دوئِم قُرَنتیان 6 - کتاب مقدس به زبان لکی - گویش مرکزی1 ایمَه گه هُمکارَل مسیحیم خواهشد اَژینتونَ مِهِیم گه نِیلِن اَ فیض خداءَ گه آوِردِتونَسَ دس، بی‌فادَه بو. 2 اَرِیَگه خدا اِنوم کِتاو اِشعیا پِخَمَرَ موشی: «اِ وخد خو، مِه گوشِم دا اَر تو ئو اِ روژ نجاد مِه تونِم یاری دا.» اِسگَه، الان اَ وخد خو خداسَ؛ اِسگَه، الان روژ نجادَ. سخدیَل پولُس 3 ایمَه کُچِکی اَر سر رئی کس نِمَنیم، تاناخواد ایرادی اِ خِلمَتمو بوءَ دی. 4 بلکِم ایمَه اِ کُل کاری نشونَ مِیم گه خِلمتکارَل خدائیم: وَه طاخَت فِرَه، اِ عذاوَل، اِ سخدیَل، اِ بِلائَل، 5 اِ شلاخ هُاردِنَل، اِ زندونَل، اِ شورشَل، اِ جُورَل، اِ شو نَحیوَسیَل ئو اِ وِرسِنی؛ 6 وَه پاکی، وَه شناخت، وَه صبِر، وَه مِرِبونی، وَه روح‌القدس ئو وَه مِحبت خالص، 7 وَه راس‌وَشی، وَه قدِرت خدا ئو وَه شِمشیر صالح‌بیئین اِ دس راس ئو چپ؛ 8 اِ عزّت ئو بی‌عزّتی، اِ بَنُمی ئو نیکنُمی. اِجور رِنگَرَل وَه‌گَرد ایمَه رفدارَ ماو، وَه ایی حالا هَنی راس‌وَشیم؛ 9 بی‌نُم‌ونِشو مِنتائای هَنی شناسیائیم؛ اَرسَکَراتیم مِنتائای هَنی زِنیئیم، اِجور کسَلی گه مِجازات بینَ مِنتائای هَنی نکُشیایمَ؛ 10 پَژاریم مِنتائای هَنی خَوشالیم، ژاریم مِنتائای کسَل فِرِه ثروَدمَنا مِهِیم؛ هُیچ نِریم مِنتائای صائای کُل چیئیم. 11 اِاِ مردِم شیَر قُرَنتُس، ایمَه کُل چیمو وِت اَرِنتو ئو دلمونِ رُیتو واز کِرد. 12 ایمَه مِحبت ووژمون اژ هُمَه دَریخ نِمِهِیم؛ بلکِم هُمِه‌ینو گه مِحبتتون اژ ایمَه دریخَ مِهِینو. 13 اِجالی هُمِه‌یش دِلَلتونِ رُی ایمَه واز بِهَن،(اِجور آیلَل قصَه‌تونَ گَردَ مَهَم). معبد خداءِ زِنی 14 نَچِنِ ژیر دارِبرگ بی‌ایمونَل، اَرِیَگه صالح‌بیئین ئو شرَباری چه رقیفی‌ای دیرِن؟ ئو نُیر ئو تیَریکی چه شراکتی دیرِن؟ 15 مسیح ئو بِلیعال، یانی شِطو، چطورَ مَکُوئِن اَر یَک؟ ئو چطور ایمودار وَه‌گَرد بی‌ایمو هُم‌بیَرا ماو؟ 16 معبد خدا ئو بِتَل چطورَ مَکُوئِن اَر یَک؟ اَرِیَگه ایمَه معبد خداءِ زِنیئیم. هَرهُنَ گه خدا اِنوم تورات ئو کِتاوَل پِخَمَرَل وِتی: «مِه لیزَ مَگِرِم اِنوم اونَل، ئو اِنوم اونَل مَچِمَ رئیا، ئو مِنَ موئمَ خدا اونَل ئو اونِلَ موئنَ قوم مِه.» 17 اِسَه خداون اِ کِتاوَل پِخَمَرَل موشی: «اژ نوم اونَ بورنَ دِریر ئو جیاآ بوئن اَژینو. ئو دس نَنِن اَر هُیچ چی نِجسی ئو مِه وَه رُی خَوشَ مَچِمِ گِرد هُمَه.» 18 «مِن اَرِه هُمَه موئمَ باوَه ئو هُمَه اَرِه مِنَ موئینونَ کُرَل ئو دِتَل، خداونِ قادرِ مطلق یَه موشی.» |
@ 2024 Korpu Company