهَم گه مِه مِطابق طریقتی گه اونِلَ موشِنی‌ئون بدعت، خداءِ باوَه‌لمونَ مَپِرَسِم ئو هر چیئی‌شی گه اِنوم تورات ئو نُسَخ پِخَمَرَل نوسیاءَ، باوار دیرِم. 15 وَه هَراَ خدای امید دیرِم گه یوئنَ ووژیشو قبول دیرِنی، گه اَرِه آم صالح ئو آم ظالم زِنیابیئِن اژ مِردیَل هَس. 16 اِسَه مِه هَر تقِلا مَهَم تاگَه نِسوَتَ خدا ئو مردِم، وِژدان پاکمی داشدوئی. 17 «اِسگَه دُما چَن سال، چِم اِرَه شیَر اورشلیم تاگَه اَرِه ژارَل قوم ووژِم صِدقَه بیَرِم ئو قُرونی پیشکَش کَم. 18 داشدِم یَئمَ ماوِردَ جا گه مِنو هُنَ گه رسمِ‌رِسیم خُسِل پاکیِم اَنجوم دائی، اِنوم معبد کِردَ دی. نه جیَمیَتی اِ ایی بِنَ بیَ ئو نه گالِ‌راوی. 19 مِنتائای اَر اورَه چَن یهودی اژ هیال آسیا بین گه باس اَر ایرَه اَر نوا جنابعالی بوئیان تاگَه اَرّ اتهامی اَرضد مِه دیرِن، بوشِن. 20 ئو یاگَه یوئنَ ووژو بوشِن، وخدی هوسیائیم اَرتَک شورا چه خطائونی اژ مِه دیا، 21 بِخِر اژ یَگه اِنومجا اونَل قارونِم: ”وَه خاطر زِنیابیئِن مِردیِلَ گه ایمِرو اَرتَک هُمَه مِحاکمَه موئم.“» 22 اَسَه فِلیکْس گه خو طریقتَ مَشتاسیاتی، مِحاکمَه آوشدیِ گِلی‌تِر ئو وِتی: «وخدی لیسیاسِ فرموندَه بای، وَه پروِندَه هُمَه رَسیدَگیَ مَهَم.» 23 اَسَه فِربو داتیَ افسری گه مَسول بی، تاگَه حُواس اَر پولُس بوتی، مِنتائای کَمِ‌کُتی آزادی‌ئون دِیتی ئو نوا هُیچ کُم اژ رِقیفَلی اَرِه کَل حاجت گِرتِنی، نَگِری. 24 دُما چَن روژ، فِلیکْس وَه‌گَرد ژِنِهِه دْروسیلا گه یهودی بی، هات ئو کِل‌کِردیَ دُم پولُسا ئو گوش داتیَ قصَه‌ل او اِبارَه ایمون اَر مسیح. 25 وخدی پولُس اژ صالح‌بیئین، پیَریزگاری ئو داوری گه میا بای، قصَه کِردی، فِلیکْس هِراسونا بی ئو وِتی: «دیَر بسَ! اِسگَه بِچُ. وخدی مِجالی پیا کَم، هِناتَ مَهَم‌اِر.» 26 هَمیش، امید اَر یَه بیتیَ گه پولُس رُشَت‌ئون دِیتی. اَژونَبیَ گُرّان کِلَ‌مَهَردیَ دُم پولُسا تاگَه قصَئَه گَرد کِیتی. 27 دو سال اَژی چِتی، پورکیوس فِستوس نیشتِ جا فِلیکْس. مِنتائای فِلیکْس، اَرِه یَگه مِنَّت بِنی اَر سر یهودیَل، پولُس هُیشتیِ زندو. |
@ 2024 Korpu Company