کارَل رسولَل 13 - کتاب مقدس به زبان لکی - گویش مرکزیمأموری برنابا ئو شائول 1 اِ کلیسای گه اِنوم شیَر اَنطاکیَه بی، بِری اژ نبوّت‌کَرَل ئو مَلِمَل بین: برنابا، شَمعون مَشور وَه نیجِر، لوکیوس قیرَوانی، مَنائِن گه دَسَ بِرا هیرودیسِ پاتِشا بی ئو شائول. 2 وخدی گه اونَل داشدو خداونونَ مَپِرَسیا ئو وَه روژی بین، روح‌القدس وِتی: «برنابا ئو شائولم اَرِه جیاآ کَن، اَرِه کاری گه اونَلم اَرِه دَنگ کِردِنَ.» 3 اَسَه، دُما دوعا ئو روژی گِرتِن، دَسو نا اَر سر هَردِکو ئو اونَلو رِ کِرد. برنابا ئو شائول اِنوم جزیرَه قبرس 4 اُهُنَ، اَ دو نفرَ گه اژ جونِم روح‌القدس کِل‌بوئین، چِن اِرَه شیَر سِلوکیَه ئو اژ اورَه اژ رئی دریا رَسین اَر جزیرَه قبرس. 5 وخدی هاتِن اِنوم شیَر سَلامیس، اِنوم عَبادتگال یهود کلوم خدائو موعظَه کِرد. یوحنایش، هَر اَوَه گه مَشور وَه مَرقُس بی، وَه‌گَردو بی تاگَه یاریو دِ. 6 اونَل سِرُسَر جزیره‌ئو گیردی تاگَه رَسین اَر شیَر پافوس. اَر اورَه جادوگر ئو نبوّت‌کَر دِروزِنِ یهودی‌ای هاتَ وَرپیریو گه نُم بارْ‌یِشوعَ بیتی. 7 او اژ رِقیفَل ’سِرگیوس پولُسِ‘ والی بی. والی گه پیا دونای بی، برنابا ئو شائول هِنا کِرد اِرَه تک ووژ، اَرِیَگه مِهِستی کلوم خدا بشتوئی. 8 مِنتائای عِلوماسِ جادوگر -گه میَنا نُم عالِم بیتی- اَرضد اُوُ هیزگِرتی ئو تقِلا مَهَردی تاگَه نِیلی والی ایمو باری. 9 مِنتائای شائول، گه پولُس‌یشونَ موئِت‌ئون، پِرا بی اژ روح‌القدس، گِز کِردی اَر جادوگِرِهَه ئو وِتی: 10 «اِاِ اولاد ابلیس، اِاِ دشمنِ هر راسی، اِاِ گه پِر اژ فنِ‌فیت ئو شَرین! اَرِه‌چَه اژ هویَلا کِردِن رئیَل راس خداون دس هیزنِمِین؟ 11 اِسگَه، دس خداون هار ضد تو ئو کورَ موئین ئو تا قِیلی نِمَتونین هویَر بوئینین.» جاوارجا، کَرِّدوی ئو تیَریکی هات اَررُی جادوگِرِهَه ئو خِرَ مَهُاردی اَر دور ووژا ئو مِنِی یَکی مَهَردی تاگَه دس بِگِرتی. 12 وخدی والی ایی چیئِلَ دیتی، ایمون آوِردی، اَرِیَگه اژ تیَلیمی گه اِبارَه خداونونَ ما بِلُجوئی هاتوئیتی. پولُس ئو برنابا اِنوم اَنطاکیَه اِ پیسیدیَه 13 اَسَه پولُس ئو کسَلی گه وَه‌گَرد بینی اژ رئی دریا اژ شیَر پافوس چِن اِرَه شیَر پِرجَه پامفیلیَه. مِنتائای اَر اورَه یوحنا مَشور وَه مَرقُس اَژینو جیاآ بی ئو گِلاهُاردی اِرَه شیَر اورشلیم. 