دوئِم پطرس 2 - کتاب مقدس به زبان لکی - گویش مرکزینبوّتکَرَل ئو مَلِمَل دِروزِنِ 1 مِنتائای اِنوم قوم، نبوّت‌کَرَل دِروزِنِ‌یش بین، هَرهُنَ گه اِنوم هُمِه‌یش مَلِمَل دِروزِنِ هَن گه وَه بی‌کِشکی تیَلیمَل خِلَطی مارِن گه باعث نابودیَ موئن ئو جُ‌جُ آقای گه اِدوارَه خِرینَسی، حاشاءَ مَهَن، ئو هُنَ، نابودی ناهَلمونه‌ی مارِنَ سر ووژو. 2 فِرَه کسَل مَچِنَ تُرّ هُواوهوسَل اونِلا، ئو وَه خاطر اونَل رئی حخیخت کِفِرَ ماوتی اَری. 3 اونَل اژ طَمائو، وَه یاری قصَه‌ل دِرو، خارَتتونَ مَهَن. مِنتائای مکومیَتو گه وِرِکار مَیِّن بیَ، بیگار نَنیشتیَ ئو نابودیو نَحیوَتیَ! 4 اَرِیَگه اَرّ خدا ریَم نَهَردی اَر فریشدَه‌لی گه گنائو کِرد، بلکِم اونَل آوشدیِ تیَه سیاچال جیَنِم ئو سپارتِنیَ زنجیرَل تیَریکی شوءَزنگی تا اَرِه داوری بِمینِن اَر اورَه؛ 5 اَرّ ریَم نَهَردی اَر دنیا قدیم‌یش، بلکِم وخدی رُحِیل کِل‌کِردی اَر دنیا بی‌دینَل ئو فَخَد نوح، اَ موعظَه‌کَر صالح‌بیئینَ، وَه‌گَرد هفت نفرتِر حفظ کِردی؛ 6 ئو اَرّ شیَرَل سُدوم ئو عَمورَه کِردیَ بیل ئو مَکومو کِردیَ نابودی تاگَه عبرتی بوئن اَرِه عاقویَت بی‌دینی، 7 ئو لوطِ صالح گه اژ خیزی اَ آمَل شرَبارَ آس بوئی، نجاد داتی - 8 اَرِیَگه اَ پیا صالحَ کُلِ روژی اِنومو زِنِه‌یَ مَهَردی ئو گیو صالح او وَه خاطر کارَل گَنو گه موئینیاتی ئو مَشتَفتی زجِرَ مَکیشاتی- 9 اِسَه خداونَ مَذانی چطور آم دیندار اژ اِنتحونَل نجاد بِ ئو آمی گه صالح نیَ بِیلی اَرِه مِکافات روژ داوری، 10 مصقوصاً اونَلی گه هانَ دُم هُواوهوس فاسد نفْس ووژونا ئو هر قدِرت‌واختیاری خوارَ مَذانِن. یوئنَ اَخِنَ گُرساخ ئو قُراتِن گه اژ کِفِر کِردِنَ کَلِنگَل آسمونی زِلَئو نِمَچو؛ 11 وَه ایی حالا گه فریشدَه‌لی گه اِ قویَت ئو قدِرت سرتِرِن، اَر تک خداون وخدی مکومیَت اونَل اِلومَ مَهَن اَرِنو، گَنونَ بی نِموشِن. 12 مِنتائای اونَل اِجور جونورَل بی‌شعوری گه وَه غریزَه رفدارَ مَهَن ئو هاتِنَسَ دی گه بِکُوئِنِ تِلَه ئو نابود بوئن، قصَه‌ل گَنَ موشِنَ چیئَلی گه درکی اَژینو نِرِن ئو اِنوم نابودی ووژو، نابودَ موئن 13 ئو وَه تِلافَتی اَ گَنیَ گه کِردونَ، گَنَ موئینِن. خَوشی یوئنَ عِیاشی کِردِن اِ روژ روشتاءَ. لکَه‌ل ننگی کِن گه وخدی وَه‌گَرد هُمَه هانِ نوم مِمونی‌اِر، اژ رِنگَری ووژو لَذتَ میَرِن. 14 اونَ چیَمَلی دیرِن پِر اژ زِنها گه اژ گنا کِردِن سیر نِموئن. ایی آیلَل لیَنتَ، گیونَلی گه سُسِن ماوژِنِ تِلَه ئو دلَلون اَرِه طَما آوِردیَسَ عمل! 15 رئی راسو وِل کِردیَ ئو ویرِ تُرّ بَلعام بِن بِعور گه مِز نادُریسی دوس داشدی، اژ رئی اِرهاتِنَ. 16 مِنتائای بَلعام وَه خاطر کار گَنی خِض بیتی اَری. خر بی‌زوئونی اِجور آمی هاتِ زوئو ئو لَخوم دا اَر لیوَگَری نبوّت‌کَر. 17 ایی مَلِمَل دِروزِنِ، کیَنیَل بی‌آوْ ئو کَرِّدویَلی کِن گه واهوفَه تار کِردِنِ، تیَریکی شوءَزنگی اَرِنو مَیِّن بیَ. 18 اَرِیَگه وَه قصَه‌لی گه وَه دَنگ کَلِنگ پر اژ قُراتی ئو نَفیَمیَ، اونَلی گه وَه ایی تازَه اژ چِنگ کسَلی گه اژ رئی اِرهاتِنَ حِواینَ، ماوژِنِ تِلَه شَوَتَل نفسونی ووژو. 19 وَدَه آزادیَ میَن‌ئونو، مِنتائای ووژو بَنَه فسادِن؛ اَرِیَگه، آمیزاءَ بَنَه چیئی کَ گه اَوَه اَری سُوارِ. 20 اَرِیَگه اونَلی گه وَه شناخت خداون ئو نجاددهندَه ایمَه عیسی مسیح، اژ فساد دنیا آزاد بینَ، اَرّ اِدوارَه گرفدار ئو اسیر بوئنی، عاقویَتو گَنتِر اژ اول‌بارونَ ماو. 21 بیتِر بی گه اژ اول‌اِرا، رئی صالح‌بیئینو نِمَشتاسیا، تا یَگه دُما شناسین، اژ حکِم مقدّسی گه سپارتیائونو، ویر اِربِپِلِنِن. 22 ایی متل راسَ، اِبارَه چیئی موشی گه هاتیَسَ سرو: «سگ گِلامیری اَر استفراخ ووژ»، ئو «خنزیل شوریا، اَر پِل هُاردِن اِ هَری.» |
@ 2024 Korpu Company