سِئِم یوحنا 1 - کتاب مقدس به زبان لکی - گویش مرکزی

¹ اژ جونِم مِنِ ریش‌اَسبی، وَه گایوس عزیز گه اِنوم ’حخیخت‘ دوس دیرِمی.

² اِاِ عزیزِم، دوعا مَهَم گه خدا راس اِ کارِت باری ئو سِلامت بوئین، هَراَ جورَ گه گیونِت سِلامتَ.

³ اَرِیَگه وخدی بِری اژ بِرال هاتِن، ئو شاتیو دا گه وَه حخیخت وفادارین، فِرَه خَوشالا بیم گه اِراسی هُنَ اِنوم حخیخت زِنِه‌یَ مِهِین.

⁴ هُیچی ویشتِر اژ یَه مِه خَوشالا نِمِهِه گه بشتوئِم آیلَلِم اِنوم ’حخیخت‘ زِنِه‌یَ مَهَن.

⁵ اِاِ عزیزِم، کُل کارَلی گه اَرِه بِرال، مصقوصاً اونَلی گه بیگونَه‌ن مِهِین، وَه وفاداری اَنجومَ مِین.

⁶ اُوُن‌یش اَرتَک کلیسا اَر مِحبت تو شاتیو داءَ؛ اِسَه کار خوئی مِهِین اَرّ اَجورَ گه لائق خداءَ، اونَل اَرِه سفر رِ کِین،

⁷ اَرِیَگه اونَ وَه خاطر نُم او چِنَسَ سفر ئو اژ خِرِیهودیَل، چیئونی نَگِرتیَ.

⁸ اِسَه ایمَه باس پِشت هُنَ کسَلی بِگِریم تاگَه اَرِه حخیخت بوئیمونَ هُمکارو.

⁹ چیمی نُیسونیَ اَرِه کلیسا، مِنتائای دیوتْرِفیس گه دوس دیری ووژ هِرِ اول بو، نِمَچوءِ گِرد قدِرت‌واختیار ایمَه.

¹⁰ اِسَه اَرّ بام اِرَه تَکتو، کارَلی گه اَنجومَ مِ ئو چِنَه‌ل مِفتی گه اَرضد ایمَه موشی اَرِنتو تیَریفَ مَهَم. ئو وَه یوئیشَ قانی نیَ، بِرال اِگِرد نِمِیلی ئو نوا کسَلی‌شی مَگِری گه میا رئی بیَنَ بِرال ئو اژ کلیسا ماوژیونَ دِریر.

¹¹ اِاِ عزیزِم، گَنیَ سرمقش ووژِت نِهَه بلکِم اژ خوئی سرمقشا بِگِر؛ کسی گه خوئیَ مِهِه، اژ خداءَ، آم گَنَ‌کار هرگِس خدا نِئیَسی.

¹² مردِم کُل ئو جُ‌جُ خود حخیخت‌یش اَر دیمیتریوس شاتی خوءَ میَن. ایمِه‌یش شاتیَ مِیم ئو مَذانین گه شاتی ایمَه راسَ.

¹³ چیئَل فِرَه‌می داشد گه اَرِنِت بِنُیسِنِم، مِنتائای نِمِم وَه قِلم ئو جوهر بِنُیسِنِم.

¹⁴ مِنتائای امیدَوارِم وَه ایی زویَ بوئینمِت ئو اِ ویراَرویر وَه‌گَرد یَک قصَه بِهِیم.

¹⁵ سِلامت بوئین! رِقیفَل سِلامت‌ئونَ مَرَسِنِن. سِلام برَسِنَ یَک‌یَک رِقیفَل.