14 اونَل اژ پِرجَه کِل بین ئو رَسین اَر اَنطاکیَه اِ پیسیدیَه. اِ روژ شَمَه مقدّس، چِن اِنوم عَبادتگا یهود ئو نیشتِن. 15 دُما تورات ئو نُسَخ پِخَمَرَل حیوَنِن، رَبَرَل عَبادتگا پِغومونی رِ کِرد اَرِنو ئو وِتو: «اِاِ بِرال، اَرّ قصه‌ی اَرِه تشویق مردِم دیرینو، بوشِن.» 16 پولُس هوسیا ئو وَه دس هَشارَه کِردی، وِتی: «اِاِ پیال اسرائیلی ئو اِاِ خِرِیهودیَل خداترس، گوش بِگِرِن! 17 خداءِ هَر ایی قوم اسرائیلَ، باوَه‌ل ایمَه اِنتخاو کِردی، قوم ایمَه اِ زَمو خَریویون اِنوم وِلات مصر سربِلِنگ کِردی ئو اونَل اَررُی دس ووژا اژ اورَه آوِردیَ دِریر، 18 ئو نزیک اَر چِل سال رفدارون اِنوم بیاوو تیَمِل کِردی. 19 او هفت قومی گه اِنوم وِلات کنعان بین، نابود کِردی ئو زمینَلو کِردیَ میرات اَرِه قوم ووژ. 20 یوئنَ کُل نزیک اَر چوارصد ئو پنجا سال طویل کیشیتی. «دُما اَوَه، تا زَمو سموئیل پِخَمَر، خدا داورَلی دانی‌ئون. 21 اَسَه اونَل پاتِشائونی هِست ئو خدا شائول، کُر قِیس اژ طائفَه بنیامین دائونو گه چِل سال حکِمرونی کِردی. 22 دُما یَگه شائول هیزداتی، داوود دیاری کِردی تاگَه بوءَ پاتِشا اونَل، ئو اِبارَه او هُنَ شاتی داتی: ”مِه داوود کُر یسامَ باوِ دل ووژِم دیَسا؛ او تمومِ‌کمال خواس مِنَ ماریَ جا.“ 23 «اژ نسِل هَر ایی پیاءَ، خدا هَراَ جورَ گه وَدَه دائیتی، نجاددهندَه، یانی عیسی کِل‌کِردی اِرَه قوم اسرائیل. 24 وِر اژ یَگه عیسی بای، یحیی خُسِل تیَمید توئَه اِلوم کِردوئیتیَ کُل مردِم اسرائیل. 25 وخدی یحیی دورَه خِلمت ووژ تمومَ مَهَردی، وِتی: ”گُمونَ مِهِینو مِه کیِم؟ مِه اَوَه نیِم؛ بلکِم او دُما مِنَ مای ئو مِه جُ‌جُ لائق نیِم بَن کِلاشَل واز کَمی.“ 26 «اِاِ بِرال، اِاِ آیلَل ابراهیم، ئو اِاِ خِرِیهودیَل خداترسی گه هاینون اَر ایرَه! ایی پِغوم نجادَ اَرِه ایمَه کِل بیَ. 27 مردِم اورشلیم ئو کَلِنگَلو نه عیسی‌ئو شناسی ئو نه قصَه‌ل پِخَمَرَل گه هر شَمَه مقدّسَ مَحیوَنو، فیَمی، وَه ایی حالا وَه مَکوم کِردِنی، پیشگوئیَل پِخَمَرَلو وَه اَنجوم رَسو. 28 اونَل وَه‌یاآگه هُیچ جرمی گه سزا مِردِن بوتی اِنوم اوُ نَهَردَ دی، اژ پیلاتُسو هِست گه بِکُشتی. 29 ئو وخدی کُل اَ چیئَه گه اِبارِه‌ی نُیسیائی، اَنجومو دا، اوئن اژ صلیب آوِردَ هُار ئو نائونِ قور. 30 مِنتائای خدا او اژ مِردیَل زِنیا کِردی. 31 ئو او روژَل فِرِه ظاهر بی اَر اونَلی گه اژ هیال جلیل وَه‌گَرد هاتوئینی اِرَه اورشلیم، ئو اِسگِه‌یشَ اَرتَک قوم ایمَه شاتَل اوئِن. 32 «اِسگَه ایمَه خَوَر خَوش اَ وَدِه‌ی گه خدا دائیتیَ باوَه‌لمو، مِیم‌ئونتو، 33 گه خدا وَه زِنیا کِردِن عیسی اَرِه ایمَه گه آیلَل اونَلیم، وَه وَدَه ووژ وفا کِردی. هَرهُنَ گه اِ مزمور دوئِم نُیسیاءَ: «”تو کُر مِنین؛ ایمِروژ، مِه تونِم زاندَه کِردیَ.“ 34 «ئو خدا اِبارَه یَگه او اژ مِردیَل زِنیا کِردی تاگَه هرگِس کِرمِژِنا ناو، اِنوم نُسَخ مقدّس هُنَ وِتی: «”مِه بِرَکتَل مقدّس ئو مِطمئنی گه وَدَه‌م داسَ داوودِ پاتِشا، موئَشخِم‌ئونتو.