دوئِم قُرَنتیان 13 - کتاب مقدس به زبان لکی - گویش مرکزیهُشتارَل آخِر 1 یَه گِل سِئِم مام اِرَه تَکتو. «وَه شاتی دو یاگَه سه شات، هر گپی ثابتَ ماو.» 2 مِنَ کسَلی گه وِرِکار گنائو کِردوئی ئو وَه کسَلی‌تِریش هُشتارِم دا، ئو اِسگِه‌یشَ گه اَر اورَه نیِم هُشتارونَ میَم‌ئون، هَراَ جورَ گه گِل دوئِمینی گه هاتم اَرِه تَکتو، هُشتارِم دا، گه اَرّ اِدوارَه بام، اَژینونِ لا نِمَکُوئِم. 3 اَرِیَگه هُمَه هاینونِ مِنِی دلیلی گه مسیح اِنوم مِه قصَه مِهِه. او اِبِرُوَر هُمَه ضِیف نیَ، بلکِم او اِ بِن هُمَه زوردارَ. 4 اَرِیَگه وَه‌یاآگه او اِنوم ضیَف کیشیا اَر صلیب، مِنتائای وَه قدِرت خدا زِنِه‌یَ مِهِه. اَرِیَگه ایمِه‌یش اِنوم او ضِیفیم، مِنتائای اِبِرُوَر هُمَه وَه قدِرت خدا، وَه‌گَرد مسیح زِنِه‌یَ مِهِیم. 5 ووژتو اِنتحو کَن تاگَه بوئینینو هاینون اِنوم ایمو یاگَه نه. ووژتو اِنتحو کَن. یانی یَتونَ اِبارَه ووژتو نَفیَمیَ گه مسیح ها نومتون‌اِر؟ مَر یَگه اِراسی اِنوم ایی اِنتحونَ رِفوزَه بوئینو! 6 امیدَوارِم بِفیَمینو گه ایمَه اِ ایی اِنتحونَ رِفوزَه نوئیمونَ. 7 مِنتائای ایمَه اِ درگا خدا دوعاءَ مِهِیم گه هُمَه خطای نِهِینو، نه یَگه تا دیار بو گه ایمَه اِ اِنتحو سربِلِنگ بیمونَ، بلکِم تاگَه هُمَه اَ چیئَه گه دُریسَ، اَنجوم دِینو، جُ‌جُ اَرّ ایمَه رِفوزَه وَه چیَما بایم. 8 اَرِیَگه ایمَه نِمَتونیم هُیچ کاری اَرضد حخیخت اَنجوم دِیم، بلکِم هر کاری مِهِیم اَرِه حخیختَ. 9 اَرِیَگه وخدی ایمَه ضِیفیم ئو هُمَه زوردارینو، یَه خَوشالمونا مِهِه. ئو دوعا ایمَه یَسَ گه هُمَه کاملا بوئینو. 10 اَژونَسَ، اِسگَه گه اَر اورَه نیِم، ایی چیئِلَ اَرِه هُمَه مَنُیسِنِم تاگَه وخدی بام اِرَه تَکتو، مجبور نوئم وَه قدِرت‌واختیاری گه خداون اَرِه بِنا کِردِن داسیَ مِه ئو نه اَرِه خِراو کِردِن، سخدتون اَری بِگِرِم. دُماخِرِ 11 دُماخِرِ اِاِ بِرال، خَوشال بوئن؛ فگِرتو یَه بوءَ گه کاملا بوئینو؛ یَکتِری دلگُوئی دَن؛ هُم‌رِأ بوئن؛ ئو اِ صُئل‌وسِلامتی زِنِه‌ی بِهَن، ئو خداءِ مِحبت ئو صُئل‌وسِلامتی ها گَرد هُمَه. 12 وَه ماچ مقدّس سِلام بِهَنَ یَکتِری. 13 کُل ایمودارَل مسیح، سِلامَ مَرَسِنِنَ بینتو. 14 فیض خداون عیسی مسیح ئو مِحبت خدا ئو رِقیفی روح‌القدس، وَه‌گَرد کُلتو بو. |
@ 2024 Korpu Company