دوئِم قُرَنتیان 11 - کتاب مقدس به زبان لکی - گویش مرکزیپولُس ئو رسولَل دِروزِنِ 1 کوشگُ ایی تیکُلُنجَه اَخمَخی مِنَ تیَمِل بِهِینو. مِه تیَمِل کَن! 2 اَرِیَگه مِن اَرِه هُمَه خیرَت دیرِم، خیرَتی گه اژ خداءَ، اَرِیَگه هُمَه‌م اَرِه یِه میردَه دسگیرو کِردیَ، تا اِجور دِت اوزا ئو پاکی پیشکَشتو کَم اَر مسیح. 3 مِنتائای زِلَمَ مَچو هَرهُنَ گه مار وَه رِنگَری ووژ، سر حوّا فن داتی، فگِرَل هُمِه‌یش اژ ارادت خالص ئو رُی‌راسی گه اَر مسیح دیرینو، اِرگیردی. 4 اَرِیَگه اَرّ کسی با اَرِه تَکتو ئو عیسی‌‌ی‌تِر بِخِر اژ اَ عیسیَ گه ایمَه اِلوممو کِرد اَرینتو، اِلوم بِهِه، یا اَرّ روحی بِخِر اژ اَ روحی گه گِرتِتونَ، بِگِرینو، یا اَرّ انجیلی بِخِر اژ انجیلی گه قبولتو کِردیَ قبول بِهِینو، وَه آسُنی تیَمِلَ مِهِینونی. 5 اِراسی گُمون نِمَهَم مِن اژ ’کَلِنگتِرین رسولَل‘ چیمی کمتِر داشدوئی. 6 جُ‌جُ اَرّ اِ قصَه‌کَری سرشتَه‌م ناآشدوئی، مِن اِ دانش چیئی کَم نِرِم؛ اِراسی ایمَه یَمونَ اژ کُل لِحاظی اِ کُل چی اَر هُمَه ثابت کِردیَ. 7 مَر گنام کِردیَ گه ووژِم خوارِم کِرد تاگَه هُمَه سربِلِنگ بوئینو، اَرِیَگه پِغوم انجیل خدامَ مِفت اِلوم کِرد اَرینتو؟ 8 مِه روژی ووژِم اژ کلیسالی‌تِرِم گِرت ئو خارَتِم کِردِن تاگَه خِلمت اَر هُمَه بِهَم. 9 ئو وخدی وَه‌گَرد هُمَه بیم وَه‌یاآگه میتاج بیم، باری اَر کول کَسا نوئیم، اَرِیَگه بِرالی گه اژ هیال مقدونیَه هاتوئین هَوَجَه‌ل مِنو زفتِ‌رفت کِرد، ئو مِه هُیچ وخد باری اَر کولتو نوئیمَ ئو نِموئم. 10 وَه اَ حخیخت مسیحَ گه ها نوم مِن‌اِر قسم، گه هُیچ کس اِ سِرُسَر هیال اَخائیَه نِمَتونی ایی افتخارَ اژ مِه بِسینی. 11 ئو اَرّا؟ اَرِیَگه هُمَه دوس نِرِم؟ خدا مَذانی گه دیرِم! 12 ئو مِه دُم ایی کاری گه دیرِم مَهَم، مَگِرِم تا مِجال اژ کسَلی بِگِرِم گه میا ادعا بِهَن هَراَ جورَ گه ایمَه خِلمتَ مِهِیم، خِلمتَ مَهَن. 13 اَرِیَگه هُنَ کسَلی رسولَل دِروزِنِ ئو خِلمتکارَل رِنگَری کِن گه ووژون اِجور رسولَل مسیح اِرَمارِن. 14 ئو یَه چی بِلُجوئی نیَ، اَرِیَگه شِطون‌یش ووژ اِجور فریشدَه نُیر اِرَماری؛ 15 اِسَه بِلُجوئی هاتِن نِری گه خِلمتکارَل‌یشی ووژون اِجور خِلمتکارَل صالحبیئِن اِربارِن. عاقویَت اونَ مِطابق کارَلونَ. پولُس وَه جُورَل ووژَ مَنازی 16 هَنیَ موشِم: کس مِنَ اَخمَخ فرض نِهِه. مِنتائای اَرّ هُنَ مِهِینو، مِن