دوئِم تیموتائوس 4 - کتاب مقدس به زبان لکی - گویش مرکزی1 اَرتَک خدا ئو مسیحْ عیسی گه اَر مِردیَل ئو زِنیَل داوریَ مِهِه ئو وَه خاطر پاتِشائی ئو ظاهربیئِنی، اَمونَتتَ میَمَ بی 2 کلوم خدا موعظَه کَ ئو وخد ئو بی‌وخد آمادَه بو ئو وَه صبِر ئو تیَلیم کامل، رَنِمائی ئو توبیخ ئو تشویق بِهَه. 3 اَرِیَگه زمونی مای گه مردِم تیَمِل شنَفتِن کلوم دُریس نِرِن، بلکِم بِری مَلِم جیَمَ مَهَن اَر دور ووژو گه اَ چیئَه گه گوشَلونَ مِیتی ئو مِطابق هُواوهوسَلونَ، بشتوئِن؛ 4 ئو اژ گوش گِرتِن وَه حخیخت اِرَمَگیردِن ئو ویرِ پاچائَلَ مَچِن. 5 مِنتائای تو هَر هوشیار بو، سخدیَل تیَمِل بِهَه، کار اِلوم انجیل اَنجوم دَ، ئو خِلمت ووژِت تمومِ‌کمال برَسِنَ آخِر. 6 اَرِیَگه خوین مِه هَراِسگَه اِجور پیشکَشی شِراو، دیری مَرِشی‌اِرا ئو وخد چیئِنِم اژ ایی دنیاءَ رَسیَ. 7 اِ جنگ خو، جنگِم کِردیَ، دور ووژِم رَسونِمَسَ آخِر ئو هوسیامَس اَر سر ایمونِم. 8 اَژیرِ دُما تاج صالح‌بیئین اَرِنِم آماده‌ءَ، تاجی گه خداون، اَ داور عادلَ، اِ اَ روژَ موئَشخِتیَ مِه -نه فَخَد وَه مِه بلکِم وَه کُل کسَلی گه وَه دارا بینَ اَرِه ظاهربیئِنی. اَمونَتَل آخِر 9 تقِلا بِهَه تا زویتِر باین اَرِه تَکِم. 10 اَرِیَگه دیماس وَه خاطر دوس داشدِن ایی دنیاءَ مِه وِل کِردیِ چیَس اَرِه تِسالونیکی. کْریسکیس چیَس اَرِه غَلاطیَه ئو تیتوس‌یش اَرِه دَلماتیَه. 11 فَخَد لوقا ها گَرد مِه. مَرقُس هیزدَ ئو بارَ گَرد ووژِت، اَرِیَگه اِ خِلمتِم فِرَه وَه کارمَ مای. 12 تیخیکوسِم کِل‌کِرد اَرِه اَفِسُس. 13 وخدی هاتین، چوخای گه اِ تْروآس اَرتَک کارپوسِم هُیشتَ جا، بارَ گَرد ووژِت، ئو هَمیش کِتاوَلِم ئو مصخوصاً طومارَل. 14 اسکندر مسگر، گَنی فِرِه‌ی کِردی اَرینِم. خداون مِطابق کارَلی سزاءَ مِیتی. 15 تونیش اژ او دویرا بِگِر، اَرِیَگه فِرَه اَرضد پِغوم ایمِئَه. 16 اِ اول دَفاع مِه، هُیچ کس پِشتِم نَگِرتی بلکِم کُل مِنو وِل کِرد. ناخواد یَه بِنِری اَر حساوُ. 17 مِنتائای خداون هوسیا اَر لِف مِه ئو قویَت داتیَ مِه تاگَه کلوم خدا وَه‌سونگَ مِه تمومِ‌کمال اِلوم بو ئو کُل خِرِیهودیَل بشتوئِنی. اِسَه اژ دَم شیر اِرچِم. 18 خداون هر کار شرَباری اژ مِنَ ماوژیِ لا ئو مِه وَه سِلامتَ ماریَ پاتِشائی آسمونی ووژ. جِلال اَر او بو تا ابد ئو تا ابد. آمین! سِلامَل آخِر 19 سِلام مِه برَسِنَ پْریسکیلا ئو آکیلا ئو هوز اونیسیفوروس. 20 اِراستوس مَن اَر قُرَنتُس، ئو مِه تْروفیموسِم گه مریض بی، اِ میلیتوس هُیشت اَر جا. 21 تقِلا بِهَه وِر اژ زِمِسو برَسین اَر ایرَه. یوبولوس سِلامتَ بین مَرَسِنی، هَمیش پودِنْس، لینوس، کْلودیا ئو کُل بِرال. 22 خداونَ گَرد روحِ تو بو. فیضَ گَرد تو بو. |
@ 2024 Korpu Company