دوئِم قُرَنتیان 3 - کتاب مقدس به زبان لکی - گویش مرکزی

خادمَل عَت نوو

¹ یانی ایمَه اِدوارَه بِنیا مَنیم اَر تیَریف کِردِن اژ ووژمو؟ یاگَه ایمِه‌یش اِجور کسَلی‌تِر نیازَ سفارش‌نُامَه اژ جونِم هُمَه یا اَرِه هُمَه دیریم؟

² هُمَه ووژتو سفارش‌نُامَه ایمِه‌ینو، گه اَررُی قلبَلمو نُیسیاءَ تاگَه کُل مردِم بشتاسِنی ئو بحیوَنِنی.

³ ئو هُمَه نشونَ مِینو گه نُامه‌ی اژ جونِم مسیحینو، گه وَه‌سونگَ ایمَه رَسیَ، نُامه‌ی گه نه وَه جوهر بلکِم وَه روحِ خداءِ زِنی نُیسیاءَ، ئو نه اَررُی کتیبَه‌ل بَردین، بلکِم اَررُی کتیبَه دلَل اِنسونی.

⁴ یَسَ اطمینونی گه ایمَه وَه‌سونگَ مسیح اَر خدا دیریم.

⁵ نه یَگه ایمَه کفایت دیریم ئو ادعا بِهِیم گه هَماری چیئی اژ ایمَه ماءَ عمل، بلکِم کفایت ایمَه اژ جونِم خداءَ،

⁶ او گه کفایت داسیَ ایمَه گه خِلمتکارَل عتِ جدید بوئیم -نه عَتی گه نُیسیاءَ بلکِم عَتی گه اژ روحِ خداءَ. اَرِیَگه نُیسیا مَکُشی، مِنتائای روحِ خدا ژییاینَ موئَشخی.

جِلال عَت نوو

⁷ اِسگَه اَرّ خِلمَتی گه آخِری مرگَ ئو کِلمَه‌لی اَررُی بَرد کَنیاءَ، وَه هُنَ جِلالی هات گه بنی‌اسرائیل نتونستی وَه خاطر جِلال نوم‌رُی موسی گِز کَنی اَری، وَه‌یاآگه اَ جِلالَ داشدی تمومَ موئیا،

⁸ یانی خِلمَتی گه اژ روحِ خداءَ، جِلال ویشتِری نِری؟

⁹ اَرِیَگه اَرّ خِلمَتی گه آخِری مَکومیتَ وَه جِلالا بی، خِلمَتی گه آخِری صالح‌بیئینَ باس وَه جِلال فِرَه‌تِریکا بو.

¹⁰ اِراسی اَ چیئَه گه زمونی پِرجِلال بی، اِسگَه اِبِرُوَر جِلالی گه اَژی بیتِرَسی، دیَر جِلالی نِری.

¹¹ اَرِیَگه اَرّ اَ چیئَه گه نابودَ موئیا وَه جِلالا بی، ایلَهَه اَ چیئَه گه هَر هَسی باس وَه جِلال ویشتِریکا بو.

¹² اِسَه اَرِیَگه هُنَ امیدی دیریم، وَه جورَت فِرِه قصَه مِهِیم؛

¹³ نه اِجور موسی گه نِقاوی دا اَر نوم‌رُی ووژ تا بنی‌اسرائیل عاقویَت اَ چیئَه گه داشدی تمومَ موئیا، نوئینِن.

¹⁴ ذِنو تیَریکا بوئی اَرِیَگه تاگَه ایمِرو وخدی اوُ عَت عتیقَ مَحیوَنِن هَراَ نِقاوَ اَر نوم‌رُیو هَر ها سرجا ووژ ئو هیزنَگِرتیِ، اَرِیَگه فَخَد وَه‌سونگَ مسیح هیزَمَگِری.

¹⁵ اَاَ، جُ‌جُ تاگَه ایمِرو، هر وخد تورات موسی مَحیوَنِن، نِقاوی ها رُی دِلو؛

¹⁶ مِنتائای وخدی کسی گِلامیری ویرِ خداون، اَ نِقاوَ هیزَمَگِری.

¹⁷ اِسگَه خداون، روحَ ئو هر جا روحِ خداون بو، اورَه آزادیَ.

¹⁸ ئو کُل ایمَه هُنَ گه وَه رُیَل بی‌نِقاو، اِجور آینه‌ی جِلال خداون نشونَ مِیم، یاواش یاواش اِنوم جِلالی گه روژَ روژ ویشتِرا ماو، عوضَ موئیمَ شکِل او، ئو یَه، کار خداون یانی روح‌القدسَ.