“ 35 اَرِه یَسَ گه اِ جای‌تِریش اِنوم مزمورَ موشی: «”تو نِمِیلین قدوس ووژِت کِرمِژِنا بو.“ 36 «مِنتائای داوود دُما یَگه وَه خواس خدا خِلمت اژ مردِمَل دورَه ووژ کِردی، حیوَت ئو چیَ تُرّ باوَه‌جدَلیا، ئو لَش کِرمِژِنا بیتی. 37 مِنتائای اَوَه گه خدا اژ مِردیَل زِنیا کِرد، لَش کِرمِژِنا نوئیتی. 38 «اِسَه، اِاِ بِرال، بِذانِن گه وَه‌سونگَ هَر ایی پیاءَ، بشخِش گنائَل اِلومَ ماو اَرینتو. 39 اِسگَه وَه‌سونگَ اوآ هر کی ایمو باری، اژ کُل گنائَلی گه وَه‌سونگَ شریعت موسی نتونستِتو آزاد بوئینو، آزادَ ماو. 40 حُواستو بو ایی چیئَه گه اِنوم نُسَخ پِخَمَرَل نُیسیاءَ وَه سرتونا نای گه موشی: 41 «”سِیل کَن، اِاِ کسَلی گه تیزمَتَلَ مِهِینو، واقتونِ دَم بِپَری ئو هِلاک بوئن، اَرِیَگه مِه اِ روژِگار هُمَه کاری مَهَم، گه جُ‌جُ اَرّ یَکی اَرِنتو بوشتیا هرگِس باوارتو نِماو.“» 42 وخدی پولُس ئو برنابا اژ عَبادتگا مَچیانَ دِریر، مردِم لالکین‌ئونو گه اِ شَمَه دُماین اِبارَه ایی چیئَه قصه‌ئونَ اَرِه بِهَن. 43 دُما یَگه مردِم اژ عَبادتگا چِنَ دِریر، فِرَه کسَل اژ یهودیَل ئو مردِم دینداری گه بوئینَ یهودی، وَه دُم پولُس ئو برناباآ کَتِنِ رئی. اَ دوئیشَ هَرهُنَ گه قصه‌ئونَ گَردَ مَهَردِن تشویق‌یشونَ مَهَردِن گه بِمینِن اِنوم فیضِ خدا. 44 شَمَه دُماین، تقریباً کُل مردِم شیَر، جیَم بین تاگَه کلوم خداون بشتوئِن. 45 مِنتائای یهودیَل وخدی جیَمیَتو دی، اژ زور حَسوئی اَرضد هر چی گه پولُسَ موئِتی، هیزونَ مَگِرت ئو دُشمینونَ مائون. 46 اَسَه پولُس ئو برنابا وَه جورَتا وِتو: «لازم بی کلوم خدائو اول‌بار بوئتاءَ هُمَه. مِنتائای اَرِیَگه هُمَه رَدتو کِرد ئو ووژتون اَرِه ژییاین ابدی لائق نَذِناسد، اِسگَه مَچیمون اِرَه تک خِرِیهودیَل. 47 اَرِیَگه خداون هُنَ فرمائشت کِردیَسیَ ایمَه: «”تونِم کِردیَسَ نُیری اَرِه خِرِیهودیَل، تاگَه نجاد برَسِنینَ ایی پر تا اَ پر دنیا.“» 48 وخدی خِرِیهودیَل یِئونَ شنَفت، خَوشالا بین ئو کلوم خداونو پِرَسی؛ ئو اونَلی گه اَرِه ژییاین ابدی مَیِّن بوئین، ایمونو آوِرد. 49 هُنَ کلوم خداون اِ سِرُسَر اَ هیالَ پَشخا بی. 50 مِنتائای یهودیَل، ژِنَل دیندار ئو سرشناس ئو کَلِنگَل شیَریشو رِشونِ یَک ئو اَرضد پولُس ئو برنابا آنتریکو کِردِن تاگَه عذاوُ دَن. اِسَه پولُس ئو بِرنابائون اژ اَ هیالَ تار کِرد. 51 پولُس ئو برنابایش توز اَ شیَرونَ اژ رُی پائلو تَکو تا شاتی‌ای بو اَرضد اونَل گه خَضو خدا ما اَر سرو ئو چِن اِرَه شیَر قونیَه. 52 مِنتائای شاگردَل پِر اژ خَوشی ئو پِر اژ روح‌القدس بین. |
@ 2024 Korpu Company