اِجور آم اَخمَخی قبول بِهَن، تاگَه مِن‌یش بتونِم تیکُلُنجِه‌ی بنازِم اَر ووژِم. 17 چیئی گه دیرِم وَه اطمینون اژ افتخار ووژمَ موشِم، نه اژ جونِم خداون، بلکِم اِجور آم اَخمَخی موشِم. 18 وَه خاطر یَگه کسَل فِرِه وَه چیئَل دنیایی افتخارَ مَهَن، مِن‌یش افتخارَ مَهَم. 19 نه یَگه هُمَه فِرَه دونائینو، اَژونَسَ آمَل اَخمَخ وَه خَوشی تیَمِلَ مِهِینو! 20 اَرِیَگه اَرّ کسی هُمَه بِهِئَه نوکر یاگَه هُمَه قویت اِرادِ، یا اَژینتو سوءاستفادَه بِهِه، یا ووژ اَر هُمَه سرتِر بِذانی، یا وَه چَپالی بِ اَر نوم‌رُیتو، تیَمِلَ مِهِینو. 21 خجالتِم، باس بوشِم گه ایمَه اَرِه هُنَ کاری فِرَه ضِیف بیمو! مِنتائای اَرّ کسی‌تِر جورَت بِهِه گه وَه چیئی افتخار بِهِه -هَنی اِجور آم اَخمَخی قصَه مَهَم- مِن‌یش جورَتَ مَهَم گه وَه اَوَه افتخار بِهَم. 22 اونَل عبرانیِن؟ مِن‌یش هم! اونَل اسرائیلیِن؟ مِن‌یش هم! اونَل اولاد ابراهیمِن؟ مِن‌یش هم! 23 اونَل خِلمتکارَل مسیحِن؟ مِن اژ اونَل بیتِرِم. -اِجور آم لیوه‌ی قصَه مَهَم- مِه ویشتِر اژ اونَل زیَمَتِم کیشیَ، ویشتِر اژ اونَل کَتِمَس اِنوم زندو، ویشتِر اژ اونَل شلاخِم هُاردیَ، ئو ویشتِر وَخدَل نزیک بیَ بِمِرِم. 24 پنج گِل اژ یهودیَل، سی ئو نُه گِلَه شلاخِم هُارد. 25 سه گِل گُرزکوئو کِردِم، یِه گِل سنگسار بیمَ، سه گِل کَشتی سفرِم غرخ بی، یِه شو ئو یِه رو اِنوم دریا وِیلو بیم. 26 اِ سفرَل پِشت سر یَک، اِ خطر رووئَل، خطر مِلَه‌بگیرَل؛ خطر اژ جونِم قوم ووژِم، خطر اژ جونِم خِرِیهودیَل، خطر اِ شیَر، خطر اِ بیاوو، خطر اژ جونِم بِرال دِروزِنِ، 27 اِ جُور ئو سخدی، اِ شو نَحیوَسیَل فِرَه؛ اِ تینی ئو وِرسِنی بیئِن، ویشتِر وخدَل بی‌خوراک، اِ سرما ئو بی‌جِنِکی. 28 بِخِر اژ یوئنَ، دلِ‌هولی اَرِه کُل کلیسائَل باری کَ گه هر روژ هار کولِم. 29 کیَ گه ضِیف بو ئو مِه ضِیف نوئم؟ کیَ گه بِکُوءِ اَر زَمی ئو مِه جیَرِم نَسُزی؟ 30 اَرّ باس افتخار بِهَم، وَه چیئَلی افتخارَ مَهَم گه ضیَف مِه نشونَ مِ. 31 خدا ئو باوَه خداون عیسی، گه تا ابد بِمارِکَ، مَذانی گه دِرو نِمیَم. 32 اِ شیَر دمشق، فرموندار اورَه گه اژ جونِم آرتاس پاتِشا وَه ایی مقومَ رَسوئی، قِلااورَلی نائیتی اَر شیَر دمشق تاگَه بِگِرِنِم. 33 مِنتائای مِنو نا اِنوم سَلِه‌ی، اژ پنجره‌ی اِ حَصار شیَر دُرّو کِردَ هُار ئو اژ چِنگ حِیوایمی. |
@ 2024 Korpu Company