کارَل رسولَل 11 - کتاب مقدس به زبان لکی - گویش مرکزیلاپِرت پطرس وَه کلیسا 1 رسولَل ئو بِرال اِنوم سِرُسَر هیال یهودیَه شنَفتو خِرِیهودیَل‌یش چِنَسِ گِرد کلوم خدا. 2 اَسَه وخدی پطرس گِلاهُاردی اِرَه شیَر اورشلیم، طرفدارَل ختینَه ایرادون اَژی گِرت، وِتو: 3 «تو چین اِرَه تک پیالی گه ختینَه نوئینَ ئو خوراکتَ گَرد هُاردِن!» 4 پطرس بِنیا ناتی اَر تیَریف کِردِن کُل ماجِرا، وِتی: 5 «مِن اِنوم شیَر یافا داشدِم دوعامَ مَهَرد گه اِنوم رویام دی چیئی اِجور سِفِرَه کَلِنگی گه اژ چوار سویکا دُرّاِرا بوئی، اژ آسمو هاتَ هُار ئو رَسیَ مِه. 6 وخدی خو سِیلِم کِرد، چوارپائَل ئو حِوونَل وَشی ئو جونورَلی گه وَه ژیر لَما سُرَ مَگِرِن ئو مَلَل آسمونمَ اَرسرا دی. 7 اَسَه دَنگمی شنَفت گه موئِتی: ”پطرس، هیزگِر، سِرا بُئِر ئو بیر.“ 8 «مِنتائای مِه وِتِم: ”حاشا اژ مِه، خداون، اَرِیَگه هرگِس دَمِم نَنیاس اَر چی حروم یاگَه نِجسی.“ 9 «گِل دوئِم دَنگی اژ آسمو یِهات گه ”اَ چیئَه گه خدا پاک کِردیِ، تو نوش نِجسَ.“ 10 سه گِل ایی اتفاقَ کَت ئو کُل اونَل اِدوارَه ویرِ آسمو بَریان. 11 «هَراَ وخدَ، سه نفر گه اژ شیَر قیصریَه کِل‌بوئین اِرَه تک مِه، رَسین اَر مالی گه مِن اِنوم بیمی. 12 روحِ خدا وِتی‌ئونِم گه بِچمَ گَردو ئو چِرچِ دلِم نیَرم. ایی شَش بِرا‌یشَ هاتِنَ گَردِم، ئو ایمَه چیمونَ نوم مال اَ پیاآ. 13 او اَرِه ایمَه تیَریف کِردی گه چطور اِنوم مال ووژ فریشدِه‌ی دیَسی گه وِتیَس‌ئون: ”کسَلی کِل‌کَ اِرَه شیَر یافا ئو شَمعون مَشور وَه پطرس بار اِرَه ایرَه. 14 او پِغومتی‌ئون اِلومَ مِهِه گه وَه‌سونگَ اَوَه تون ئو کُل عتِ‌عیالِت نجادَ مَگِرینو.“ 15 «هَریَگه بِنیام نا اَر قصَه کِردِن، روح‌القدس رِشیا اَر سرون‌اِرا، هَرهُنَ گه گِل اول رِشیائی اَر سر ایمِه‌اِرا. 16 اَسَه قصَه خداونِم آوِردَ ویر گه وِتوئیتی: ”یحیی وَه آو خُسِل تیَمید داتی مِنتائای هُمَه وَه روح‌القدس تیَمیدَ مَگِرینو.“ 17 اِسَه اَرّ خدا هَراَ عطاءَ دائونو گه وخدی ایمَه ایمونمو آوِرد اَر عیسی مسیحِ خداون، دائونمو، ایلَهَه مِه کیِم گه نوا کار خدا بِگِرِم؟» 18 اونَل وخدی ایی قصَه‌لونَ شنَفت، دیَر کِشو نَهَرد ئو خدائو پِرَسی، وِتو: «اِراسی خدا مِجال توئِه‌ی گه ژییاینَ موئَشخی داسیَ خِرِیهودیَل‌یش!» کلیسا اَنطاکیَه 19 ئو اونَلی گه وَه خاطر عذاوَلی گه اِنوم ماجِرا استیفان بِنیا نیریائی، اژ یَک چویچیائین تا هیالَل فینیقیَه ئو قبرس ئو اَنطاکیَه چِن. اونَل کلوم خدائونَ هُیچ کس بِخِر اژ یهودیَل نِموئت. 20 مِنتائای اِنوم اونَل چَن نفر اژ مردِم قبرس ئو قیرَوان بین گه وخدی رَسین اَر اَنطاکیَه، وَه‌گَرد یونانیَل‌یش قصه‌ئو کِرد ئو خَوَر خَوش عیسی خداونو اِلوم کِرد اَرِنو. 21 دس خداون‌یشَ گَردو بی ئو فِرَه کسَل اژ مردِم ایمونو آوِرد، رُیو آوِرد اَر خداون. 22 وخدی ایی لاپِرتَ رَسیَ کلیسا اورشلیم، اونَل برنابائو کِل‌کِرد اِرَه اَنطاکیَه. 23 وخدی برنابا رَسی اَر اورَه ئو فیض خدا دیتی، خَوشالا بی ئو کُل تشویق کِردِنی تاگَه وَه تمومِ دل وفادار بِمینِن اَر خداون، 24 اَرِیَگه پیا خاصی بی ئو پِر اژ روح‌القدس بی ئو ایمو فِرِه داشدی. اَسَه مردِم فِرِه ایمونو آوِرد اَر خداون. 25 برنابا چی اِرَه شیَر تارسوس تاگَه سولُس بِهِئَه دی. 26 ئو وخدی دیا، او آوِردی اِرَه اَنطاکیَه ئو یِه سال تموم اَر اورَه اِنوم کلیسا جیَمَ موئیان ئو مردِم فِرِه‌ئونی تیَلیمَ ما. اِنوم اَنطاکیَه بی گه اَرِه گِل اول وِتونَ شاگردَل ’مسیحی‘. 27 اِ، اَ روژِلَ چَن نبوّت‌کَر اژ شیَر اورشلیم هاتن اِرَه اَنطاکیَه. 28 یَکی اَژینو گه نُم آگابوس بیتی، هیزگِرتی وَه‌سونگَ روحِ خدا پیشگوئی کِردی گه قیَطی سخدی کُل دنیا اِرامَگِری. اِ زَمو امپراطور روم کْلودیوس ایی قیَطیَ کَت. 29 اَسَه شاگردَل قَصو کِرد هر کُم اَخَ گه اژ دَسون اِرَمای، اَرِه بِرالی گه هانِ یهودیه‌اِر یاری کِل‌کَن. 30 دُماخِرِ هُنِئونَ کِرد ئو پیشکَشیِهَه‌ئونَ دس برنابا ئو سولُس کِل‌کِرد اِرَه تک شیخَل. |
@ 2024 Korpu Company