دوئِم قُرَنتیان 8 - کتاب مقدس به زبان لکی - گویش مرکزیتشویق کِردِن وَه دسِ‌دلوازی 1 اِسَه اِاِ بِرال، میا هُمَل اژ فیضی گه خدا بَشخیَسیَ کلیسائَل هیال مقدونیَه، باخَوَرا بِهِیم. 2 اَرِیَگه اونَل وَه عذاوَل، سخد اِنتحو بین، مِنتائای خَوشی فِرَه‌ئو آشگارا بی ئو اِ ژاری فِرَه‌ئو، دسِ‌دلوازیو بی‌حَدا بی. 3 اَرِیَگه مِه ووژِم شاتِم گه اونَ وَه رضائت ووژو اَخَ گه اژ دَسون اِرَمای موئَشخِن، جُ‌جُ ویشتِریش. 4 وَه لالکَ‌حُاس جُرّیان اَر ایمَه گه اِ خِلمت اژ ایمودارَل مسیح بیَرو داشدوئی. 5 ایی کارونَ ویشتِر اژ اَ چیئَه بیَ گه ایمَه فگِرمونَ مَهَرد، مِنتائای اونَل اول‌بار ووژون اَر خداون پیشکَش کِرد ئو اَسَه مِطابق خواس خدا، اَر ایمَه. 6 اِسَه، لالکیامَ تیتوس گه هَراَ جورَ گه بِنیا ایی کار خِرَ اِنوم هُمَه ناتی، برَسِنتیَ سرانجوم. 7 اِسَه هَرهُنَ گه اِ کُل چی سَرینو -اِ ایمو، اِ قصَه کِردِن، اِ شناخت، اِ خیرَت اَرِه کُل چی، ئو اِ مِحبتتون اَر ایمَه- اِ ایی کار خِریشَ سر بوئن. 8 یَه حکِم نِمَهَم اَر هُمَه، بلکِم میا مِحبت خالص هُمَه اِ قیاس وَه‌گَرد خیرَت کسَلی‌تِر اِنتحو کَم. 9 اَرِیَگه هُمَه اژ فیض خداونمو عیسی مسیح خَوَر دیرینو گه وَه‌یاآگه دولَمَن بی، وَه خاطر هُمَه ژارا بی تاگَه هُمَه وَه ژاری او دولَمَنا بوئینو. 10 اِسَه عخیدَه ووژِم اِبارَه ایی گپَ موشِم: یَه وَه نفع هُمِئَه، اَرِیَگه پار، نه فَخَد بِنیا ایی کارتونَ نا، بلکِم اَرِه اَنجوم دائِنی شوقتون‌یش داشد. 11 اِسَه ایی کارَ برَسِنِنَ سرانجوم تا هَراَ جورَ گه اَرِه اَنجوم دائِنی شوقتو داشد، سرانجوم گِرتِنی مِطابق چیئی بو گه اژ دَستون اِرَمای. 12 اَرِیَگه اَرّ شوقی بو، پیشکَشی هر کس مِطابق چیئی گه دیری قبولَ ماو، نه مِطابق چیئی گه نِری. 13 اَرِیَگه مصقودِم یَه نیَ گه کسَلی‌تِر آسودَه بوئن ئو بار گِرونی بِنم اَر کول هُمَه، بلکِم یَگه وَه انصاف بو. 14 تاگَه وَه فِرووُنی اَ چیئَه گه اِسگَه دیرینو، کمِ‌کسری اونَل زفتِ‌رفت بو، تاگَه یِه روژ وَه زیاکی اَ چیئَه گه اونَل دیرِن، کمِ‌کسری هُمَه زفتِ‌رفت بو. هُنَ انصاف برقِرارَ ماو. 15 هَرهُنَ گه اِنوم تورات نُیسیاءَ: «اَوَه گه فِرَه جیَم داتی، زیاکی ناآشدی، ئو اَوَه گه کم جیَم داتی کمِ‌کسری ناآشدی.» کِل‌کِردِن تیتوس اَرِه شیَر قُرَنتُس 16 مِنتائای شگِر خداءَ مَهَم گه هَراَ خیرَتی گه مِن اَرِه هُمَه دیرِم ناسیِ دل تیتوس‌یش. 17 اَرِیَگه او نه فَخَد خواهشد ایمَه قبول کِردی، بلکِم وَه خیرَت فِرِه‌ی ئو وَه دل ووژ ما اَرِه تک هُمَه. 18 ئو ایمَه وَه‌گَرد او بِرامونی کِل‌کِرد گه اِنوم کُل کلیسائَل وَه خاطر موعظَه کِردِن انجیل نُم اِرآوشدیِ. 19 ئو نه فَخَد یَه، بلکِم او اژ جونِم کلیسائَل اِنتخاو بیَ تاگَه اِ ایی کار خِرَ گه اَرِه جِلال خدا ئو نِشو دائِن خِرخواهیمونَ، هُمسفرمو بو. 20 ایمَه اِ جیَم دائِن ایی پیشکَشیَلی گه اژ دسِ‌دلوازیَ، حُواسمو هَس گه کس ایرادمون اَژی نَگِری. 21 اَرِیَگه تقِلا مِهِیم اَ چیئَه گه نه فَخَد اِ چیَم خداون، بلکِم اِ چیَم مردِم‌یش دُریسَ، اَنجوم دِیم. 22 بِرا ووژمونَ گَرد اونَل کِلَ‌مِهِیم گه فِرَه اِنتحونمو کِردیَ ئو فیَمیمونَ اِ چیئَل فِرِه‌ی خیرَت دیری، مِنتائای اِسگَه او وَه خاطر اطمینو فِرِه‌ی گه وَه هُمَه دیری، خیرَت ویشتِری دیری. 23 اِبارَه تیتوس باس بوشِم گه اَرِه خِلمت اژ هُمَه او هُم‌قطار ئو هُمکار مِنَ؛ ئو اِبارَه بِرالمو باس بوشِم گه اونَل قاصیَل کلیسائَل ئو جِلال مسیحِن. 24 ایلَهَه مِحبت ووژتو ئو افتخاری گه اَر هُمَه دیریم، اَرتَک کلیسائَل ثابت کَن اَر ایی پیالَ. |
@ 2024 Korpu Company