کارَل رسولَل 17 - کتاب مقدس به زبان لکی - گویش مرکزیپولُس ئو سیلاس اِنوم شیَر تِسالونیکی 1 پولُس ئو سیلاس اژ شیَرَل آمْفیپولیس ئو آپولونیا کِل بین ئو هاتِن اِنوم شیَر تِسالونیکی، گه اَر اورَه یِه عَبادتگا یهود بی. 2 پولُس هَراَ جورَ گه هوکارَه بی چی اِرَه عَبادتگا، اِ سه شَمَه مقدّس پِشت سر یَک اژ رُی نُسَخ مقدّس دلیلون اَرِنَ ماوِردی 3 ئو خو دسگیرَ مَهَردِنی ئو ثابتَ مَهَردی گه لازم بی مسیح عذاو بِکیشی ئو اژ مِردیَل زِنیا بو. اوءَ موئِتی: «ایی عیسی‌ی گه اِلومَ مَهَمی اَرینتو، هَراَ مسیحَسَ گه باس بای.» 4 بِری اژ اونَل ئو فِرَه کسَل اژ یونانیَل دیندار ئو بِری اژ ژِنَل سرشناس، قانی بین، ئو وَه‌گَرد پولُس ئو سیلاس بینَ یَکی. 5 مِنتائای یهودیَل حَسوئیو هات ئو قِری اَلواتون اژ بازار جیَم دا ئو دَسِه‌ئونی آوشدِ رئی گه اِنوم شیَر بِهَنَ قالِ‌قی. ئو بِرِشِن اِنوم مال یاسون تاگَه پولُس ئو سیلاس بارِن اِنوم جیَمیَت. 6 مِنتائای وخدی پولُس ئو سیلاسو نَهَردَ دی، یاسون ئو بِری‌تِر اژ بِرالو کیشی اِرَه تک حکِمرونَل شیَر ئو مَقارونو گه «ایی پیالَ گه کُل دنیائو رِشونیَسِ یَک، اِسگَه هاتِنَس اِرَه ایرَه 7 ئو یاسون اونَل بِردیَس اِرَه مال ووژ. کُل یوئنَل اَرضد فِربونَل امپراطور روم کارَ مَهَن ئو ادعاءَ مَهَن گه پاتِشای‌تِر هَس گه نُم عیسی سی.» 8 وخدی مردِم ئو حکِمرونَل شیَر یِئونَ شنَفت، تَپون اَری شویا. 9 اَسَه اژ یاسون ئو باقی، ضمونتو گِرت، آزادو کِردِن. پولُس ئو سیلاس اِنوم شیَر بیریَه 10 بِرال هِرازِه وَه شوآ، پولُس ئو سیلاسو کِل‌کِرد اِرَه شیَر بیریَه. اونَل وخدی رَسین اَر اورَه، چِن اِنوم عَبادتگا یهود. 11 یهودیَل اورَه اژ یهودیَل شیَر تِسالونیکی نجیم‌تِر بین. اونَل وَه شوقا چِنِ گِرد کلوم خدا ئو کُلِ روژی نُسَخ مقدّسو خوءَ مَحیوَن ئو سوألونَ مَهَرد تاگَه بوئینِن اِراسی هُنَسَ یاگَه نه. 12 اُهُنَ، فِرَه کسَل اژ یهودیَل ئو جیَمیَت فِرِه‌یشی اژ ژِنَل ئو پیال سرشناس یونانی ایمونو آوِرد. 13 مِنتائای وخدی یهودیَل شیَر تِسالونیکی فیَمین گه پولُس اِنوم شیَر بیریه‌یش کلوم خدا موعظَه مِهِه، چِن اِرَه اورَه ئو کارونی کِرد گه مردِم بِهَنَ گالِ‌راو. 14 بِرال هِرازِه پولُسو رِ کِرد ویرِ دریا، مِنتائای سیلاس ئو تیموتائوس مَنِن اِنوم بیریَه. 15 کسَلی گه پولُسو رَنِمونیَ مَهَرد، اوُ تاگَه شیَر آتن آوِرد، ئو دُما یَگه اَرِه سیلاس ئو تیموتائوس فِربونو گِرت گه بوشن‌ئونو هر چی زویتِر بان اِرَه تک پولُس، کَتِنِ رئی چِن. پولُس اِنوم شیَر آتن 16 حِنی گه پولُس اِنوم شیَر آتن چیَمَ‌رئی اَ دوءَ بیَ، وخدی دیتی شیَر پِر اژ بِتَ، کِزَّ جیَر هاتی. 17 اِسَه، اِنوم عَبادتگا وَه‌گَرد یهودیَل ئو یونانیَل دیندار ئو هَمیش کُلِ روژی اِنوم بازار شیَرَ گَرد کسَلی گه اَر اورَه بینَ گپ ماتی ئو دلیل