کارَل رسولَل 15 - کتاب مقدس به زبان لکی - گویش مرکزیشورا کلیسا شیَر اورشلیم 1 مِنتائای بِری اژ هیال یهودیَه هاتِن اِرَه هیال اَنطاکیَه ئو تیَلیم بِرالونَ ما گه: «اَرّ مِطابق رسمِ‌رِسیم موسی ختینَه نوئینو، نِمَتونینو نجاد بِگِرینو.» 2 دُما بَث ئو دَمَرَگَ سخدی گه کَت اِنوم پولُس ئو برنابا وَه‌گَرد اونَل، قِطِ‌قِرارو نا گه اَ دوءَ گَرد چَن نفرتِر اژ اونَل اَرِه ایی گپَ بِچِن اِرَه شیَر اورشلیم اِرَه تک رسولَل ئو شیخَل. 3 اِسَه کلیسا اونَل رِ کِردی تاگَه بِچِن؛ اونَل اَر نوم رئیو گه اژ شیَرَل فینیقیَه ئو سامرَه کِلَ موئیان، تیَریفونَ مَهَرد گه چطور خِرِیهودیَل ایمونو آوِرد ئو ایی خَوَرَ کُل بِرال فِرَه خَوشالا کِردی. 4 هَرَخدی رَسینَ شیَر اورشلیم، کلیسا ئو رسولَل ئو شیخَل هاتِنِ نوائو. پولُس ئو برنابا هر چی گه خدا وَه‌سونگَ اونَل اَنجوم دائیتی، تیَریفون اَرِه دان. 5 اِسگَه بِری اژ شیخَل فرقَه فَریسی گه ایمونو آوِردوئی، هیزو گِرت، وِتو: «ایی خِرِیهودیِلَ باس ختینَه بوئن ئو حکمون‌ئون دَن تاگَه شریعت موسی بارنَ جا.» 6 اَسَه رسولَل ئو شیخَل جیَم بینَ دور یَکا تاگَه وَه ایی گپَ رَسیدَگی بِهَن. 7 دُما دَمَرَگَ فِرِه، پطرس هیزگِرتی ئو وِتی‌ئونو: «اِاِ بِرال، هُمَه مَذانینو گه اِ روژَل اول، خدا مِن اِنوم هُمَه اِنتخاو کِردی تاگَه خِرِیهودیَل، اژ زوئو مِه پِغوم انجیل بشتوئِن ئو ایمو بارِن. 8 ئو خدای گه اژ دلَل خَوَر دیری، شاتی داتی‌ئونو ئو روح‌القدس دانی‌ئون، هَرهُنَ گه داتیَ ایمِه‌یش. 9 او هُیچ دوچیَمکی اِنوم ایمَه ئو اونَل نَهَردی، بلکِم وَه‌سونگَ ایمو، دلَلو پاکا کِردی. 10 اِسگَه اَرِه‌چَه خدا اِنتحونَ مِهِینو ئو دارِبرگی مَنینون اَر مِل شاگردَل گه نه ایمَه مَتونِستمو بِگِریمیِ کول، ئو نه باوَه‌جدَلمو؟ 11 اَرِیَگه ایمَه ایمو دیریم گه وَه فیض خداون عیسیَ گه نجادَ مَگِریمو، هَرهُنَ گه اُوُن‌یش.» 12 اَسَه کُل جیَمیَت بی‌کِش مَنِن ئو گوشو داءَ برنابا ئو پولُس گه داشدو نشونَه‌ل ئو مُجِزَه‌لونی تیَریفَ مَهَرد گه خدا وَه دس اونَل اِنوم خِرِیهودیَل آشگارا کِردوئیتی. 13 وخدی قصَه‌لو تموم بی، یعقوب وِتی: «اِاِ بِرال، گوش بیَن‌ِ مِه! 14 شَمعون تیَریف کِردی گه چطور خدا اَرِه گِل اول هاتِ دیار خِرِیهودیَل ئو اِنوم اونَل قومی اَرِه نُم ووژ جیاآ کِردی. 15 یَه وَه‌گَرد قصَه‌ل پِخَمَرَل جور اِرَمای، هَرهُنَ گه اِنوم کِتاو عاموسِ پِخَمَر نُیسیاءَ: 16 «”دُما یَه، گِلامیرِم ئو داوار داوودِ پاتِشا گه اِراکَتیَ، اِدوارَه اِرَمیَمی؛ کَلکَه خِراوِلِهِه اِدوارَه ماوژِم، ئو اِدوارَه اِرَمیَمی، 17 تاگَه باقی نسِل بشر کُل، اِ مِنِی خداون بوئن، کُل خِرِیهودیَلی گه نُم مِنو ها رُی. خداونی گه یَه اَنجومَ مِه، هُنَ موشی، 18 ایی چیئِلَ اژ قدیم آشگارا کِردیَسی.