دوئِم قُرَنتیان 12 - کتاب مقدس به زبان لکی - گویش مرکزیدِرِک جسم پولُس 1 مِه باس هَرهُنَ وَه ووژِم افتخار بِهَم؛ وَه‌یاآگه نفعی نِری، اِسَه اِبارَه رویائَل ئو مِکاشفَه‌لی گه اژ خداونِم داشدیَ، دُم قصَه‌مَ مَگِرِم. 2 یَکی اِنوم مسیحَ مَشتاسِم گه چواردَه سال وِر اژ یَه تا آسمو سِئِم بَریا. وَه لار یا جیا اژ لار، نِمَذانِم، خدا مَذانی. 3 ئو مَذانِم گه هُنَ کسی ویرِ بهشت بَریا -وَه لار یا جیا اژ لار، نِمَذانِم، خدا مَذانی- 4 ئو چیئَلی شنَفتی گه نِماو تیَریفو کِین، ئو اِنسو نَباس وَه زوئو باری. 5 مِه وَه هُنَ کسی افتخارَ مَهَم. مِنتائای اِبارَه ووژِم، وَه چیئی بِخِر اژ ضیَفَلِم افتخار نِمَهَم. 6 جُ‌جُ اَرّ بِم وَه ووژِم افتخار بِهَم، اَخمَخ نیِم، اَرِیَگه حخیختَ موشِم. مِنتائای هُنَ کاری نِمَهَم، تاناخواد کسی گُمو بِهِه مِه ویشتِر اژ اَ چیمَ گه اِنوم مِنَ موئینی یا اژ مِنَ مَشتوئی. 7 اِسَه اَرِیَگه وَه خاطر کَلِنگی بی‌حدِحساو مِکاشفَه‌ل قُراتا نوئم، دِرِکی اِنوم جسمو داءَ مِه، قاصی‌ای اژ جونِم شِطو تاگَه عذاوِم بِ، ئو نِیلی قُراتا بوئم. 8 سه گِل لالکیامَ خداون گه اژ مِه دویرا کِیتی، 9 مِنتائای خداون وِتی‌ئونِم: «فیض مِن اَرِه تو بسَ، اَرِیَگه قدِرت مِه اِنوم ضیَفَل کاملا ماو.» اِسَه وَه خَوشی ویشتِری افتخارَ مَهَمَ ضیَفَل ووژِم، تاگَه قدِرت مسیح اَررُی مِه بو. 10 اِسَه وَه خاطر مسیح، اِنوم ضیَفَل، دُشمینَل، سخدیَل، آزارَل ئو بِلائَل خَوشالِم، اَرِیَگه وخدی ضِیفِم، زوردارِم. دلِ‌هولی پولُس اَرِه کلیسا قُرَنتُس 11 مِه اَخمَخ بیمَ! هُمَه مِنتو وادار کِرد، هُمَه باس اژ مِه تیَریفتونَ مَهَرد. اَرِیَگه دُریسَ هُیچِم، مِنتائای کمتِر اژ ’کَلِنگتِرین رسولَل‘ نیِم. 12 نشونَه‌ل یِه رسول راسَکونی، وَه نشونَه‌ل ئو چیئَل بِلُجوئی ئو مُجِزَه‌ل وَه صبِر بی‌حدّی اِنوم هُمَه آشگارا بی. 13 اَرِیَگه اِ کو رفدار مِنَ گَرد هُمَه گَنتِر اژ رفدارِم وَه‌گَرد باقی کلیسائَل بی، بِخِر اژ یَگه بارمی نَنیا اَر کول هُمَه؟ ایی بی‌انصافی مِنَ بوئَشخِن! 14 اِسَه اَرِه گِل سِئِم آمادَه‌م بام اَرِه تَکتو، ئو نِموئمَ باری اَر کول هُمَه، اَرِیَگه مالِ‌منال هُمَه‌م نِمِ بلکِم ووژتونَ مِم، اَرِیَگه یَه آیلَل نیِن گه باس اَرِه دا‌باوِه‌ئو باوژِنِ پِ دس بلکِم داباوَه اَرِه آیلَل. 15 مِن اَرِه گیونَل هُمَه، وَه خَوشی خرجَ مَهَم ئو گیون‌یشمَ مَهَمَ خِرتو. اَرّ مِه هُمَه ویشتِر دوس دیرِم یانی باس کمتِر مِحبت بوئینِم؟ 16 مِنتائای جُ‌جُ اَرّ یَه قبول کِینو گه مِه ووژِم باری اَر کول هُمَه نوئیم، هایتِر موشینو مِه رِنگَر بیم، ئو وَه فنِ‌فیت هُمَه‌م آوِردَ دس. 17 مَر مِه وَه‌سونگَ کسَلی گه کِلِم‌کِرد اَرِه تَکتو اژ هُمَه‌م نفع بِرد؟ 18 مِه لالکیامَ تیتوس گه بای هُمَه بوئینی ئو اَ بِرامَ کِل‌کِردَ گَرد. مَر تیتوس اژ هُمَه نفع بِردی؟ مَر ایمَه وَه یِه روح ئو یِه رئی رفدارمو نَهَرد؟ 19 اِ ایی مِدتَ هُمَه گُمونتو کِردیَ گه ایمَه اِبِرُوَر هُمَه اژ ووژمو دَفاعمو کِردیَ؟ خدا شاتَ گه ایمَه اِنوم مسیح قصَه مِهِیم، ئو اِاِ عزیزَل یوئنَ کُل اَرِه بِنا کِردِن هُمِئَه. 20 اَرِیَگه زِلَمَ مَچو گه هایتِر وخدی بام اَرِه تَکتو هُمَه اَجورَ گه مِم، نوئینِم، ئو هُمِه‌یش اَجورَ گه مِتو، مِه نوئینینو. زِلَمَ مَچو گه اَر اورَه قی، حَسوئی، خِض، دشمنی، کینَت، بُختِم، خِوَت، قُراتی ئو بی‌نظمی بو. 21 زِلَمَ مَچو وخدی گِلارم اَرِه تَکتو، خداءِ مِه، اِدوارَه اَرتَک هُمَه، مِه فِروتنا کِ، ئو مِه مجبور بوئم اَرِه کسَلی گه وِرِکار گنائو کِردیَ ئو اژ ناپاکی، بی‌عصمتی، ئو عِیاشیَلی گه کِردونَ توئه‌ئو نَهَردیَ، هَری بِگِرِم سر. |
@ 2024 Korpu Company