دوئِم تِسالونیکیَل 1 - کتاب مقدس به زبان لکی - گویش مرکزی

¹ اژ پولُس ئو سیلاس ئو تیموتائوس، وَه کلیسا شیَر تِسالونیکی گه هان اِنوم خدا، باوَه آسمونی ایمَه، ئو خداون عیسی مسیح:

² فیض ئو سِلامتی اژ جونِم خدا، باوَه ایمَه، ئو خداون عیسی مسیح اَر هُمَه بو.

شگِرگزاری ئو دوعا

³ اِاِ بِرال، ایمَه باس هَر وَه خاطر هُمَه شگِر خدا بِهِیم، ئو هَر یَه سزاواریشَ، اَرِیَگه ایمونتو هَر دیری ویشتِر رشدَ مِهِه ئو مِحبت هرکُمتون اَر یَکتِری فِرَه‌تِرا ماو.

⁴ اَژونَسَ ایمَه اِنوم کلیسائَل خدا وَه خاطر دَرین‌داری ئو ایمونتو اِ تیَمِل مِصیوَتَل ئو سخدیَل افتخارتونَ بینَ مِهِیم.

داوری اِ زَمو گِلاهُاردِن مسیح

⁵ یوئنَ کُل نشونَه داوری عادلونَه خداءَ، ئو ثمر یَسیَ گه هُمَه لائق اَ پاتِشائی خداءَ بوئینو گه دیرینو اَرِه اَویشَ عذاوَ مَکیشینو.

⁶ اَرِیَگه اِراسی خدا یَه عادلونَه مَذانی گه تِلافَتی کسَلی گه سزاتونَ میَن وَه سزا بِ‌آ.

⁷ ئو سِتار بیَ هُمَه گه دیرینو سزاءَ موئنینو ئو وَه ایمِه‌یش. وخدی گه خداون عیسی وَه‌گَرد فریشدَه‌ل زوردار ووژ اِ آگِر گُرّی اژ آسمو ظاهرَ ماو.

⁸ ئو اژ خدانشتاسَل ئو کسَلی گه اژ انجیل خداونمو عیسی فِربو نِمیَرِن، تقاصَ مَسینی.

⁹ جزا اونَل نابودی ابدی ئو دویری اژ درگا خدا ئو اژ جِلال قدِرت اوءَ.

¹⁰ اَسَه گه او اِ اَ روژَ مای تاگَه اِنوم ایمودارَل ووژ جِلال بِگِری ئو اِنوم کُل کسَلی گه ایمونو آوِردیَ باعث بِلُجوئی هاتِن بو، یَه اَرِه هُمِه‌یشَ، اَرِیَگه ایمونتو آوِردیَس اَر شاتی ایمَه.

¹¹ اَژونَسَ، یِسَر دوعاتون‌ اَرِنَ مِهِیم تا خدامو لائقتو بِذانی گه دَوَت اَژینتو بِگِری ئو وَه قدِرت ووژ هر قَص خو ئو هر کاری گه اژ ایمونتونَ، اَنجوم بِ،

¹² تاگَه نُم خداونمو عیسی اِنومتو جِلال بِگِری، ئو هُمِه‌یش مِطابق فیض خدامو ئو خداون عیسی مسیح اِنوم او جِلال بِگِرینو.