کارَل رسولَل 19 - کتاب مقدس به زبان لکی - گویش مرکزیپولُس اِنوم شیَر اَفِسُس 1 وخدی گه آپولُس اِنوم شیَر قُرَنتُس بی، پولُس اژ اَ وِلاتَ رد بی ئو اژ رئی حشگی رَسی اَر شیَر اَفِسُس. اَر اورَه بِری شاگرد کِردیَ دی 2 ئو اَژینو پِرسیتی: «آیا وخدی گه ایمونتو آوِرد، روح‌القدستو گِرت؟» وِتو: «ایمَه جُ‌جُ نَشتَفتِمونَ گه روح‌القدس‌یش هَس.» 3 پولُس وِتی‌ئونو: «اَنی اَر چه اساسی خُسِل تیَمیدتو گِرت؟» وِتو: «تیَمید یحیی.» 4 پولُس وِتی: «تیَمید یحیی، تیَمید توئَه بی. یحیی موئِتیَ مردِم ایمو بارن اَر اَوَه گه دُما اوءَ مای، یانی عیسی.» 5 وخدی یِئونَ شنَفت وَه نُم خداون عیسی تیَمیدو گِرت. 6 ئو وخدی گه پولُس دس نا اَرسر اونَل، روح‌القدس هات اَررُیو، هُنَ گه وَه زوئونَلِ‌تِر قصه‌ئو کِرد ئو نبوّتو کِرد. 7 اَ پیالَ، وَه سر یَکا دوازَه نفر بین. 8 اَسَه پولُس چی اِنوم عَبادتگا یهود، اَر اورَه سه مُنگ وَه جورَتا قصَه مَهَردی ئو اِبارَه پاتِشائی خدا دلیلَ ماوِردی ئو قانیونَ مَهَردی. 9 مِنتائای وخدی بِری اَژینو اِژیر نِمَچیان ئو ایمونو نِماوِرد ئو اَرتَک کُل، دُشمینونَ ما اَر ’اَل طریقت‘، پولُس اَژینو دویرا گِرتی ئو شاگردِلَ گَرد ووژ بِردی، ئو کُلِ روژی اِنوم مدِرسَه سخنرانی تیرانوس، گپَ ماتی ئو دلیلَ ماوِردِنی اَرِه. 10 دو سال هَرهُنَ اَژی چِتی، هُنَ گه کُل مردِم هیال آسیا چه یهود، چه یونانی، کلوم خداونو شنَفت. 11 خدا وَه دس پولُس مُجِزَه‌ل بِلُجوئی اَنجومَ ماتی، 12 هُنَ گه مردِم پَروئَل ئو پر کِراسَلو گه هاوِنتوئیَ قِ او، موئردون اَرِه مریضَلو، ئو مِرَضَلو شِفاءَ مَگِرت ئو روحَل گَن اَژینونَ مَچیاءَ دِریر. 13 اَسَه بِری اژ جِن‌گیرَل یهودیش گه مَگیردیان اِنوم شیَرَل، تقِلائو کِرد نُم خداون عیسی بارن اَر کسَلی گه روحَل گَنو داشد. اونِلَ موئِتو: «قسمتونَ میَمَ عیسی‌ی گه پولُس موعظَه مِهِیتی، بورنَ دِریر!» 14 کسَلی گه هُنِئونَ مَهَرد، هفت کُر اِسکیوا بین، گه یَکی اژ رِیئسَل کاهنَل یهود بی. 15 مِنتائای روحِ گَن جوواوا دانی، وِتی: «عیسیَ مَشتاسِم، پولُس‌یشَ مَشتاسِم مِنتائای هُمَه کیئینو؟» 16 اَسَه پیای گه روحِ گَن داشدی رِمیا اَر کولو، ئو زور کُلو داشدی ئو هُنَ کُتَل‌کو کِردِنی گه لُتو ئو زیَمی اژ اَ مالَ حِیواینَ دِریر. 17 وخدی کُل مردِم شیَر اَفِسُس، چه یهودی ئو چه یونانی، اژ ایی اتفاقَ خَوَردارا بین، کُل زِلَ‌تِراقا بین، هُنَ گه اژ اَوِءِ دُما فِرَه عزّتونَ مَنیا اَر نُم خداون عیسی. 18 هَمیش فِرَه کسَل اژ اونَلی گه ایمونو آوِردوئی، هاتِنِ وَر ئو آشگارا اعترافو کِرد اَر کارَلو. 19 ئو بِریشی گه جادوگریونَ مَهَرد، کِتاوَل ووژو آوِرد ئو اَر وَر چیَم کُل مردِم آگِرون اَژی دان. وخدی خیمت کِتاوِلِهَه‌ئو حساو کِرد، پنجا هزار سکَه نُخِرَه بی. 20 اُهُنَ، کلوم خداون ویشتِرِ ویشتِر پَشخا موئیا ئو قویَتَ مَگِرتی. 21 دُما ایی اتفاقِلَ، پولُس وَه هدائَت روحِ خدا قَص کِردی گه اژ رئی مقدونیَه ئو اَخائیه‌آ، بِچو اِرَه شیَر اورشلیم. وِتی: «دُما یَگه چِم اِرَه اورَه، باس روم‌یش بوئینِم.» 22 اَسَه دو نفر اژ دسیارَلی، تیموتائوس ئو اِراستوس، کِل‌کِرد اِرَه مقدونیَه ئو ووژ قِیلی مَن اِنوم هیال آسیااِر. گالِ‌راو اِنوم شیَر اَفِسُس 23 اِ ایی موقِع‌اِرَ، بیَ گالِ‌راو کَلِنگی اِبارَه ’اَل طریقت‘. 