دوئِم قُرَنتیان 5 - کتاب مقدس به زبان لکی - گویش مرکزی

مال آسمونی ایمَه

¹ اَرِیَگه مَذانیم اَرّ ایی داوارَ گه مال زمینی ایمِئَه نابود بو، اژ خدا مالی دیریم، نه مالی گه وَه دس کَتوئی، بلکِم مالی‌، ابدی اِ آسمو.

² اَرِیَگه اِنوم ایی داوار زمینیَ هِناسی سردَ مَکیشیم، هوسَ مِهِیم گه مال آسمونیمو بِهِیمِ وَر.

³ اَرّ اِراسی بِهِیمیِ وَر، دیَر لُت نِمَمینیم.

⁴ اَرِیَگه تا وخدی گه ایمَه هایمِ ایی داوارَ، اِ ژیر بار گِرو هِناسی سردَ مَکیشیم، اَرِیَگه نِمِمو جِنِک اِوَرمون‌ اِرباریم، بلکِم تا جِنِکی‌تِر بِهِیمِ وَر، تاگَه ژییاین، اَ چیئَه گه فانیَ قویت اِرادِ.

⁵ اَوَه گه ایمَه اَرِه ایی کارَ حاضر کِردیِ خداءَ، گه اَرِه بِعونَه روحِ خدا داسیِ ایمَه.

⁶ اِسَه ایمَه هَر جسوریم، مَذانیم تا وخدی گه لیزمو گِرتیَس اِنوم ایی لارَ، اژ خداون دویریم.

⁷ اَرِیَگه وَه ایمو زِنِه‌یَ مِهِیم، نه وَه اَ چیئَه گه موئینیم.

⁸ اَاَ، جسوریم، ئو ایمَه یَه بیتِرَ مَذانیم گه اژ ایی لارَ دویر بوئیمو ئو اَرتَک خداون مالمو داشدوئی.

⁹ اِسَه چه اِ مال بوئیمو، چه دویر اژ مال، مصقودمو یَسَ گه وَه دل او بوئیمو.

¹⁰ اَرِیَگه کُل ایمَه باس اِبِرُوَر تخت داوری مسیح بوسیم، تاگَه هر کس، مِطابق اَ چیئَه گه اِ لار ووژ اَنجوم داسی، چه خو چه گَن، باریَ دس.

خِلمت صُئل

¹¹ اِسَه گه مَذانیمو ترس اژ خداون چیَ، تقِلاءَ مِهِیم گه مردِم قانی کِیم. مِنتائای اَ چیئَه گه هِیم اَر خدا آشگارَ ئو امیدَوارِم اَر وِژدان هُمِه‌یش آشگار بو.

¹² ایمَه نِمِمو هَنی اژ ووژمو تیَریف کِیم، بلکِم میا دلیلی بِیمَ بینتو گه وَه ایمَه افتخار بِهِینو، تاگَه بتونینو جوواو اونِلا بِینو گه وَه ظاهر افتخارَ مَهَن، نه وَه اَ چیئَه گه ها نوم دل‌اِر.

¹³ اَرِیَگه اَرّ ایمَه عَخِلمون اژ دس داءَ، وَه خاطر خداءَ؛ اَرّ عاخِلیم وَه خاطر هُمِئَه.

¹⁴ اَرِیَگه مِحبت مسیح ایمَه ادارَه مِهِه، اَرِیَگه ایمَه زقین دیریم گه یَکی وَه خاطر کُل مِرد، اِسَه کُل مِردِن.

¹⁵ ئو او وَه خاطر کُل مِرد تاگَه اونَلی گه زِنیئِن دیَر اَرِه ووژو زِنِه‌ی نَهَن، بلکِم اَرِه او گه وَه خاطر اونَل مِرد ئو زِنیا بی.

¹⁶ اِسَه، اَژیرِ دُما هُیچ کسَ مِطابق جسم نِمَشتاسیم، وَه‌یاآگه زمونی مسیحمو مِطابق جسمَ مَشتاسیا، اِسگَه دیَر هُنَ نیَ.

¹⁷ اِسَه اَرّ کسی ها نوم مسیح‌اِر، خلقت تازه‌ی‌کَ. چیئَل کُینَه اژ بِن چِن، اِسگَه کُل چی تازه‌آ بیَ!

¹⁸ یوئنَ کُل اژ خداءَ گه وَه‌سونگَ مسیح ایمَه وَه‌گَرد ووژ دوسی داتی ئو خِلمت صُئل سپارتیَ ایمَه.

¹⁹ یانی خدا اِنوم مسیح، دنیا وَه‌گَرد ووژ دوسیَ ماتی، ئو گنائَلو نِمَنُیسیاتیِ پائو، ئو پِغوم صُئل سپارتیَ ایمَه.

²⁰ اِسَه ایمَه سفیرَل مسیحیمو، خدا وَه‌سونگَ ایمَه خواس ووژ اَنجومَ مِ. ایمَه اژ جونِم مسیح اژ هُمَه خواهشدَ مِهِیم گه وَه‌گَرد خدا دوسی بِهِینو.

²¹ خدا او گه گنا نشتاسیتی، وَه خاطر ایمَه کِردیَ گنا تاگَه ایمَه اِنوم او بوئیمَ صالح‌بیئین خدا.