دوئِم تِسالونیکیَل 2 - کتاب مقدس به زبان لکی - گویش مرکزیپیا بی‌دین 1 اِاِ بِرال، اِبارَه هاتِن خداونمو عیسی مسیح ئو جیَم بیئِنمون اَرتک او، خواهشد اَژینتونَ مِهِیم، 2 زوی فگِرتو اژ یَک نَچویچی ئو هولتون اِرانَگِری، چه اژ یِه روح چه اژ قصه‌ی، چه اژ نُامه‌ی گه هَماری اژ جونِم ایمِئَه گه موشی هِرازِه روژ گِلاهُاردِن خداون رَسیَ. 3 نِیلِن هُیچ‌کس وَه هُیچ رئی‌ای فَنتو دِ. اَرِیَگه تا اول‌بار ناوَ گالِ‌راو اَرضد خدا ئو اَ پیا بی‌دینَ گه کُر هِلاکتَ ظاهر ناو، اَ روژَ نِمای. 4 او اَرضد هرچی گه خدا هِناءَ ماو ئو مَپِرَسِنی هیزَمَگِری ئو ووژَ مَنی اَر بِلِنگ‌تِر اژ اونَل، تا جای گه مَنیشی اِنوم معبد خدا ئو اِلومَ مِهِه گه ووژ خداءَ. 5 مَرَ ویرتو نِمای وخدی هَنی وَه‌گَردتو بیم یوئنَمَ وِتَ بینتو؟ 6 هُمَه مَذانینو گه اِسگَه چَه نوا مَگِرِتی ئو باعثَ ماو گه اِ وخد ووژ ظاهر بو، 7 اَرِیَگه راز بی‌دینی هَراِسگِه‌یشَ دیری کارَ مِهِه، فَخَد تا وخدی گه اَوَه گه اِسگَه نواءَ مَگِرتی، بِ اِلا. 8 اَسَه اَ بی‌دینَ ظاهرَ ماو، گه خداون عیسی وَه حَفار دَم ووژ نابودَ مِهِیتی ئو وَه بِریقَه ظاهربیئِن هاتِن ووژ ریشی اِرَمارِتی. 9 هاتِن اَ بی‌دینَ وَه‌سونگَ کار شِطونَ ئو وَه تموم قویَت ئو مُجِزَه‌ل ئو نشونَه‌ل بِلُجوئی گه آم اژ رئی اِرَماری، 10 ئو وَه‌گَرد کُلِ جور شرَباری اَرِه فن دائِن کسَلی گه هان اِنوم رئی نابودی‌اِر، اَرِیَگه اُوُ نَچِنِ ژیر دوس داشدِن حخیخت تا نجاد بِگِرِن. 11 اَسَه خدا گرفدار قدِرتونی مِهِه گه اژ رئی اِرَماری، جوری گه دِرو باوارَ مَهَن. 12 تاگَه کُل کسَلی گه حخیختو باوار نَهَرد ئو اژ هر چیئی گه دُریس نیَ لَذتو بِرد، مَکوم بوئن. پایار بِمینِن 13 مِنتائای اِاِ بِرالی گه عزیزگرامی خدائینو، ایمَه باس وَه خاطر هُمَه هَر شگِر خدا بِهِیم، اَرِیَگه خدا هُمَل اِجور نوبر دیاری کِردی تا وَه‌سونگَ کار تقدیس‌کَر روحِ خدا ئو ایمون اَر حخیخت نجاد بِگِرینو. 14 اَرِه یَه او وَه‌سونگَ انجیل ایمَه دَوَت اَژینتو گِرتی تاگَه جِلال خداونمو عیسی مسیح بوءَ نَصُیتو. 15 اِسَه، اِاِ بِرال، پایار بِمینِن ئو بچسبِنَ تیَلیمَلی گه چه زوئونی ئو چه وَه نُامَه اژ ایمَه‌تونا گِرت. 16 اِسگَه خداونمو عیسی مسیح ووژ، ئو خدا، باوَه آسمونیمو گه ایمَه دوس داشدی ئو وَه فیض ووژ دلگُوئی ابدی ئو امید خو بَشخیتیَ بینمو، 17 دلگُوئیتو دِ ئو اِ هر قصَه ئو کار خوئی پایارتو کِ. |
@ 2024 Korpu Company