کارَل رسولَل 18 - کتاب مقدس به زبان لکی - گویش مرکزیپولُس اِنوم شیَر قُرَنتُس 1 دُما یَه، پولُس شیَر آتن وِل کِردی چی اِرَه شیَر قُرَنتُس. 2 اَر اورَه وَه‌گَرد پیا یهودی، آکیلا نُم اژ مردِم شیَر پونتوس، آشناآ بی گه وَه‌گَرد ژِنِهِه گه پْریسکیلا نُم بیتی، تازَه اژ ایتالیا هاتوئین، اَرِیَگه کْلودیوسِ امپراطور روم فِربو دائیتی گه یهودیَل کُل اژ روم بِهَنَ دِریر. پولُس چی اونَل بوئینی، 3 ئو وَه‌چوینا گه کار اویش چُی اونَل داواردوزی بی، مَن اَرتَکو ئو کار کِردی. 4 او هر شَمَه مقدّسی اِنوم عَبادتگال یهود اَرِه یهودیَل ئو یونانیَل دلیلَ ماوِردی ئو تقِلا مَهَردی قانیو کِ. 5 وخدی سیلاس ئو تیموتائوس اژ مقدونیَه هاتِن، پولُس ووژ تمومِ کمال وَخمِ اِلوم کلوم خدا کِردوئیتی، ئو شاتیَ ماتیَ یهودیَل گه عیسی هَراَ مسیحَسَ گه باس بای. 6 مِنتائای وخدی یهودیَل بینیَ زیچ ئو دُشمینو دائون، پولُس توز جِنِکی تَکونی تا شاتی‌ای بو اَرضد اونَل گه خَضو خدا ما اَر سرو، ئو وِتی‌ئونو: «خوینتو ها مِل ووژتون‌اِر! یَه دیَر اِ مِل مِه نیَ. اَژیرِ دُما، دیَر مَچِم اِرَه تک خِرِیهودیَل.» 7 اَسَه اورَه وِل کِردی ئو چی اِرَه مال تیتوس یوستوس گه آم خداپِرَسی بی ئو مال اَر کَش عَبادتگا بیتی. 8 کْریسپوس، رِئیس عَبادتگا، وَه‌گَرد کُل عتِ‌عیالی ایمونو آوِرد اَر خداون، ئو هَمیش فِرَه کسَل اژ مردِم شیَر قُرَنتُس وخدی قصَه‌ل پولُسو شنَفت، ایمونو آوِرد اَری، ئو خُسِل تیَمیدو گِرت. 9 یِه شو خداون اِنوم رویا وِتیَ پولُس: «زِلَت نَچو! قصَه بِهَه ئو بی‌کِش نوس! 10 اَرِیَگه مِه هامَ گَردِت ئو کس نِمَتونی بِلاتی باری اَرسر، اَرِیَگه مِه فِرَه کسَل اِنوم ایی شیَرَ دیرِم.» 11 اَسَه پولُس یِه سال ئو نیم مَن اَر اورَه ئو کلوم خدا تیَلیم دانی. 12 مِنتائای وخدی گالیو، والی شیَر اَخائیَه بی، یهودیَل کُلَ گَرد یَک رِشیانَ سر پولُس‌اِرا ئو بِردونَ اِرَه محکمَه، 13 وِتو: «ایی پیا مردِم قانیَ مِهِه گه خدا خِلافِ شریعت بِپِرَسِن.» 14 وخدی پولُس هِستی قصَه بِهِه، گالیو وِتیَ یهودیَل: «اِاِ یهودیَل اَرّ جرم ئو جنائَتی اِ ایی بِنَ بوءَ، اَسَه دلیلی دیرِم گه شکائَتتو بشتوئِم. 15 مِنتائای اَرِیَگه ایی گپَ اَرسر کِلمَه‌ل ئو نُمَل ئو شریعت ووژتونَ، اِسَه ووژتو رَسیدَگی کَنی‌ئون. مِه نِمِم اِبارَه هُنَ چیئَلی قضاوت بِهَم.» 16 اَسَه اژ محکمَه آوشدِنیَ دِریر. 17 اون‌یش کُلو سوسْتِنِس، رِئیس عَبادتگائو گِرت ئو اَر وَر محکمَه گُرزکوئو کِرد. مِنتائای گالیو اصِلا اِتِنا نَهَردی. پولُس گِلامیری اِرَه اَنطاکیَه 18 دُما یَه پولُس روژَل فِرِه مَن اَر اورَه ئو اَسَه اژ بِرال خدافظی کِردی ئو اژ رئی دریا چی اِرَه سوریَه. اِ ایی سفرَ، پْریسکیلا ئو آکیلایشَ گَرد بینی. او اِنوم شیَر کِنخْریَه سر ووژ تیشیتی، اَرِیَگه هُنَ نذِر کِردوئیتی. 19 هَریَگه اونَل رَسین اَر شیَر اَفِسُس، پولُس هُمسفرَل ووژ وِل کِردی ئو چی اِرَه عَبادتگا، ئو وَه‌گَرد یهودیَل گپَ ماتی ئو دلیلَ ماوِردی. 20 اژ اوُ هِست قِیلی ویشتِر بِمینی اَرتَکو، مِنتائای قبول نَهَردی 21 ئو خدافظیَ گَرد کِردِنی، وِتی: «اَرّ خدا بِیتی اِدوارَه گِلامیرِم اِرَه تَکتو.» اَسَه وَه کَشتیا اژ اَفِسُس چی. 22 وخدی رَسیَ بندر قیصریَه اژ کَشتی هاتَ هُار، (ئو چی اِرَه شیَر اورشلیم) ئو دُما یَگه سَری دا اَر ایمودارَل کلیسا، چی اِرَه اَنطاکیَه. 23 قِیلی مَن اَر اورَه ئو اِدوارَه کَتِ رئی چیَ سفر، اِنوم وِلاتَل غَلاطیَه ئو فْریجیَه، گُلَه اَر گُلَه مَگیردیا ئو قویَتَ ماتیَ کُل شاگردَل. 24 اِ، اَ روژِلَ، یهودی‌ای، آپولُس نُم، گه اژ مردِم اسکندریَه بی، هات اِرَه اَفِسُس. او اِ نُسَخ مقدّس خو سررشتَه داشدی ئو قصَه‌کَر خوئی بی؛ 25 اِ رئی خداون تیَلیم گِرتوئیتی ئو وَه آگِر روح‌القدس قصَه مَهَردی ئو اِبارَه عیسی خو تیَلیمَ ماتی، وَه‌یاآگه فَخَد اژ خُسِل تیَمید یحیی خَوَر داشدی. 26 او وَه جورَتا اِنوم عَبادتگا بِنیا نا اَر قصَه کِردِن. هَریَگه پْریسکیلا ئو آکیلا قصَه‌لو شنَفت، اوُ بِرد اِرَه مال ووژو ئو رئی خدائو دُریس‌تِر یا دائون. 27 وخدی آپولُس مِهِستی بِچو اِرَه اَخائیَه، بِرال تشویقو کِرد ئو اَرِه شاگردَلو نُیسو تاگَه وَه رُی خَوش بِچِنیِ گِرد. وخدی آپولُس رَسی اَر اورَه یاری فِرِه داءَ کسَلی گه وَه‌سونگَ فیض خدا ایمونو آوِردوئی. 28 اَرِیَگه او اَر وَر کُل مردِم، سفدِسخد ادعا یهودیَل رد کِردی ئو وَه نُسَخ مقدّس ثابتَ مَهَردی گه عیسی هَراَ مسیحَسَ گه باس بای. |
@ 2024 Korpu Company