کارَل رسولَل 16 - کتاب مقدس به زبان لکی - گویش مرکزیتیموتائوسَ گَرد پولُس ئو سیلاس هُمکاریَ مِهِه 1 پولُس هات اِنوم شیَرَل دِربَه ئو لِستْرَه. اَر اورَه شاگردی بی تیموتائوس نُم، گه دای یهودی ئو ایمودار بی، مِنتائای باوِه یونانی. 2 ایمودارَل لِستْرَه ئو قونیَه تیَریفون اَژینَ مَهَرد. 3 پولُس اَرِیَگه مِهِستی تیموتائوسَ گَرد ووژ بیَری، وَه خاطر یهودیَلی گه اَر اورَه زِنِه‌یونَ مَهَرد، او ختینَه کِردی، اَرِیَگه کُلَ مَذِناسدو باوِه یونانی‌ای کَ. 4 اونَل وخدی اژ شیَری مَچیان اِرَه شیَری‌تِرِک، قانونَلی گه رسولَل ئو شیخَل اِنوم شیَر اورشلیم حکِمو کِردوئی، مَسپارتَ مردِم تاگَه بارِنونَ جا. 5 اِسَه، کلیسائَل اِنوم ایمو قویَتونَ مَگِرت ئو کُلِ روژی شِمارو ویشتِرا موئیا. رویا پولُس اِبارَه پیا مقدونی 6 اَسَه، اونَل اژ هیالَل فْریجیَه ئو غَلاطیَه کِل بین، اَرِیَگه روح‌القدس مِنا کِردِنی گه کلوم خدا بیَرن اِرَه وِلات آسیا. 7 وخدی گه رَسینَ هیال میسیَه، مِهِستو بِچِن اِرَه هیال بیطینیَه، مِنتائای روحِ عیسی صِلا نانی‌ئون. 8 اَسَه اژ میسیَه کِل بین، ئو چِن اِرَه شیَر تْروآس. 9 وَه شوآ، پولُس اِنوم رویا دیتی گه پیا مقدونی هوسیاس اَر اورَه، مَلالکِتی‌ئون گه «بوری اَرِه مقدونیَه ئو یاریمو دَ.» 10 وخدی پولُس ایی رویاءَ دیتی، هِرازِه کَتیمونِ رئی ئو چیمون اِرَه مقدونیَه، اَرِیَگه اطمینونمو داشد گه خدا هِنامو کِردیِ تاگَه خَوَر خَوش پاتِشائی خدا بِیم‌ئونو. ایمو آوِردِن لیدیَه اِنوم شیَر فیلیپی 11 اِسَه، اژ شیَر تْروآس وَه کَشتی یِه راس چیمون اِرَه شیَر ساموتْراکی ئو وَه صوایکا رَسیمون اَر شیَر نیاپولیس. 12 اژ اورَه چیمون اِرَه فیلیپی گه یَکی اژ شیَرَل مِهم اژ هیال مقدونیَه ئو مستَمرَه روم بی، ئو چَن روژ مَنیم اِنوم اَ شیَرَ. 13 اِ روژ شَمَه مقدّس ایمَه اژ دروازَه شیَر چیمونَ دِریر ئو نیشتیمون اَر لو رووئی گه گُمونمونَ مَهَرد جا دوعا کِردِنَ ئو وَه‌گَرد ژِنَلی گه جیَم بوئین اَر دور یَکا گَپمو دا. 14 اِنوم اونَل ژَن خداپِرَسی اژ شیَر تیاتیرا بی ئو گوشَ ماتی اَر قصَه‌لمو. او لیدیَه نُم بیتی ئو پارچَه‌ل گِرو کاوَ مَفِروتی. خداون قلب گُشونا تاگَه خو گوش بِگِریَ اَ چیئَه گه پولُسَ موئِتی. 15 وخدی او وَه‌گَرد هوز مالی خُسِل تیَمیدو گِرت، لالکیَ ایمَه ئو وِتی: «اَرّ زَقین دیرینو گه ایمونِم آوِردیَس اَر خداون، بورِن بِمینِن اِنوم مال مِه.» دُماخِرِ هَر بیَ قصَه او. پولُس ئو سیلاس اِنوم زندو 16 یِگِل گه مَچیایم اِرَه جای گه اَر اورَه دوعامونَ مَهَرد، کنیژی هاتَ وَرپیریمونا گه روحِ فالگیری داشدی ئو وَه طالَع گِرتِن فادَه فِرِه مَهَردیَ نَصُی اَرباوَل ووژ. 17 او مَکَتِ دُم پولُس ئو ایمَه ئو مَقارونی موئِتی: «ایی پیالَ، خادمَل خداءِ متعالِن ئو رئی نجاد اِلومَ مَهَن اَرینتو.» 