کارَل رسولَل 23 - کتاب مقدس به زبان لکی - گویش مرکزی1 پولُس گِز کِردی اَر عضا شورا ئو وِتی: «اِاِ بِرال، مِه تاگَه ایمِرو وَه وِژدونی پاک اِ درگا خدا زِنِه‌یِم کِردیَ.» 2 هَریَگه یَه وِتی، کاهن اعظم، حَنانیا، فِربو داتیَ کسَلی گه هوسیائین اَرتَک پولُس، تاگَه بیَنی اَرنوم دَم. 3 پولُس وِتون: «خداتَ مِ اَری، اِاِ دیوار اِسبی‌کَریا! تو نیشتینَس اَر اورَه تاگَه مِطابق شریعت قضاوتِم کِین، مِنتائای برعسک شریعت، فِربونَ مِین تاگَه بیَن اَرِنِم؟» 4 کسَلی گه هوسیائین اَرتَک پولُس، وِتو: «دُشمینَ مِینَ کاهن اعظم خدا؟» 5 پولُس وِتی: «اِاِ بِرال، نِمَذِناسدِم کاهن اعظمَ؛ اَرِیَگه اِنوم تورات نُیسیاءَ: ”دُشمین نیَ رَبَر قوم ووژِت.“ 6 اَسَه پولُس گه مَذِناسدی بِری اَژینو شیخَل فرقَه صَدّوقی ئو بِری‌تِریش شیخَل فرقَه فَریسیِن، وَه دَنگ کَلِنگا اِنوم شورا وِتی: «اِاِ بِرال، مِه فَریسی ئو کُر فَریسیَلِم، ئو وَه خاطر امیدی گه اَر زِنیابیئِن مِردیَل دیرِم مِحاکمَه موئم.» 7 وخدی یَه وِتی، دَمَرَگَ کَت اِنوم فَریسیَل ئو صدّوقیَل ئو مردِم بینَ دو دسَه، 8 اَرِیَگه صدّوقیِلَ موئِتو نه زِنیابیئِن مِردیَل هَس، نه فریشدَه ئو روح، مِنتائای فَریسیَل، کُل یوئنِئونَ باوار داشد. 9 بیَ قالِ‌قی کَلِنگی! بِری اژ مَلِمَل تورات گه فَریسی بین، هیزو گِرت وَه اعتراضا وِتو: «ایمَه تصقیری اِنوم ایی پیاءَ نِمِهِیمَ دی. اژ کو دیارَ گه روح یاگَه فریشدِه‌ی قصَئَه گَرد نَهَردوئی.» 10 وخدی گه دَمَرگِئو فِرَه‌تِرا بی، فرموندَه زِلَه چِتی گه ناخواد پولُس کُت‌کُت کَن. اَسَه فِربو داتیَ سَروازَل گه بِچِنَ هُار، اژ چِنگ اونَل بارنیَ دِریر ئو بیَرنی اِنوم قَلَه. 11 هَراَ شوءَ، خداون هوسیا اَرتَک پولُس ئو وِتی: «دلِ‌دَرینِت داشدوئی! هَرهُنَ گه اِنوم شیَر اورشلیم شاتیِت دا اَر مِه، اِنوم روم‌یش باس شاتی بِین.» نشقَه کُشتِن پولُس 12 وخدی چیَم روژ تِرَکی، یهودیَل وَه‌گَرد یَک نشقه‌ئو کیشی ئو قسمو هُارد گه تا پولُس نکُشِن، نه نُو بیرِن نه آو. 13 چِل نفر ویشتِر اِ ایی نشقَه دَسو داشد. 14 اونَل چِن اِرَه تک رِیئسَل کاهنَل ئو شیخَل ئو وِتو: «ایمَه قسم سخدمو هُاردیَ گه تا پولُس نَکُشیم، دَم اَر چیئی نَنیم. 15 اِسگَه هُمَه ئو عضا شورا خَوَر بیَنَ فرموندَه رومی تاگَه او باری اِرَه تک هُمَه، وَه ایی دَسپیچَ گه میا ویشتِر اِبارَه تحقیق کِینونی. ایمَه حاضریم وِر اژ یَگه برَسی اَر ایرَه بِکُشیمی.» 16 مِنتائای خُیَه‌رزا پولُس اژ ایی شوئَخونَ خَوَردارا بی ئو چی اِنوم قَلَه ئو خَوَر داءَ پولُس. 17 پولُس هِنا کِردی اَر یَکی اژ افسرَل ئو وِتی: «ایی جِهالَ بیَر اِرَه تک فرموندَه، اَرِیَگه خَوَری دیری گه اَرِه بوشتی.» 