“ 19 «اِسَه رِأ مِه یَسَ گه نَباس کسَلی گه اژ خِرِیهودیَل گِلامیرِن ویرِ خدا باوژیمِ زیَمَت. 20 مِنتائای باس اِنوم نُامه‌ی اَرِنو بِنُیسِنیم گه اژ خوراکی گه وَه خاطر پیشکَشی اَر بِتَل نِجس بیَ، اژ بی‌عصمتی، اژ گوشد حِوونَل تاسیا ئو اژ خوین هُاردِن پیَریز کَن. 21 اَرِیَگه اژ قدیم موسی اِنوم هر شیَری کسَلی داشدیَسی گه اِبارَه او موعظَه کَن، هُنَ گه اِ هر شَمَه مقدّس نُسَخ او اِنوم عَبادتگائَل یهودَ مَحیوَنِن.» نُامَه شورا اَرِه ایمودارَل خِرِیهودی 22 اِسَه رسولَل ئو شیخَل وَه‌گَرد کُل کلیسا صِلائو دی اِنوم ووژو پیالی اِنتخاو کَن ئو اونِلَ گَرد پولُس ئو برنابا کِل‌کَن اِرَه اَنطاکیَه. اَسَه یهودا مَشور وَه بَرسابا ئو سیلاس گه اِنوم بِرال رَبَر بین، اِنتخاوُ کِرد. 23 اَسَه هُنَ نُامه‌ئونی نُیسو: «بِرالتو یانی رسولَل ئو شیخَل، سِلامَ مَهَن اَر بِرال خِرِیهودی‌ای گه هانِ اَنطاکیَه، سوریَه ئو کیلیکیَه، 24 اَرِیَگه شنَفتِمونَ بِری اژ نوم ایمَه هاتِنَ، وَه‌یاآگه ایمَه فِربونمونی‌ئون نانَ، وَه قصَه‌لو تَپون اَر هُمَه شویونیَ، ئو فگِرَل هُمِه‌ئو پریشونا کِردیَ. 25 اَسَه ایمَه یِه‌دل هُنَ صِلامو دی گه پیالی اِنتخاو کِیم ئو اونِلَ گَرد عزیزَلمو، برنابا ئو پولُس، کِلکِیم اِرَه تَکتو، 26 گه وَه خاطر نُم خداونمو عیسی مسیح، گیونو ناس اَر تَنگَه دَسو. 27 اَسَه یهودا ئو سیلاسمو کِل‌کِرد تاگَه ووژو ایی چیئِلَ زوئونی‌تون اَرِه بوشِن. 28 اَرِیَگه روح‌القدس ئو ایمَه هُنَ صِلامو دی گه بارتونیَ کولا نَنیم، بِخِر اژ ایی چیئَلی گه واجبَ: 29 اژ خوراکی گه وَه خاطر پیشکَشی اَر بِتَل نِجس بیَ، اژ هُاردِن خوین، اژ گوشد حِوونَل تاسیا ئو اژ بی‌عصمتی پیَریز کَن، اَرّ ووژتون اژ ایی چیئِلَ دویرا بِگِرینو، کارَل خوتونی اَنجوم داءَ، والسّلام.» 30 اِسَه اونَل کَتِنِ رئی، چِن اِرَه اَنطاکیَه ئو اَر اورَه کلیسائو جیَم دا اَر دور یَکا، ئو نُامِهِه‌ئو دائونو. 31 وخدی نُامِهِه‌ئو حیوَن، اژ دلگُوئی‌ای گه اِنوم اَ پِغومَ بیَ، خَوشالا بین. 32 یهودا ئو سیلاس‌یش گه نبوّت‌کَر بین، وَه قصَه‌ل فِرِه، بِرالو تشویق کِرد ئو قویَتو دان‌ئون. 33 دُما یَگه قِیلی مَنِن اَر اورَه، بِرال، اونَلو وَه سِلامتی رِ کِرد اِرَه تک کسَلی گه کِلوکِردوئین. 34 مِنتائای پولُس ئو برنابا مَنِن اِنوم اَنطاکیَه 35 ئو وَه‌گَرد آمَل فِرِه‌ی‌تِر، تیَلیمونَ ما ئو خَوَر خَوش کلوم خداونونَ ما. پولُس ئو برنابا اژ یَک جیاآ موئن 36 دُما چَنی، پولُس وِتیَ برنابا: «گِلابیریمون اِرَه شیَرَلی گه کلوم خداونمو اِلوم کِرد ئو بِچیمونِ دیار سر بِرالمو ئو بوئینیم حالو چوینَ.» 37 برنابا هِستی یوحناءِ مَشور وَه مَرقُس‌یشَ گَرد ووژو بیَری، 38 مِنتائای پولُس صِلا نِئیتی گه کسی گه اِ شیَر پامفیلیَه اونَل تَنیا هُیشتیَسی ئو تاگَه آخِرَ گَردو نَمَنیَ، وَه‌گَرد ووژو بیَرِن. 39 دَمَرَگَ سخدی کَت اِنومو هُنَ گه اژ یَکتِری جیاآ بین. برنابا، مَرقُس هیزداتی ئو اژ رئی دریا چی اِرَه وِلات قبرس؛ 40 مِنتائای پولُس، سیلاس اِنتخاو کِردی ئو کَتِ رئی ئو بِرال، اوُ سپارتَ فیض خداون. 41 پولُس اژ سوریَه ئو کیلیکیَه کِلَ موئیا ئو قویَتَ ماتیَ کلیسائَل. |
@ 2024 Korpu Company