دوئِم قُرَنتیان 10 - کتاب مقدس به زبان لکی - گویش مرکزیدَفاع پولُس اژ خِلمت ووژ 1 مِه، پولُس، ووژِم وَه فِروتنی ئو مِرِبونی مسیح خواهشدتون اَژینَ مَهَم -مِه گه هر اَ جورَ گه هُمَه موشینو وخدی هام اَرتَکتو بی‌جورَتِم مِنتائای وخدی دویرِم اَژینتو جورَت دیرِم- 2 ئو مَلالکِمَ بینتو تاگَه وخدی هام اَرتَکتو مجبور نوئم وَه‌گَردتو وَه گُرساخیا رفدار بِهَم، هَراَ جورَ گه وَه‌گَرد اونَلی گه فگِرَ مَهَن ایمَه مِطابق جسم زِنِه‌یَ مِهِیم، رفدارَ مَهَم. 3 اَرِیَگه دُریسَ ایمَه مِطابق جسم زِنِه‌یَ مِهِیم، مِنتائای مِطابق جسم جنگ نِمِهِیم. 4 اَرِیَگه اسلحَه جنگ ایمَه جسمونی نیَ، بلکِم قدِرت خدا دیری تاگَه دِژَل اِربِرِمِنی. 5 ایمَه هر بَث ئو هر عخیدَه کَلِنگی گه اَرضد شناخت خدا بو نابودَ مِهِیم ئو هر فگِری اَرِه فِربو بِردِن اژ مسیح اسیرَ مِهِیم، 6 ئو آماده‌یم تا هر کورفِربونی‌ای تنبیه بِهِیم، تا وخدی گه فِربوبَری هُمَه کاملا بو. 7 سِیل بِهَن چَه هار وَر چیَمَلتو. اَرّ کسی اطمینو دیری گه هِن مسیحَ، باس اَویر بوتی هَر اَخَ گه او هِن مسیحَ، ایمِه‌یش هِن مسیحیم. 8 اَرِیَگه جُ‌جُ اَرّ مِه تیکُلُنجِه‌ی ویشتِر افتخار بِهَم اَر قدِرت‌واختیاری گه خداون اَرِه بِنا کِردِن هُمَه ئو نه اَرِه نابود کِردِنتو داسیَ مِه، شَرمَنَ نِموئم. 9 نِمِم فگِر بِهِینو گه دیرِم وَه نُامَه‌لِم زِلَ‌تِراقتونا مَهَم. 10 اَرِیَگه موشِن: «نُامَه‌ل او تُنِن ئو سنگینِن، مِنتائای اِ ویراَرویر ضِیفَ ئو قصَه کِردِنی اَرزشد نِری.» 11 بِیلِن اَوَه گه هُنَ موشی بِذانی گه هَراَ چیئَه گه وخدی نیئیمو اِنوم نُامَه موشیم، هَر اَویشَ وخدی هِیم اَنجومَ مِیم. 12 نه یَگه ایمَه جورَتَ مِهِیم ووژمو بنیمَ دسَه کسَلی گه اژ ووژو تیَریفَ مَهَن یاگَه ووژمونَ گَرد اُوُ قیاس بِهِیم. مِنتائای اونَل چَنی نفیَمِن وخدی ووژونَ گَرد ووژونَ مَپِیمُنِن ئو ووژونَ گَرد ووژو قیاسَ مَهَن. 13 مِنتائای ایمَه ویشتِر اژ حد وَه ووژمو نِمَنازیم، بلکِم مِطابق حدّی گه خدا اَرِنمو مَیِّن کِردیِ وَه ووژمونَ مَنازیم ئو یَه جُ‌جُ هُمِه‌یش مَگِری‌اِرا. 14 اَرِیَگه ایمَه پامون اژ حد ووژمو دریژتِرا نَهَردیَ، هُنَ گه مَری هرگِس نِهاتیمونَس اَرِه تک هُمَه. اَرِیَگه ایمَه اول کسَلی بیمو گه انجیل مسیحمو رَسونَ هُمَه. 15 ایمَه حد ووژمو حفظَ مِهِیم ئو وَه اَ چیئَه گه کسَلی‌تِر اَنجومو داءَ نِمَنازیم. بلکِم امیدمو یَسَ گه هر چی ایمو هُمَه رشدَ مِهِه، تاثیر ایمَه اَر هُمَه ویشتِرا بو، 16 تاگَه بتونیم اِ وِلاتَل ویشتِری انجیل موعظَه بِهِیم. اَرِیَگه نِمِمو وَه کاری بنازیم گه وِرِکار اِ هیال ژیردس کسی‌تِر اَنجوم گِرتیِ. 17 بِیلِن «هر کی میا بنازی، اَر خداون بنازی.» 18 اَرِیَگه کسی گه اژ ووژ تیَریفَ مِهِه قبول نِماو، بلکِم اَ کسَ گه خدا اَژی تیَریف کِیتی. |
@ 2024 Korpu Company