دوئِم تِسالونیکیَل 3 - کتاب مقدس به زبان لکی - گویش مرکزیدوعامون اَرِه بِهَن 1 دُماخِرِ، اِاِ بِرال، دوعامون اَرِه بِهَن تا کلوم خداون زوی پَشخا بو ئو قُرپ بِگِری، حَقات اَجورَ گه اِنوم هُمَه بی، 2 ئو تاگَه اژ چِنگ آمَل شرَبار ئو گَن نجاد بِگِریم، اَرِیَگه کُل مردِم ایمو نِرِن. 3 مِنتائای خداون اَمونتدارَ؛ او پایارتونَ مِهِه ئو اژ اَ شریرَ حفظتونَ مِهِه. 4 ایمَه اِنوم خداون اطمینونتونَ بی دیریم گه اَ چیئَه گه ایمَه حکمَ مِهِیمَ اَرینتو، دیرینو مارینون‌َ جا ئو هَمیش مارینون‌َ جا. 5 خداون دلَلتو هدائَت بِهِئَه مِحبت خدا ئو دَرین‌داری مسیح. هُشتار وَه تَمَلَل 6 اِسگَه اِاِ بِرال، وَه نُم خداون عیسی مسیح حکمَ مِهِیم اَرینتو گه اژ هر بِرای گه تَمَلیَ مِهِه ئو مِطابق تیَلیمی گه اژ ایمَه‌تو گِرتیَ رفدار نِمِهِه، دویرا بِگِرِن. 7 اَرِیَگه ووژتونَ مَذانینو گه باس چطور اژ ایمَه سرمقشا بِگِرینو. اَرِیَگه زمونی گه ایمَه وَه‌گَردتو بیمو، تَمَل نوئیمو. 8 ئو نُو کَسمونَ مِفت نَهُارد، بلکِم شو ئو روژ کارمو کِرد ئو زیَمَتمو کیشی تا باری اَر کول هُیچ‌کُمتو نوئیمو. 9 نه وَه خاطر یَگه هُنَ حَخی نِریم، بلکِم مِهِستمو اژ ووژمو نمونَه‌تونَ بی دِیم تا سرمقشا بِگِرینو. 10 اَرِیَگه جُ‌جُ زمونی گه وَه‌گَردتو بیمو ایی حکممونَ داءَ بینتو گه «اَرّ کسی نِمِیتی کار بِهِه، نون‌یش نیری.» 11 اَرِیَگه شنَفتِمونَ بِری اِنوم هُمَل تَمَلیَ مَهَن، کار نِمَهَن، بلکِم اِ کارَل کسَلی‌تِر فِضولیَ مَهَن. 12 اِسَه وَه نُم خداون عیسی مسیح حکمَ مِهِیم اَر هُنَ کسَلی ئو پَنونَ مِیم گه بی‌کِش کار بِهَن ئو روژی ووژون اِربارِن. 13 ئو مِنتائای هُمَه اِاِ بِرال، هرگِس اژ خوئی کِردِن شَکَت نوئن. 14 اَرّ کسی اژ چیئی گه ایمَه اِنوم ایی نُامَه موشیم اطاعت نِهِه، دیاری بِهَنی ئو قطِ خدافظی کَنی تا خجالتا بو. 15 مِنتائای وَه دشمن نَذانِنی، بلکِم اِجور بِرا هُشتار دَنی. دوعا خِر 16 اِسگَه خداونِ سِلامتی، ووژ هَرِ کُل لِحاظی سِلامتیتونَ بی دِ. خداون وَه‌گَرد کُلتو بو. 17 مِه، پولُس، وَه خط ووژِم ایی سِلامَ مَنُیسونِم. یَه نشونَه مصخوص کُل نُامَه‌ل مِنَ. مِه هُنَ مَنُیسونِم. 18 فیض خداونمو عیسی مسیح وَه‌گَردتو بو. |
@ 2024 Korpu Company