دوئِم تیموتائوس 2 - کتاب مقدس به زبان لکی - گویش مرکزی

سَرواز خو مسیح

¹ اِسَه تو اِاِ کُرِم، وَه فیضی گه ها نوم مسیحْ عیسی‌اِر قویَت بِگِر،

² ئو اَ چیئَه گه اَرتَک شاتَل فِرِه‌ی اژ مِنِت شنَفتیَ، بسپارتیَ آمَل وفاداری گه مَتونِن یاء باقی‌ش دَن.

³ اِجور سَرواز خو مسیحْ عیسی، اِ عذاوَل طاختِت داشدوئی.

⁴ هُیچ سروازی موقَع خِلمت، ووژ گرفدار کارَل زِنِه‌ی نِمِهِه، اَرِیَگه ها دُم یَه‌آ گه وَه دل کسی بو گه او گِرتیَسیَ خِلمت.

⁵ هَمیش ورزشگاری گه مِسابقَه مِ تاج قَرَمانی نِماریَ دس، مَر یَگه مِطابق قانونَل اَوَه مِسابقَه دائیتی.

⁶ کشاورزی گه جُورَ مَکیشی باس اول کسی بو گه بیَر ووژ اژ ثمر، هیزَمِ.

⁷ وَه اَ چیئَه گه موشِم فگِر بِهَه، اَرِیَگه خداون فیَم کُل چیتَ مِئَه بی.

⁸ عیسی مسیح بارِ ویر، گه اژ نسِل داوود بی ئو اژ مِردیَل زِنیا بی، هَرهُنَ گه انجیل مِنَ موشِتی،

⁹ وَه خاطر اَوَه‌‌سَ گه عذاوَ مَکیشِم، هُنَ گه اِجور جنائَتکاری هامِ زنجیراِر. مِنتائای کلوم خدا اِ زنجیر نیَ.

¹⁰ اِسَه مِه کُل چی وَه خاطر کسَلی گه دیاری بینَ تیَمِلَ مَهَم تاگَه اون‌یش نجادی‌ گه ها نوم مسیحْ عیسی‌اِر، وَه‌گَرد جِلال ابدی بارِنَ دس.

¹¹ ایی قصَه ماو اِتِمادَ بی کِینی گه: اَرّ وَه‌گَرد او مِردیم، وَه‌گَرد اویش زِنِه‌یَ مِهِیم.

¹² اَرّ تیَمِل بِهِیم، وَه‌گَرد او سِلطنت‌یشَ مِهِیم. اَرّ حاشا کِیمی اویش حاشامونَ مِهِه.

¹³ اَرّ بی‌وفا بوئیم، او وفادارَ مَمینی، اَرِیَگه نِمَتونی ووژ حاشا بِهِه.

¹⁴ یوئنِئونَ بارَ ویر ئو اَرتَک خدا هُشتارَ بینو دَ گه اَر سر کِلمَه‌ل دَمَرَگَ نَهَن، گه ثمری بِخِر اژ نابودی کسَلی گه مَشتوئِنی نِری.

¹⁵ تقِلا ووژِت بِهَه گه وَه دل خدا بوئین، اِجور عمِلِه‌ی گه دلیلی اَرِه خجالت نِری ئو کلوم حخیخت وَه دُریسَ میَریَ کار.

¹⁶ مِنتائای اژ چِنَه مِفت دائِن دویرا بِگِر، اَرِیَگه ویشتِرِ ویشتِر مردِمَ میَری ویرِ بی‌دینی.

¹⁷ تیَلیمو اِجور مِرَض قانقاریا پَشخا ماو. هیمِنائوس ئو فیلِتوس اژ ایی دَسَه‌نَ.

¹⁸ گه اژ حخیخت اِرگیردینَ ئو موشِن زِنیا بیئِن اژ مِردیَل هَراِسگِه‌یشَ اتفاق کَتیَ، ئو دیرِن بِری اژ ایمونَ ماوژِن.

¹⁹ وَه ایی حالا بِناوَه موکَمی گه خدا ناسی، پایارَ ئو هُنَ میر بیَ گه: «خداون کسَل ووژَ مَشتاسی،» ئو «هر کی نُم خداون باریَ زوئو باس اژ نادُریسی دویرا بِگِری.»

²⁰ اِسگَه اِنوم مال کَلِنگی فَخَد حاجَتَل طِلا ئو نُخِرَه نیَ بلکِم چوئین ئو گِلین‌یش هَس؛ قِری اَرِه عزّت نائنَ مانَ کار، قِری اَرِه کارَل وَردَسی.

²¹ اِسَه اَرّ کسی ووژ اژ ایی چیئِلَ پاک بِیلی، حاجتی کَ گه اَرِه عزّت نائنَ ماءَ کار، حاجت فادَه‌دار ئو مقدّسی اَرِه صائای‌مال ئو آمادَه اَرِه هر کار خوئی.

²² اِسَه اژ هُواوهوس جِهالی بِحوا، ئو وَه‌گَرد اونَلی گه وَه دل پاک هِنا مَهَن اَر خداون، وَه دُم صالح‌بیئین، ایمو، مِحبت ئو صُئلا بو.

²³ اژ بَثَلی گه اژ نایونی ئو اَخمَخیِن دویرا بِگِر، اَرِیَگه مَذانین باعث مِرافَه‌لَ موئن.

²⁴ خادم خداون نَباس مِرافَه بِهِه بلکِم باس وَه‌گَرد کُل کس مِرِبو بو، بتونی تیَلیم بِ، ئو وَه صبِر گَنی تیَمِل کِ.

²⁵ باس کسَلی گه اَرضدِنی وَه مِلائمت رَنِمائی کِ، هایتِر خدا صِلا توئَه بوئَشخیَ بینو تاگَه حخیخت بشتاسِن

²⁶ ئو بانَ سر ووژو ئو اژ تِلَه ابلیس بِحوان گه اونَل اسیر کِردیِ گه خواس او بارِنَ جا.