18 اَسَه افسرِهَه او بِردی اِرَه تک فرموندَه ئو وِتون: «پولُسی گه ها نوم زندون‌اِر، مِه هِنا کِردی ئو اَژینِم هِستی ایی جِهالَ بارم اِرَه تک تو؛ میا چیئی بوشی‌ئونِت.» 19 فرموندَه دس پیا جِهالِهَه گِرتی، او بِردیِ پِنِه ئو پِرسیتی: «چَه میا بوشین‌ئونِم؟» 20 اَ کُرَ وِتی: «یهودیَل دَس‌یَکیو کِردیَ گه اژ جنابعالیو بِ گه صو پولُس بارین اِرَه تک شورا، وَه ایی دَسپیچَ گه میا ویشتِر اِبارَه او تحقیق کَن. 21 نَچوءِ ژیر اَ چیئَه گه مِئو، اَرِیَگه ویشتِر اژ چِل نفر اَژینو کُلون اِراگِرتیَ. اونَل قسمو هُاردیَ گه تا او نکُشِن، نه آو بیرِن نه نُو. ئو اِسگَه حاضرِن، ئو فَخَد چیَمَ‌رئیِن تاگَه جنابعالی بِچینِ گِرد اَ چیئَه گه مِئو.» 22 فرموندَه، اَ جِهالَ مِرخص کِردی ئو قِدَخَن کِردی، وِتی: «نوشَ کس گه ایی خَوَرتَ داسَ مِه.» پولُسو جاواز کِرد اِرَه هیال قیصریَه 23 اَسَه فرموندَه دو نفر اژ افسرَلی هِنا کِردی ئو وِتی‌ئونو: «دوهیس سَرواز پاپیا، هفتا سُوارَه نظام ئو دوهیس نِزَه‌دار حاضر کَن تاگَه ایمشو سات نُه بِچِن اِرَه هیال قیصریَه. 24 اَرِه پولُس‌یش اَسبی زین کَن ئو امنِ‌اَمو بیَنیَ دس فِلیکْسِ والیا.» 25 هُنَ نُامِه‌یشی نُیسونی: 26 «اژ کْلودیوس لیسیاس وَه عالی‌مَقوم فِلیکْسِ والی: سِلام، 27 یهودیَل ایی پیائونَ گِرت ئو قَص کُشتِنو داشد، مِنتائای مِنَ گَرد سروازَلِم چِم نجادِم دا، اَرِیَگه فیَمیم تبعَه رومَ. 28 وَه‌چوینا گه مِهِستِم بِذانِم اَرِه‌چَه مِتهمَ مَهَنی، اوئِم بِرد اِرَه شورا اونَل. 29 فیَمیم گه اتهامو اِبارَه شریعت ووژونَ، مِنتائای وَه جرمی گه حخ بوتی اِدوم یاگَه زندونی بو، مِتهم نوئیَ. 30 اَسَه گه خَوَردارا بیم اَرضد او نشقه‌ئو کیشیَ، هِرازِه اوئِم کِل‌کِرد اِرَه تک جنابعالی. فِربونِم داءَ شاکیَلی‌یشی تاگَه شکائَتی گه اَرضد دیرِنی، بارِن اِرَه تک جنابعالی.» 31 اِسَه سَروازَل مِطابق فِربونی گه گِرتوئیو، وَه شوآ پولُسونَ گَرد ووژو بِرد تاگَه شیَر آنتیپاتْریس. 32 وَه صوایکا، فَخَد سُوارَه نظامَ گَردَ مَچیانی ئو باقی سَروازَل گِلوناهُارد اِرَه قَلَه. 33 وخدی سُوارَه نظام رَسین اَر هیال قیصریَه، اَ نُامَه‌ئونَ داءَ دس والیا ئو پولُسو آوِرد اِرَه تک او. 34 والی نُامَهَه حیوَنی ئو اژ پولُس پِرسیتی کوئی کَ. هَریَگه فیَمی اَل کیلیکیه‌ءَ، 35 وِتون: «وخدی شاکیَلِت رَسین اَر ایرَه گوشتَ میَمَ قصَه.» اَسَه فِربو داتی تاگَه اِنوم کاخ هیرودیس حُواسون اَر پولُس بو. |
@ 2024 Korpu Company