دوئِم قُرَنتیان 9 - کتاب مقدس به زبان لکی - گویش مرکزی

پیشکَشیَل اَرِه مسیحیَل شیَر اورشلیم

¹ اِسگَه لازم نیَ اِبارَه خِلمت اژ ایمودارَل مسیح اَرِه هُمَه بِنُیسِنِم،

² اَرِیَگه مَذانِم گه هُمَه اَرِه ایی کارَ شوق دیرینو، ئو اَرِه یَه اَرتَک ایمودارَل هیال مقدونیَه افتخارتونَ بینَ مَهَم ئو وِتِمَسَ بینو گه هُمَه اژ پارنِهَه اِ هیال اَخائیَه اَرِه دائِن پیشکَشی آمادَه بینونَ، ئو ایی خیرَت هُمَه بِری اژ اونَل اَرِه ایی کارَ آوِردیَسی اَر سر خیرَت.

³ مِنتائای ایی بِرالَ کِلَ‌مَهَم تاگَه افتخار ایمَه اَر هُمَه اِ ایی گپَ باطل ناو، بلکِم تا هَراَ جورَ گه وِتِمَ، آمادَه بوئینو.

⁴ تاناخواد، اَرّ مردِم مقدونیَه وَه‌گَرد مِه بان ئو بفیَمِن گه آمادَه نیئینو، ایمَه وَه خاطر اطمینونی گه وَه هُمَه‌مو داشدیَ اِ نوا اونَل خجالتا بوئیم تا چه برَسیَ هُمَه.

⁵ اِسَه لازمَ مَذانِم گه اژ اَ بِرالَ خواهشد بِهَم وِر اژ مِه، بان اَرِه تَکتو ئو پیشکَشیَلی گه وَدَه‌تو دائی، گِردا کَن. تاگَه ایی پیشکَشیَ، پیشکَشی‌ای بو گه وَه دل ووژتو داتونَ نه وَه زور.

وَه خَوشالی پیشکَش بِهَن

⁶ گَپ‌ِقصَه یَسَ گه هر کی کَم کِشت بِهِه، کم‌یش دروءَ مِهِه، ئو هر کی فِرَه کِشت بِهِه، فِرِه‌یش دروءَ مِهِه.

⁷ هر کی هَر اَخَ بِ گه اِ دل قَص کِردیِ، نه وَه بی‌میلی یا وَه زور، اَرِیَگه خدا کسی گه وَه خَوشالیَ موئَشخی دوس دیری.

⁸ ئو خدا مَتونی هر بِرَکتی اَرِه هُمَه فِرَه‌آ کِ، تا هَر اِ کُل چی اَخَ گه اِ‌کَلتونَ داشدوئیتو، اِ هر کار خوئی چَل‌چَلتو داشدوئی.

⁹ هَرهُنَ گه اِنوم کِتاو مزامیر نُیسیاءَ: «او وَه دسِ‌دلوازی بَشخیتیَ ژارَل، صالح‌بیئینی تا ابدَ مَمینی.»

¹⁰ او گه تُئم اَرِه کشاورز ئو نون اَرِه هُاردِن آمادَه مِهِه، تُئمتو آمادَه مِهِه، ئو ویشتِرا مِهِیتی ئو ثمر صالح‌بیئینتو فِرَه‌آ مِهِه.

¹¹ اِ هر چی دولَمَنا موئینو تاگَه بتونینو اِ هر چی دس‌ِدلواز بوئینو، ئو ایی دسِ‌دلوازی هُمَه وَه‌سونگَ ایمَه باعث شگِرگزاری اَرِه خدا ماو.

¹² اَرِیَگه اَنجوم ایی خِلمتَ، نه فَخَد هَوَجَه‌ل ایمودارَل مسیح زفت‌ِرفتَ مِهِه، بلکِم شگِرگزاریَل اَرِه خدا فِرَه ویشتِرا مِهِه.

¹³ وَه‌سونگَ ایی خِلمتَ، مردِم خدا جِلالَ میَن اَرِه اطاعتی گه اژ اعتراف هُمَه وَه انجیل مسیحَ مای، هَمیش اَرِه دسِ‌دلوازی گه وَه یاری دائِن اَر اونَل ئو کُل مردِم نشونَ مِینو.

¹⁴ ئو اونَ وَه خاطر فیض عظیم خدا گه ها نوم هُمِه‌اِر، اَرِه هُمَه دوعاءَ مَهَن ئو شوق فِرَه‌تونی اَرِه دیرِن.

¹⁵ شگِر خدا اَرِه بشخِشی گه نِماو تیَریف کِینی.