18 او روژَل فِرِه هُنَ مَهَردی. دُماخِرِ پولُس دیَر طاخَت ناوِردی ئو کِلاداتیِ دُما وِتیَ اَ روحَ: «وَه نُم عیسی مسیح فِربونتَ میَم‌ئون گه اژ ایی دِتَ باینَ دِریر!» جاوارجا، روح اژ دِتَهَه هاتَ دِریر. 19 مِنتائای اَرباوَلی وخدی دییو گه دیَر امید اَر فادَه کِردِنون اِ کَسمِ‌دَرُمِه‌ئو نیَ، پولُس ئو سیلاسو گِرت ئو اونَلو کیشیَ تووسُرا، بِردِنون اَرِه بازار اَرتَک حکِمرونَل شیَر. 20 ئو اونَلو آوِرد اِرَه تک قاضیَل شیَر ئو وِتو: «ایی پیالَ یهودیِن، ئو شیَر ایمَه‌ئو رِشونیَسِ یَک. 21 اونَل رسمِ‌رِسیمَلی اِلومَ مَهَن گه قبول کِردِن ئو اَنجوم دائِنو اَرِه ایمَه گه رومیمو، جائز نیَ.» 22 مردِم‌یش هاتِن ئو وَه‌گَرد اونَل رِشیان اَر سر پولُس ئو سیلاس. قاضیَل جِنِکَلونِ وَر کَنِن، ئو فِربونو دا هَر وَه چو بیَن اَرینو. 23 وخدی اونَلو خو گُرزکو کِرد، آوشدِنون اِنوم زندو ئو فِربونو داءَ زندونبونِهَه گه خو ویر اَرینو بوتی. 24 زندونبونِهَه وخدی گه هُنَ فِربونی گِرتی، اونَل آوشدیِ سیاچال ئو پال بَسدِنیَ کُتَل داریکا. 25 نزیکَل نِصمِ شو، پولُس ئو سیلاس داشدو دوعائونَ مَهَرد ئو اَرِه خدا سروئونَ مَحیوَن ئو باقی زندونیَل‌یش گوشونَ ما، 26 وَه یِگِل بیَ زمی‌لرزَه کَلِنگی، هُنَ گه بِناوَه زندو هاتِ رِکَه ئو دِرَل زندو هِرازِه واز بین ئو زنجیرَل اژ قِ کُل زندونیَل اِراکَتِن. 27 زندونبونِهَه بیَ خَوَر، ئو وخدی دیتی گه دِرَل زندو واز بینَ، شِمشیر کیشیتی تاگَه ووژ بِکُشی، اَرِیَگه گُمونَ مَهَردی زندونیَل حِیواینَ. 28 مِنتائای پولُس وَه دَنگ کَلِنگ، وِتی: «ضِرَد اَر ووژِت نیَ گه ایمَه کُل هایمون اَر ایرَه!» 29 زندونبو چراخ‌دَسی هِستی ئو هِراسو چی اِنوم زندو ئو هَرهُنَ گه مَرِکیا، کَت اَر مِل پال پولُس ئو سیلاس. 30 اَسَه، آوِردِنیَ دِریر ئو پِرسیتی: «اِاِ آقال، چَه بِهَم تاگَه نجاد بِگِرِم؟» 31 اونَل جوواوُنا دا: «ایمو بار اَر خداون عیسی مسیح گه تون ئو عتِ‌عیالِت نجادَ مَگِرینو.» 32 اَسَه کلوم خدائون اَرِه او ئو کُل کسَلی گه اِنوم مال بینی، وِت. 33 اَ زندونبونَ هَراَ سات شوءَ پولُس ئو سیلاس آوِردیَ دِریر، زیَمَلو شوریتی، ئو هِرازِه او ئو کُل عتِ‌عیالی خُسِل تیَمیدو گِرت. 34 اَسَه زندونبونِهَه اونَل بِردی اِرَه مال ووژ ئو سِفِرَه‌ئونی اَرِه آوشدی. او ئو هَمیش کُل عتِ‌عیالی وَه خاطر یَگه ایمونو آوِردوئیَ خدا فِرَه خَوشالا بین. 35 مِنتائای وخدی روژا بی، قاضیَل مأمورَلونی کِل‌کِرد اِرَه تک زندونبونِهَه، وِتو: «اَ پیالَ آزاد کَ!» 36 زندونبونِهَه، پولُس اژ ایی پِغومَ باخَوَرا کِردی ئو وِتی: «قاضیَل فِربونو داءَ گه هُمَل آزاد کَم. اِسگَه بورنَ دِریر ئو بِچِن مِزِلتو خِر.» 37 مِنتائای پولُس جوواوا داتی، وِتی: «اونَل ایمَلو گه تبعَه رومیمو، آشگارا ئو بی‌هُیچ مِحاکمه‌ی، گُرزکو کِرد ئو آوشدون اِنوم زندو. اِسگَه میا ایمَل وَه بی‌کِشکیا باوژِنَ دِریر؟ اصِلا! بِیل ووژو بان ئو ایمَل اژ ایرَه بارنَ دِریر.» 38 مأمورَل‌یش ایی قصه‌ئونَ اَرِه قاضیَل وِتا، ئو اونَل‌یش وخدی شنَفتو پولُس ئو سیلاس تبعَه رومِن، زِلَ‌تِراقا بین 39 ئو هاتِن، عذِرخواهیون اَژی کِردِن ئو اونَلو آوِردَ دِریر، لالکین‌ئونو گه اژ شیَر بِچِنَ دِریر. 40 دُما یَگه پولُس ئو سیلاس اژ زندو هاتِنَ دِریر، چِن اِرَه مال لیدیَه. اَر اورَه بِرالو دی، دلگُوئیو دان، ئو کَتِنِ رئی چِن. |
@ 2024 Korpu Company