کارَل رسولَل 21 - کتاب مقدس به زبان لکی - گویش مرکزیپولُس مَچو اِرَه شیَر اورشلیم 1 دُما یَگه اَژینو جیاآ بیمو، کَتیمِ رئی اژ رئی دریا یِه راس هاتیمون اِرَه جزیرَه ’کاس‘. روژ دُماینی رَسیمون اَر جزیرَه رودِس ئو اژ اورَه چیمون اِرَه شیَر پاتارا. 2 اَر اورَه کَشتیمونی کِردَ دی گه مِهِستی بِچو اِرَه فینیقیَه. اِسَه سُوار بیمون ئو کَتیمِ رئی. 3 جزیرَه قبرسمونِ لا چپ ووژمونا دی ئو دامون اَر قِ، ئو چیمون اِرَه سوریَه. اَسَه اِ شیَر صور اژ کَشتی هاتیمونَ هُار، اَرِیَگه اَر اورَه باس، بار کَشتیِهِه‌ئو حالیَ مَهَرد. 4 اِسَه اَر اورَه شاگردَلمو کِردَ دی، هفت روژ مَنیم اَرتَکو. اونَل وَه هدائَت روح‌القدس وِتونَ پولُس نَچو اِرَه شیَر اورشلیم. 5 حِنی گه وخد مَنِنمون اَر اورَه تموم بی، کَتیمِ رئی چیمونَ سفر. شاگردَل کُلو وَه‌گَرد ژِنَل ئو آیلَلو تا جای گه اژ شیَر کِردمونَ دِریر ایمَلو آوشدِ رئی. اَر اورَه اَر لو دریا زُنیمو دا ئو دوعامو کِرد. 6 دُما یَگه خدافظیمو کِرد، سُوار کَشتی بیمو، ئو اون‌یش گِلوناهُارد اِرَه مال ووژو. 7 وخدی سفرمو وَه کَشتی اژ شیَر صور تموم بی ئو رَسیمون اَر شیَر پْتولامائیس. اَر اورَه سرمو دا اَر بِرالمو ئو یِه روژ مَنیم اَرتَکو. 8 وَه صوایکا، اژ اورَه چیمون ئو هاتیمون اِرَه قیصریَه ئو چیمون اِرَه مال فیلیپُس بشارت‌کَر، گه یَکی اژ اَ هفت شمّاسَ بیَ، ئو مَنیمی اَرتَک. 9 او چوار دِت داشدی گه هَنی شویو نَهَردوئی ئو نبوّتونَ مَهَرد. 10 دُما چَن روژی گه اَر اورَه بیمو، نبوّت‌کَری گه نُم آگابوس بیتی اژ هیال یهودیَه یِهات. 11 او هات اِرَه تک ایمَه ئو قِ‌وَنِهَه پولُس سَنی، دَسِ پال ووژَ اَوا بَسدی، وِتی: «روح‌القدسَ موشی: ”یهودیَل اورشلیم صائای ایی قِ‌وَنَ هَرهُنَ آموئنِن ئو میَنیَ دس خِرِیهودیَلا.“» 12 وخدی یَمونَ شنَفت، ایمَه ئو مردِم اورَه لالکیمونَ پولُس گه نَچو اِرَه اورشلیم. 13 مِنتائای پولُس جوواوا داتی: «یَه چه کاری کَ مِهِینو؟ اَرچَه مَگیرینون ئو دل مِنَ مَشکِنینو؟ مِن اَرِه نُم خداون عیسی، حاضرِم نه فَخَد بِکُوئِمِ زندو، بلکِم اِنوم شیَر اورشلیم بِمِرِم.» 14 وخدی دیمو گه قانی نِماو، دیَر جَرمو نَهَرد، وِتمون‌ئون: «هرچی خواس خداونَ، بو.» 15 دُما اَ روژِلَ تیارِک سفرمو دا ئو چیمو ویرِ شیَر اورشلیم. 16 بِری اژ شاگردَل گه اژ قیصریَه وَه‌گَردمو هاتِن، ایمَلو بِرد اِرَه تک یَکی گه نُم مِناسون بیتی گه اژ مردِم قبرس ئو یَکی اژ شاگردَل قدیمی بی تاگَه بوئیمونَ مِمو مالی. پولُسَ مَچو اِنوم شیَر اورشلیم 17 وخدی رَسیمون اَر اورشلیم، بِرالِهَه وَه رُی خَوشا هاتِنَ نوامو. 18 وَه صوایکا وَه‌گَرد پولُس چیمو تاگَه یعقوب بوئینیم. شیخَل کُل اَر اورَه بینَ. 19 پولُس دُما حالِ‌حُوال کِردِنَ گَردو، اَ چیئِلَ گه خدا وَه‌سونگَ خِلمت او اِنوم خِرِیهودیَل کِردوئیتی یَکی‌یَکی اَرِه تیَریف کِردِنی. 20 وخدی شنَفتو، خدائو جِلال دا. اَسَه وِتونَ پولُس: «بِرا، هُنَ گه موئینین هزارو یهودی ایمونو آوِردیَ ئو کُل اَرِه شریعت خیرَت دیرِن. 21 اِنوم اونَل هُنَ چاو کَتیَ گه تو کُل یهودیَلی گه اِنوم خِرِیهودیَل زِنِه‌یَ مَهَن، تیَلیمَ مِین گه اژ موسی رُی اِرگیردِنِن، ئو موشین گه نَباس آیلَلو ختینَه کَن ئو رسمِ‌رِسیم یهودیَل بارِنَ جا. 22 اَنی چَه باس بِهِیم؟ حکماً اونَل شنَفتونَ گه تو هاتینَس اِرَه ایرَه. 23 اِسَه اَ چیئَه گه موشیم‌ئونِت، اَنجوم دَ. ایرَه اَرتَک ایمَه چوار پیا هَن گه نذرونی ها مِل‌اِر. 24 اونِلَ بیَرَ گَرد ووژِت ئو رسمِ‌رِسیم خُسِل پاکیونَ گَرد بارَ جا ئو خرجَلو بِکیش تاگَه بتونِن سِرَلو بِتیشِن. تاگَه کُلو بِذانِن گه اَ چیئَه گه اِبارَه تونو وِتیَ راس نیَ بلکِم تونیش شریعتَ مارینَ جا ئو اَژی اطاعتَ مِهِینی. 25 مِنتائای اِبارَه ایمودارَل خِرِیهودی، ایمَه حکِم ووژمون اِنوم نُامَه‌مونی کِل‌کِرد اَرِنو ئو وِتمو گه باس اژ چیئی گه اَرِه بِتَل قُرونیَ ماو، اژ خوین، ئو اژ گوشد حِوونَل تاسیا ئو اژ بی‌عصمتی پیَریز کَن.» 26 اَسَه روژ دُماینی پولُس اَ پیالَ وَه‌گَرد ووژ بِردی ئو رسمِ‌رِسیم خُسِل پاکیَ گَرد آوِردِنیِ جا. اَسَه چی اِنوم معبد خداون ئو تموم بیئِن تاریخ روژَل پاکی اِلوم کِردی تاگَه اَرِه هرکُم اژ اونَل قُرونی پیشکَش بو. پولُس اِنوم معبدَ مَگِرِن 27 وخدی هفت روژ خُسِل پاکی داشدی تمومَ موئیا چَن نفر یهودی اژ هیال آسیا، پولُسون اِنوم معبد دی. اونَل کُل جیَمیَتو آنتریک کِرد ئو اوُ گِرت، 28 مَقارونو موئِتو: «اِاِ اسرائیلیَل، یاری کَن؛ یَه هَر اَوَه‌‌سَ گه اِ کُل جا کُل مردِم اَرضد قومِمو ئو شریعتمو ئو اَرضد ایی مَکو مقدّسَ تیَلیمَ مِ. بِخِر اژ یوئیشَ، او جُ‌جُ یونانیَل‌یش آوِردیَسی اِنوم معبد ئو ایی مَکو مقدّسَ نِجس کِردیَسی.» 29 اونَل وِرِکار تْروفیموس گه اَل شیَر اَفِسُس بیو اِنوم شیَرَ گَرد پولُس دوئی ئو گُمونونَ مَهَرد گه پولُس او آوِردیَسی اِنوم معبد. 30 کُل شیَر بیَ قالِ‌قی! مردِم اژ هر لای اِریشتو آوِرد ئو پولُسو گِرت اژ معبدو کیشیَ دِریر ئو هِرازِه دِرَل معبد اِ پِشت سرونا بُوئنیا. 31 وخدی مِهِستو بِکُشِنی، خَوَر رَسیَ فرموندَه سپائیَل رومی گه کُل شیَر اورشلیم رِشیاسِ یَک. 32 او هِرازِه وَه‌گَرد سَروازَل ئو افسرَل ووژ هِلاتونی اَر جیَمیَت. وخدی چیَم مردِم کَت اَر فرموندَه ئو سروازَلی، اژ سیرکُش کِردِن پولُس آهوسیان. 33 فرموندَه هاتِ نزیک ئو پولُس گِرتی ئو فِربو داتی وَه دو زنجیر آبوئنِنی. اَسَه پِرسیتی گه او کیَ ئو چَه کِردیَسی. 34 اژ نوم جیَمیَت هر کی وَه گالَ‌گال چیئی موئِتی. فرموندَه اَرِیَگه قالِ‌قی فِرَه بی نتونستی حخیخت بفیَمی، فِربو داتی پولُس بیَرن اِنوم قَلَه. 35 وخدی پولُس رَسیَ نزیک پِلَه‌ل قَلَه، وَه‌چوینا گه جیَمیَت فِرَه خِضدارا بوئین سَروازَل مجبور بین پولُس اَرسر دَسَلونا بیَرِن. 36 اَرِیَگه جیَمیَتی گه وَه دُم سر اونِلا ماهاتِن، مَقارونو: «بِکُشِنی!» پولُسَ گَرد مردِم قصَه مِهِه 37 وخدی گه داشدو پولُسونَ ماوِرد اِنوم قَلَه، او وِتیَ فرموندَه: «صِلا مِین چیتی بوشم‌ئون؟» فرموندَه وِتی: «تو زوئو یونانی بِلِنین؟ 38 مَر تو هَراَ پیا مصریَ نیئین گه وِرِکار گالِ‌راوی آوشدیِ رئی ئو چوار هزار قاتلَ گَرد ووژ بِرد اِنوم بیاوو؟» 39 پولُس جوواوا داتی: «مِه پیا یهودی اژ شیَر تارسوس کیلیکیَه‌م، شیَری گه بی‌تُرِّشُر نیَ. خواهشدَ مَهَم صِلا بِینَ گَرد مردِم قصَه بِهَم.» 40 اَسَه فرموندَه صِلا داتی، پولُس هوسیا اَررُی پِلَه‌ل ئو دس ووژ ویرِ مردِم دِریژاِرا کِردی. وخدی بیَ کِشمات وَه زوئو عبرانیَلا هُنَ وِتی‌ئونو: |
@ 2024 Korpu Company