دوئِم تیموتائوس 1 - کتاب مقدس به زبان لکی - گویش مرکزی

¹ اژ پولُس گه وَه خواس خدا ئو وَه خاطر وَدَه ژییاینی گه ها نوم مسیحْ عیسی‌اِر، رسول مسیحْ عیسیَ.

² وَه آویل عزیزگرامیم، تیموتائوس: فیض ئو ریَمَت ئو سِلامتی اژ جونِم خداءِ باوَه ئو خداونمو مسیحْ عیسی اَر تو بو.

تشویق اَر وفاداری

³ وخدی شو ئو روژ یِمِجو تون اِ دوعائَلمَ مارِمِ ویر، شگِر خداءَ مَهَم، خدای گه مِن‌یش اِجور اَژدادِم وَه وِژدان پِرچِ‌پاک خِلمتَ مَهَمی اَری.

⁴ وخدی اَسِرَل تونَ مارِمَ ویر، آواخدِم یَسَ بوئینمِت، تاگَه پِرا بوئم اژ خَوشی.

⁵ ایمو پِرچِ‌پاک تونَ مارِمَ ویر، ایمونی گه اول‌بار لیز گِرتوئی اِنوم داکَلِنگِهَت لوئیس ئو اَسَه اِنوم دات یونیکی، ئو اِسگَه لیز گِرتیَس اِنوم تونیش.

⁶ وَه ایی خاطرَ مارِمَ ویرِت گه اَ عطا خدا گه وَه‌سونگَ دس نائن مِن اَرسر تو، ها نومت‌اِر گُرا کِین.

⁷ اَرِیَگه خدا روح ترس نَبَشخیَسیَ ایمَه بلکِم روح قدِرت ئو مِحبت ئو نوا ووژ گِرتِن.

⁸ اِسَه اژ شاتی دائِن اَر خداون ایمَه عارِت نای ئو اژ مِن‌یش گه وَه خاطر او هامِ زندون‌اِر، بلکِم تونیش وَه قدِرت خدا اِ عذاو کیشین وَه خاطر انجیل شریک بو.

⁹ خدای گه ایمَه نجاد داتی ئو دَوَتمو کِردیَ زِنِه‌ی مقدّس، نه وَه خاطر کارَل ایمَه بلکِم وَه خاطر قَص ئو فیض ووژ، گه او وِر اژ بِنیا زمونَه‌ل، اِنوم مسیحْ عیسی بَشخیتیَ ایمَه.

¹⁰ ئو اِسگَه وَه‌سونگَ ظاهربیئِن نجاددهندَه‌مو مسیحْ عیسی، کَتیَسِ در- او گه وَه‌سونگَ انجیل مرگ اژ بِن بِردی ئو زِنِه‌ی ئو ژییاین ابدی آشگار کِردی،

¹¹ ئو مِه اَرِه ایی انجیلَ مَیِّن بیم تاگَه موعظَه‌کَر ئو رسول ئو مَلِم بوئمی.

¹² اَژونَسَ گه هُنَ عذاویشَ مَکیشِم، مِنتائای عارِم نِمای، اَرِیَگه مَذانِم ایمونِم آوِردیَس اَر کی ئو اطمینو دیرِم گه اوءَ مَتونی اَ چیئَه گه سپارتیاسَ مِه، تا اَ روژَ حفظ کِ.

¹³ اِنوم ایمون ئو مِحبتی گه ها نوم مسیحْ عیسی‌اِر، سفدِسخد بچسب اَر اَ چیئَه گه اژ مِنِت شنَفتیَ اِجور سرمقش تیَلیم دُریسی.

¹⁴ وَه‌سونگَ روح‌القدس گه لیز گِرتیَس اِنوم ایمَه، اَ اَمونت خوءَ گه سپارتیاسَ بینِت، حفظ کَ.

¹⁵ خَوَر دیرین گه کسَلی گه هانِ هیال آسیااِر کُل رُیون اژ مِن اِرپِلونیَ، اِنوم اونَ فیگِلوس ئو هِرموگِنِس‌یش هَن.

¹⁶ ریَمَت خداون اَر عتِ‌عیال اونیسیفوروس، اَرِیَگه او چَن گِل گیو مِه تازه‌آ کِردی ئو اژ زنجیرَلِم عار ناهاتی.

¹⁷ بلکِم وخدی هات اَرِه روم، فِرَه مِنِی مِه کِردی تاگَه کِردمیَ دی.

¹⁸ خداون بوئَشخِتیَ بی گه اِ اَ روژَ اژ جونِم خداون ریَمَت بوتی اَری. تو ووژِت اژ خِلمتَل او اِ شیَر اَفِسُس خو خَوَر دیرین.