دوئِم قُرَنتیان 4 - کتاب مقدس به زبان لکی - گویش مرکزی

نُیر انجیل

¹ اِسَه اَرِیَگه ایمَه ایی خِلمتَ اژ ریَمَت خدا دیریم، دلسردا نِموئیم.

² بلکِم ایمَه رئیَل پنهونی ئو نادُریسمو رد کِردیَ ئو وَه رِنگَریا رفدار نِمِهِیم ئو دس اِنوم کلوم خدا نِمیَریم، بلکِم وَه آشگارا وِتِن حخیخت، تقِلاءَ مِهِیم اَرتَک خدا ئو وِژدان کُل مردِم، تایید بوئیمو.

³ جُ‌جُ اَرّ انجیل ایمَه پوشیاءَ، اَر کسَلی پوشیاءَ گه هانِ رئی نابودی‌اِر.

⁴ خداءِ ایی دنیا یانی شِطو ذِنَل بی‌ایمونَل کور کِردیِ تاگَه نُیر انجیل جِلال مسیح گه شیوَه خداءَ، نوئینِن.

⁵ اَرِیَگه ایمَه، اِبارَه ووژمو موعظَه نِمِهِیم، بلکِم اَ چیئَه گه اِلومَ مِهِیم یَسَ گه عیسی مسیح، خداونَ ئو ایمَه وَه خاطر مسیح خِلمتکار هُمِه‌یمو.

⁶ اَرِیَگه هَراَ خداءَ گه وِتی: «نُیر اِنومجا تیَریکی بدَرشخی،» نُیر ووژ آوشدی اَر دلَل ایمَه تاگَه شناخت جِلال خدا اَر نوم‌رُی عیسی مسیح، اَر ایمَه بدَرشخِنی.

⁷ مِنتائای ایمَه ایی گنجَ اِنوم کویزَه‌ل گِلین دیریمو، تاگَه دیار بو گه ایی قدِرت عظیمَ اژ خداونَ نه اژ ایمَه.

⁸ سخدی اژ هر لای زورَ ماری‌ اَر ایمَه، مِنتائای حُیردا نِموئیم؛ واقِ دَممونا پَریَ، مِنتائای ناامید نیئیم؛

⁹ هایمِ عذاواِر، مِنتائای تار نوئیمونَ؛ مَکُوئیم اَر زَمی، مِنتائای نابود نوئیمونَ.

¹⁰ هَر مرگ عیسی مَکیشیم اَر کول لار ووژمونا تاگَه ژییاین عیسی‌یش اِنوم لارمو آشگارا بو.

¹¹ اَرِیَگه ایمَه گه زِنیئیم وَه خاطر عیسی گیونَ مِیم، تاگَه ژییاین عیسی‌یش اِنوم لار فانیمو آشگارا بو.

¹² اِسَه مرگ اِنوم ایمَه عملَ مِهِه، مِنتائای ژییاین اِنوم هُمَه.

¹³ اَرِیَگه اِ کِتاو مزامیر نُیسیاءَ: «ایمونِم آوِرد، اَسَه قصَه‌م کِرد.» وَه هَراَ روحِ ایمونَ، ایمِه‌یش ایمو دیریم ئو قصَه مِهِیم.

¹⁴ اَرِیَگه مَذانیم او گه عیسی خداون اژ مِردیَل زِنیا کِردی، ایمِه‌یش وَه‌گَرد عیسی زِنیا مِهِه، ئو ایمَه وَه‌گَرد هُمَه ماری اَرِه تک او.

¹⁵ اَرِیَگه یوئنَ کُل وَه خاطر هُمِئَه، تاگَه فیضی گه نَصُی آمَل ویشتِر ئو ویشتِری ماو، شگِرگزاری اَرِه جِلال خدا ویشتِرا کِ.

¹⁶ اِسَه دلسرد نِموئیم. وَه‌یاآگه لار ایمَه مَپیتِرکی، اِنسو باطنیمو روژ اَر روژ نووتِرا ماو.

¹⁷ اَرِیَگه سخدیَلی گه گُجَرِن ئو مَگُذَرِن، اَرِه ایمَه جِلال ابدی‌ای مارِن گه نِماو وَه‌گَرد اَ سخدیِلَ قیاس کِینی.

¹⁸ اِسَه ایمَه نه اَر چیئَلی گه ماو بوئینیو، بلکِم اَر چیئَلی گه نِماو بوئینیو گِزمو کِردیَ، اَرِیَگه چیئَلی گه ماو بوئینیو مَگُذَرِن، مِنتائای چیئَلی گه نِماو بوئینیو ابدیِن.