کارَل رسولَل 22 - کتاب مقدس به زبان لکی - گویش مرکزی1 «اِاِ بِرال، اِاِ باوَه‌ل گوش بیَنَ چیئی گه اِسگَه اَرِه دَفاع اژ ووژِم اَر وَر رُیتو عرضَ مَهَم.» 2 وخدی اونَل شنَفتو گه وَه زوئو عبرانیَل قصه‌ئونَ گَردَ مِهِه ویشتِر بی‌کِشا بین. اَسَه پولُس وِتی: 3 «مِه پیا یهودی‌ای کِم، اِنوم شیَر تارسوسِ کیلیکیَه هاتِمَسَ دی. مِنتائای اِنوم ایی شیَرَ کَلِنگ بیمَ. شریعت اَژدادی ووژمو، خو ئو دُریس‌حِساوی وَه شاگردیم اَرتَک گامالائیل آگِرتیَ ئو اَرِه خدا خیرَتِم داشدیَ، هُنَ گه ایمِرو کُلتو دیرینو. 4 مِه مِریدَل ایی ’طریقتَ‘ تا جای گه گیونون اِربِچو آزارمَ ما ئو اونَل چه ژَن چه پیامَ مَگِرت ئو ماآوشدِنمِ زندو. 5 کاهن اعظم ئو کُل عضا شورا یهود مَتونِن شاتی بیَن اَر مِه، اَرِیَگه نُامَه‌لمی اژ اونَل، اَرِه بِرالون اِنوم دمشق گِرت تاگَه بِچِم اِرَه اورَه ئو اونَلی گه هان اَر اورَه اسیر کَم ئو اَرِیَگه سزا کارو بوئینِن، بارمون اِنوم شیَر اورشلیم. 6 «مِنتائای وخدی اَرنوم رئی نزیکا موئیام اَر شیَر دمشق، نزیک اَر نیمَرو، وَه یِگِل نُیر کَلِنگی اژ آسمو دَرشخیا اِ دورِم. 7 کَتم اَر دل زمین ئو دَنگمی شنَفت گه موئِتی‌ئونِم: ”شائول! شائول! اَرِه‌چَه عذاومَ مِین؟“ 8 پِرسیم: ”اِاِ خداون، تو کیئین؟“ «جوواوا داتی: ”مِه اَ عیسی ناصری‌مَ گه تو عذاوَ مِینی.“ 9 کسَلی گه وَه‌گَردِم بین نُیرِهَه‌ئو دی مِنتائای دَنگ اَوَه گه قصَه‌مَ گَردَ مَهَردیو نَشتَفت. 10 «وِتِم: ”اِاِ خداون، چَه بِهَم؟“ «خداون وِتی: ”هیزگِر ئو بِچُ اِرَه دمشق. اَر اورَه کُل چیئَلی گه اَنجوم دائِنی هار مِلِت، موشِن‌ئونِت.“ 11 وَه‌چوینا گه مِن اِ زور بِریقَه اَ نُیرَ، نِمَتونستِم بوئینِم، کسَلی گه وَه‌گَردِم بین دس مِنو گِرت ئو بِردونَ اِرَه دمشق. 12 «اِنوم دمشق، پیا دینداری بی، حَنانیا نُم، گه مِطابق شریعت زِنِه‌یَ مَهَردی، گه اَرتَک کُل یهودیَل اورَه، نُم‌نیک بی. 13 حَنانیا هاتِ دیارِم وِتی: ”اِاِ بِرا! اِاِ شائول! بیناآ بو!“ جاوارجا، اِدوارَه بیناآ بیم ئو اوئِم دی. 14 «او وِتی: ”خداءِ باوَه‌لمو تو جیاآ کِردیَسی تاگَه خواس او بِذانین ئو اَ خادم صالحَ بوئینین ئو قصه‌ی اژ دَم بشتوئینی. 15 اَرِیَگه تونَ موئینَ شات او اَرتَک کُل مردِم، اَرِه چیئَلی گه دیتَ ئو شنَفتِتَ. 16 اِسگَه چیَمَ‌رئی چِین؟ هیزگِر ئو خُسِل تیَمید بِگِر ئو نُم او بار، ئو اژ گنائَلِت پاکا بو!“ 17 «وخدی گِلماهُارد اِرَه شیَر اورشلیم، اِنوم معبد داشدِم دوعامَ مَهَرد چِمَ خلسه‌اِرا 18 ئو خداونِم دی گه موئِتی: ”زوی کَ ئو زِلِ‌زوی اژ اورشلیم بِهَه دِریر، اَرِیَگه اونَل شاتی تون اِبارَه مِه قبول نِمَهَن.“ 19 «وِتِم: ”اِاِ خداون، اُوُ ووژونَ مَذانِن گه مِنَ مَچیام اِنوم عَبادتگال یهود ئو اونَلی گه ایمونو اَر تو داشد ماآوشدِنمِ زندون ئو مام اَرینو. 20 ئو وخدی خوین شهیدِت یانی استیفانونَ مَرِشو، مِه ووژِم هوسیائیم اَر اورَه ئو دلِم بی اَ کارَ بِهَن ئو جِنِکَل قاتلَل استیفانِم هُیشت اَرتَک ووژِم.“ 21 «خداون وِتی‌ئونِم: ”بِچُ؛ اَرِیَگه مِه کِلتَ‌مَهَم اِرَه جائَل دویری، اَرتَک خِرِیهودیَل.“» پولُس ئو فرموندَه رومی 22 مردِم تاگَه ایرَه گوشونَ ما اَر پولُس، مِنتائای وخدی یَه وِتی دَنگو بِردِ رُ ئو قارونو: «هُنَ کسی اژ رُی زَمی هیزدَن اَرِیَگه نَباس زِنی بِمینی!» 23 هَرهُنَ گه اونِلَ مَقارونو ئو چوخائَل ووژو خِرونَ ما اَر دور سرو ئو توزونَ مَهَرد، 24 فرموندَه فِربو داتی پولُس بیَرن اِنوم قَلَه، تاگَه وَه شلاخ بازخواس کَنی تاگَه بفیَمی گه اَرِه‌چَه مردِم هُنَ اَرضدَ مَقارِنِنی. 25 وخدی گه اوئنَ اَرِه شلاخ دائنَ مَوَستا، پولُس وِتیَ افسری گه هوسیائی اَر اورَه: «یانی قانون ایی صِلاءَ مِئَه هُمَه تاگَه پیا رومی‌ای گه حالامی مِحاکمَه نوئیَ شلاخ دِینو؟» 26 افسرِهَه وخدی یَه شنَفتی، چی اِرَه تک فرموندَه وِتی: «مَذانین چَه دیرین مِهِین؟ ایی پیاءَ تبعَه رومَ!» 27 فرموندَه هات اِرَه تک پولُس ئو اَژی پِرسی: «بوش‌ئونِم، یانی تو تبعَه رومین؟» جوواوا داتی: «اَاَ، هم.» 28 اَسَه فرموندَه وِتی: «مِن اَرِیَگه بوئمَ تبعَه روم، پیل فِرَه‌می داءَ.» پولُس جوواوا داتی: «مِنتائای مِه هَر تبعَه روم هاتِمَسَ دی!» 29 اونَلی گه مِهِستو بازخواس کَنی، هِرازِه تَکو داءِ دُما، فرموندِهِه‌یش زِلَه چِتی، اَرِیَگه فیَمی یِه تبعَه روم آبَسدیِ. پولُس اِنوم شورا یهود 30 وَه صوایکا، فرموندَه گه مِهِستی ژیرِتیَه اِربارتی گه اَرِه‌چَه یهودیَل پولُس متهمَ مَهَن، او اژ زندو آزاد کِردی ئو فِربو داتی گه رِیئسَل کاهنَل ئو کُل عضا شورا یهود جیَم بوئن. اَسَه پولُس آوِردیَ هُار تاگَه بوسی اَر وَر اونِلا. |
@ 2024 Korpu Company