کارَل رسولَل 12 - کتاب مقدس به زبان لکی - گویش مرکزییعقوبو کُشت ئو پطرس‌یشو آوشدِ زندو 1 اِ، اَ روژِلَ، هیرودیسِ پاتِشا دس کِردی اَر عذاو دائِن بِری اژ ایمودارَل کلیسا. 2 وَه فِربو او یعقوب بِرا یوحنائونَ شِمشیر کُشت. 3 ئو وخدی دیتی یهودیَل خَوشون اژ ایی کارَ هات، ویشتِر اژ یَه کِردی ئو پطرس‌یش گِرتی. اِ روژَل عِد فطیر ایی اتفاقَ کَت. 4 هیرودیس دُما گِرتِن پطرس، او آوشدیِ زندو ئو سپارتی اَر چوار دسَه چوار نفری اژ سَروازَل تاگَه اَژی قِلااوری کَنی، ئو مِهِستی دُما عِد پِسَخ، او اَر وَر چیَم مردِم مِحاکمَه کِ. 5 اَسَه پطرسو هُیشت اِنوم زندو بِمینی، مِنتائای کلیسا گُرّان اِ درگا خدا دوعا اَرِنَ مَهَرد. 6 یِه شو وِر اژ روژی گه هیرودیسَ مِهِستی پطرس مِحاکمَه کِ، پطرس وَه دو زنجیر آبوئنیائی ئو اِنومجا دو سَرواز حیوَتوئی، ئو قِلااورَل‌یش اَر وَر در زندو کِشِکونَ ما. 7 وَه یِگِل فریشدَه خداون آشگارا بی ئو نُیری کَت اِنوم زندو. فریشدَه دا اَر پیَلی پطرس ئو کِردَ خَوَر، ئو وِتی: «زوی کَ هیزگِر!» هِرازِه زنجیرَل اژ دَسَل کَتِنی‌اِرا. 8 فریشدِهَه وِتیَ پطرس: «قِئِت آبوئن ئو کِلاشَلِت بِهِه پا.» پطرس‌یش هُنَ کِردی. اَسَه فریشدِهَه وِتون: «چوخات پِلِ‌پیچ کَ اَر دور ووژِت ئو وَه دُم سر مِنا بوری.» 9 اَسَه پطرس کِردیَ دِریر ئو وَه دُم سِرا چِتی. مِنتائای باوار نِمَهَردی گه اَ چیئَه گه فریشدَه اَنجومَ مِ، راسَکونی بو، بلکِم گُمونَ مَهَردی خاوَ موئینی. 10 اونَل اژ قِلااورَل اول ئو دوئِم رد بین ئو رَسین اَر دروازَه آهِنینی گه ویرِ شیَر وازَ موئیا. دروازَه ووژ اَرِه ووژ اِ نوا رُیو واز بی. اَسَه چِنَ دِریر ئو رَسین اَر آخِر کویچَه، وَه‌یِگِل فریشدَه خِیو بی. 11 اَسَه پطرس هاتِ سر ووژ ئو وِتی: «اِسگَه دیَر زَقین داءِ دلِم گه خداون فریشدَه ووژ کِل‌کِردیَسی ئو مِن اژ چِنگ هیرودیسِ پاتِشا ئو اَ چیئَه گه قوم یهود چیَمَ‌رئی بینی، آزاد کِردیِ.» 12 وخدی گه یَه فیَمی، چی اِرَه مال مریم دا یوحنا مَشورَ مَرقُس. اَر اورَه بِری جیَم بوئین اَر دور یَکا ئو دوعائونَ مَهَرد. 13 وخدی پطرس دِراخِل مال کوئیتی، کنیژی گه نُم رودا بیتی، هات تاگَه دِرَهَه واز کِ. 14 مِنتائای وخدی دَنگ پطرس شناسیتی، اَخَ خَوشی کِردی، اِجال یَگه دِرَهَه واز کِ، وَه دو چی اِنوم ئو خَوَر داتی: «پطرس هوسیاس اَر پِشت دِراخِل!» 15 وِتون‌ئون: «مَر لیوَه بینَ؟» مِنتائای وخدی دییو هَر هار سر اَ قصَه، وِتو: «هایتِر فریشدَه‌سی.» 16 مِنتائای پطرس رِم در گِرتوئیتی ئو وخدی دِرِهَه‌ئو واز کِرد، اوُ دی ئو واقونِ دَم پَری. 17 پطرس وَه دس هَشارَه کِردی‌ئونو تاگَه بی‌کِش بِمینِن، اَرِنو تیَریف کِردی گه چطور خداون او اژ زندون آوِردیَسیَ دِریر. اَسَه وِتی: «یعقوب ئو بِرالی‌تِریش اژ ایی اتفاقَ باخَوَرا کَن.» اَسَه چی اِرَه جای‌تِر. 18 وخدی روژا بی، اِنوم سَروازَل بیَ قالِ‌راو گه چَه اَر سر پطرس هاتیَ. 19 هیرودیسِ پاتِشا وخدی مِنِی پطرس کِردی ئو نَهَردَ دی اژ قِلااورَل بازخواس کِردی ئو فِربو داتی تاگَه بِکُشِنو. اَسَه هیرودیس اژ هیال یهودیَه چی اِرَه هیال قیصریَه ئو قِری مَن اَر اورَه. مِردِن هیرودیسِ پاتِشا 20 هیرودیس خِض گِرتوئی اَر مردِم شیَر صور ئو صِیدون. اَسَه مردِم اَرِیَگه خوراک ئو روژی مملکتون اژ وِلات هیرودیسَ مَگِرت، یِه‌دل اَرِه دوسی کِردِن، هاتن اِرَه خِلمت پاتِشا. ئو بْلاستوس، پیشکار شائیشو کِردوئیَ هُم‌دَس ووژو. 21 اِ روژی گه مَیِّنو کِردوئی، هیرودیس چوخا شاهی کِردیِ وَر، ئو نیشت اَر سر تخت ئو اَرِه مردِم سخنرانی کِردی. 22 مردِم قارونو: «یَه دَنگ خداءَ، نه دَنگ آمیزاءَ!» 23 جاوارجا، فریشدَه خداون دا اَری، اَرِیَگه خدا جِلال نائیتی. اَسَه کِرمَل لَشو هُارد ئو مِرد. 24 مِنتائای کلوم خدا ویشتِرِ ویشتِر پَشخا موئیا. 25 وخدی برنابا ئو شائول مأموری ووژو تموم کِرد، اژ اورشلیم گِلوناهُارد ئو یوحناءِ مَشور وَه مَرقُس‌یشونَ گَرد ووژو آوِرد. |
@ 2024 Korpu Company