دوئِم یوحنا 1 - کتاب مقدس به زبان لکی - گویش مرکزی

¹ اژ جونِم مِنِ ریش‌اَسبی وَه اَ بانو دیاری‌بیئی خدا ئو آیلِلِهِه گه اِنوم ’حخیخت‘ دوسو دیرِم -ئو نه فَخَد مِه، بلکِم کُل اونَلی گه حخیختَ مَشتاسِن-

² وَه خاطر اَ حخیختَ گه لیز گِرتیَس اِنوم ایمَه ئو تا ابد ها گَردمو.

³ اژ جونِم خداءِ باوَه ئو عیسی مسیحِ خداون، کُر اَ باوَه، فیض ئو ریَمَت ئو سِلامتی اِنوم حخیخت ئو مِحبت ها گَردمو.

⁴ مِه فِرَه خَوشالا بیم گه فیَمیم بِری اژ آیلَلِت هَراَ جورَ گه اژ باوَه فِربونمو گِرتیَ، اِنوم ’حخیخت‘ زِنِه‌یَ مَهَن.

⁵ اِسگَه اِاِ بانوءِ عزیز، خواهشدتی اَژی دیرِم ئو نه یَگه فِربو تازَه‌تی اَرِه بِنُیسِنِم، بلکِم هَر اَوَه گه اژ اَ اولَ داشدِمونَ، گه یَکتِریمو دوس داشدوئی.

⁶ ئو دوس داشدِن یَسَ گه مِطابق فِربونَل خدا زِنِه‌ی بِهِیم. یَه، اَ فِربونَسَ گه اژ اَ اولَ شنَفتِتونَ تاگَه اِنوم اَوَه زِنِه‌ی بِهِینو.

⁷ اَرِیَگه آمَل رِنگَر فِرِه چِنَس اِنوم دنیا گه اعتراف نِمَهَن گه عیسی مسیح هاتیَس اِنوم جسمِ بشری. هُنَ کسَلی رِنگَر ئو ضدّمسیحِن.

⁸ حُواستون اَر ووژتو بو، تاناخواد اَ چیئَه گه جُورمون اَرِه کیشیَ بِینونَ وااِرا، بلکِم اَجِر کامل بارینونَ دس.

⁹ هر کی نواتِر اژ تیَلیم مسیح بِچو ئو اِنوم اَ تیَلیمَ نَمینی، خدا نِری، مِنتائای اَوَه گه بِمینی اِنوم تیَلیم مسیح، هم باوَه دیری هم کُر.

¹⁰ اَرّ کسی با اِرَه تک هُمَه ئو ایی تیَلیمَ ناری، رئی‌ئون نیَنی با اِنوم مالتو ئو جُ‌جُ رُی خَوش‌ئون نِشو نیَنی؛

¹¹ اَرِیَگه هر کی رُی خَوش‌ئون نِشو دِیتی، اِ کارَل شر او شیَریکا ماو.

¹² وَه‌یاآگه چیئَل فِرِه دیرِم گه اَرِنتو بِنُیسِنِم، مِنتائای نِمِم وَه قِلم ئو غائذ بو. اِجالی امیدَوارِم گه بام اِرَه تَکتو ئو اِ ویراَرویر گپ بِیمو تاگَه خَوشیمو کاملا بو.

¹³ آیلَل خُیَه دیاری‌بیئی، سِلامت‌ئونَ مَرَسِنِن.