24 اَرِیَگه پیا نُخِرَه‌سازی گه نُم دیمیتریوس بیتی، ئو مِجسمَه‌ل نُخِرَه اژ بِت آرتِمیس دُریسَ مَهَردی ئو اژ ایی رئیَ دِرُمِه فِرِه نَصُی صنعتگرَل کِردوئیتی، 25 اونَل ئو کارگرَلی گه هُنَ حِرفه‌ئونی داشد جیَم کِردِ دور یَکا ئو وِتی‌ئونو: «اِاِ پیال، مَذانینو گه رِسخ ئو روژیمو، اژ ایی پیشَه‌مونَسَ. 26 مِنتائای هُنَ گه موئینینون ئو مَشتوئینو، ایی پولُسَ نه فَخَد اِنوم شیَر اَفِسُس، بلکِم اِنوم کُل آسیایش، فِرَه کسَل اژ مردِم قانی کِردیِ ئو اژ رئی اِرآوِردِنِ. اوءَ موشی خدالی گه وَه دس آمیزاءَ دُریسَ موئن، خدا نیِن. 27 اِسَه ایی خطرَ هَس گه نه فَخَد کسمِ‌دَرُمِه‌مو اژ رونق بِکُوءِ، بلکِم معبد الهَه کَلِنگمو آرتِمیس‌یش خوار بو ئو او گه اِنوم آسیا ئو اِ سِرُسَر دنیا مَپِرَسِنی، عظَمت اژ بِن بِچوتی.» 28 وخدی یِئونَ شنَفت، آگِرون اژ سر چی، قارونون ئو وِتو: «کَلِنگَ، آرتِمیسِ اَفِسُسیَل!» 29 ئو اِنوم کُل شیَر بیَ گالِ‌راوی! مردِم کُلَ گَرد یَک رِشیان اِنوم تماشاخونَه ئو گایوس ئو آریستارخوس اَل مقدونیه‌یش گه اژ هُمکارَل پولُس بینو کیشیَ تووسُرا وَه‌گَرد ووژو بِردو. 30 مِنتائای وخدی پولُس هِستی با اِنوم جیَمیَت، شاگردَل نِئیشتو. 31 جُ‌جُ بِری اژ مقومدارَل هیال آسیا گه رِقیفَل بینی، پِغومون اَرِه کِل‌کِرد، ئو لالکینی‌ئون گه پا نَنی اِنوم تماشاخونَه. 32 اِنوم جیَمیَت بیَ قالِ‌قی، بِری مَقارونو ئو هر کی چیئی موئِتی ئو ویشتِر مردِم نِمَذِناسدو اَرِه‌چَه جیَم بینَس اَر دور یَکا. 33 یهودیَل، اِسکندرو آوشدوئیِ نوا، ئو بِریشی اِنوم جیَمیَت گُمونونَ مَهَرد ایی چیئِلَ ها ژیر سر اِسکندراِر. او وَه دس هَشارَه کِردیَ مردِم ئو مِهِستی چیئَلی اَرِه دَفاع بوشی. 34 مِنتائای وخدی مردِم ذِناسدو یهودی‌ای کَ، کُل یِه‌دَنگ، نزیک اَر دو سات قارونو: «کَلِنگَ، آرتِمیسِ اَفِسُسیَل!» 35 دُماخِرِ، داروغَه شیَر جیَمیَت آروما کِردی ئو وِتی: «اِاِ پیال شیَر اَفِسُس، کیَ گه نَذانی شیَر اَفِسُس قِلااور معبد آرتِمیسِ کَلِنگَ ئو مِتیَه‌جی اَ بَرد مقدّسَسَ گه اژ آسمو هاتیَسَ هُار؟ 36 اِسَه وخدی نِماو ایی چیئِلَ حاشا کِین، باس بِکُمینو، ئو وَه هِلَه‌پِلَه کاری نِهِینو. 37 اَرِیَگه ایی پیالَ گه آوِردِنتونَس اِرَه ایرَه، نه معبد ایمَه‌ئو بی‌قُرپ کِردیَ ئو نه کِفِر الهَه ایمَه‌ئو کِردیَ. 38 اِسَه اَرّ دیمیتریوس ئو هُمکارَل صنعتگری اژ کسی شکائَت دیرِن، در محکمَه‌ل چوار تاق وازَ ئو والیَل‌یش حاضرِن. بِیلِن شکائَتَل ووژو بیَرن اِرَه اورَه. 39 مِنتائای اَرّ چیئی‌تِرتونَ مِ، باس اِنوم جلسَه‌ل رسمی بِکُوئینون اَر یَک. 40 اَرِیَگه ایمَه هایمِ ایی خطراِرَ گه مِتهم بوئیمونَ گالِ‌راو ایمِرو. اَرِیَگه هُیچ دلیلی اَرِه ایی قالِ‌قیَ نِمَتونیم باریمو.» 41 یَه وِتی ئو مردِم اژ یَک چویچونی. |
@ 2024 Korpu Company