ماوِردی. 18 بِری اژ فیلسوفَل مکتب اپیکوری ئو رواقی‌یش وَه‌گَرد او بَثو کِرد. بِری اژ اونَل موئِتو: «ایی چِنَه‌مِفتَ چَه میا بوشی؟» کسَلی‌تِرَ موئِتو: «مَری اَرِه خدال بیگونَه جارَ مِ.» اَرِیَگه پولُس، عیسی ئو زِنیابیئِن مِردیَل اِلومَ مَهَردی اَرینو. 19 اونَل پولُسو گِرت، ئو بِردونِ تپَه ’آریوپاگوس‘ ئو اَر اورَه وِتون‌ئون: «ماو بِذانیم گه ایی تیَلیم نووءَ گه تونَ مِین، چیَ؟ 20 اَرِیَگه قصَه‌لتَ گوش ایمَه بِلُجوئیَ مای. اِسَه میا بِذانیم گه میَنا یوئنَ چیَ.» 21 کُل مردِم آتن ئو خَریوَه‌لی گه اَر اورَه زِنِه‌یونَ مَهَرد، هُیچ کارونی ناآشد بِخِر اژ یَگه وخد ووژو بِنِن اَرِه شِنَفتِن ئو قصَه کِردِن اِبارَه عخیدَه‌ل تازَه. 22 اَسَه پولُس اِنومجا ’آریوپاگوس‘ هیزگِرتی ئو وِتی: «اِاِ پیال آتن، مِه هُمَه‌م اژ کُل لِحاظی فِرَه دیندار دیَ. 23 اَرِیَگه حِنی گه داشدِم اِنوم شیَرَ مَگیردیام ئو سِیلمَ مَهَردَ اَ چیئَه گه هُمَه مَپِرَسینو، قُرونی‌گامی کِردَ دی گه نُیسیائیتی اَررُیا: ” پیشکَش اَر خدای گه هَنی نشتاسیاءَ“. اِسگَه، اَ چیئَه گه هُمَه وَه نشتاسیا مَپِرَسینو مِه اِلومَ مَهَمی اَرینتو. 24 «خدای گه دنیا ئو هر چی گه هایت اِنوم‌اِر خَلک کِردیِ، خداون آسمون ئو زمینَ ئو لیز نِمَگِری اِنوم معبدَلی گه اِنسون آوشدیَ. 25 هَوَجَه اَر چیئی نیِ گه آمیزاءَ وَه دَسَل ووژ اَرِه دُریس کِیتی، بلکِم ووژ، ژییاین ئو هِناسی ئو کُل چیَ مِئَه کُل بشر. 26 او کُل قومَل اژ یِه اِنسو خَلک کِردی تاگَه لیز بِگِرِنِ سِرُسَر زَمی؛ ئو زمونی اَرِه مَیِّن کِردِنی ئو مرزی اَرِه جالیزو ناتی. 27 تاگَه اونَل مِنِی خدا بِهَن ئو هایتِر بِکُوئِنِ فِتِراخ ئو بِهَنیَ دی، وَه‌یاآگه اژ هُیچ کُم اژ ایمَه دویر نیَ. 28 اَرِیَگه ایمَه اِنوم او زِنِه‌ی ئو حرکت ئو وِجود دیریم؛ هُنَ گه بِری اژ شاعرَلتون‌یش وِتونَ گه ایمَه اژ نسِل اوئیمو. 29 «اِسَه گه نسِل خدایمو، نَباس فگِر کِینو گه ذات الهی چُی طِلا یاگَه نُخِرَه یاگَه بَردی کَ گه وَه هنر ئو استادکاری اِنسون وَه دائول مِجسمه‌ی تِراشیائی. 30 خدا دورَه‌ل نایونیَ نِئیَ گِرتی، مِنتائای اِسگَه فِربونَ مِئَه کُل مردِم اِ کُل جا گه توئَه کَن. 31 اَرِیَگه یِه روژی مَیِّن کِردیَسی، گه اِ اَ روژَ وَه‌سونگَ پیای گه دیاری کِردیِ، اَر دنیا وَه عدالتا داوریَ مِهِه، ئو وَه زِنیا کِردِنی اژ مِردیَل ایی حخیختَ ثابت کِردیَسی اَر کُل کس.» 32 وخدی اونَل اِبارَه زِنیابیئِن اژ مِردیَلو شنَفت، بِری ریشخَنو کِرد، مِنتائای بِری‌تِر وِتو: «مِمو اِدوارَه اِبارَه ایی چیئِلتَ اَژی بشتوئیم.» 33 اِسَه پولُس اژ اورَه کِردیَ دِریر. 34 مِنتائای بِری بینیَ مِرید ئو ایمونو آوِرد. دیونیسیوس اژ شورا ’آریوپاگوس‘، ئو ژِنِهِه گه نُم داماریس بیتی، ئو بِری‌تِریش اِنومو بین. |
@ 2024 Korpu Company