دوئِم قُرَنتیان 2 - کتاب مقدس به زبان لکی - گویش مرکزی

¹ اِسَه، قَصِم کِرد گه دیَر نام اَرِه تَکتو تا هُمَه نَرَنجِنِم.

² اَرِیَگه اَرّ هُمَل برنجِنِم، دیَر کیَ مَتونی مِه خَوشالا کِ، بِخِر اژ هُمَه گه مِه رَنجونِمتونَ؟

³ ئو مِه یَئمَ نُیسو تا وخدی هاتم اَرِه تَکتو، کسَلی گه باس مِه خَوشالا کَن، باعث نوئن مِه برنجِم. اَرِیَگه اطمینونَ کُلتو دیرِم گه خَوشی مِه خَوشی کُل هُمِئَه.

⁴ اَرِیَگه وَه خُصَه فِرَه ئو دل پِرخوینی ئو چیَمَل پِر اَسِرمی اَرِنتو نُیسو، نه اَرِیَگه برنجِنِمتو بلکِم تا بِذانینو چَنی فِرَه دوستو دیرِم.

آم خطاکار بوئَشخِنِن

⁵ مِنتائای اَرّ کسی باعث رَنجونِن بیَ، نه فَخَد مِ بلکِم کم‌تا‌کُتی -نِموشِم فِرَه- کُل هُمَه رَنجونیِ.

⁶ هُنَ کسی، تَنبیئی گه ویشتِر هُمَه اَر اوتو کِردیَ، بَسَسی.

⁷ اِسَه اِجالی باس بوئَشخینونی ئو دلگُوئی دِینونی، ناخواد اژ زور خُصَه، زوئینا بو.

⁸ اِسَه، مَلالکِمَ بینتو گه مِحبت ووژتون اَری ثابت کِینونی.

⁹ اَژونَسَ نُیسونم اَرِنتو تاگَه اِنتحونتو کَم ئو بوئینِم گه اِ کُل چی فِربوبَرینو یاگَه نه؟

¹⁰ هر کی گه هُمَه بوئَشخینو، مِن‌یشَ موئَشخِمی. اَ چیئَه گه مِه بَشخیمَ -اَرّ چیئی اَرِه بَشخونِن بو- اَرتَک مسیح ئو وَه خاطر هُمَه‌م کِردیَ.

¹¹ تاگَه شِطو سر ایمَه فن نِ، اَرِیَگه اژ فنِ‌فیتَلی بی‌خَوَر نیئیمو.

فائق هاتِن اِنوم مسیح

¹² وخدی اَرِه موعظَه انجیل مسیح هاتِم اَرِه شیَر تْروآس، وَه‌یاآگه در کَلِنگی اِنوم خداون اَرِنِم واز بی،

¹³ روحِم سِتار نَگِرتی اَرِیَگه بِرام تیتوسِم اَر اورَه نَهَردَ دی. اَسَه مردِم اورمَ هُیشتَ جا ئو چِم اَرِه هیال مقدونیَه.

¹⁴ مِنتائای شگِر اَرِه خدا گه هَر اِ مسیح، ایمَه اِ صف کسَلی گه بِردونَسا رَبَریَ مِهِه، ئو عطِر خَوش شناخت ووژ وَه‌سونگَ ایمَه اِ کُل جا پَشخا مِهِه.

¹⁵ اَرِیَگه ایمَه اَرِه خدا عطِر خَوش مسیحیمو، چه اِنوم کسَلی گه نجادَ مَگِرِن ئو چه کسَلی گه نابودَ موئن،

¹⁶ مِنتائای اَرِه یَکی بو مرگ گه ویرِ مرگَ مَچو؛ اَرِه یَکی‌تِر بو ژییاین گه ویرِ ژییاینَ مَچو. ئو کیَ گه اَرِه هُنَ کاری کفایت داشدوئیتی؟

¹⁷ اَرِیَگه اِجور بِری نیئیم گه کلوم خدا دسفِروشَ مَهَن، بلکِم ایمَه اَر وَر چیَم خدا ئو اِنوم مسیح قصَه مِهِیم اِجور آمَل رُی‌راسی گه اژ جونِم خدا ماموریو گِرتیَ.