دوئِم قُرَنتیان 1 - کتاب مقدس به زبان لکی - گویش مرکزی1 اژ پولُس گه وَه خواس خدا رسول مسیح عیسیَ، ئو بِرامو تیموتائوس، وَه کلیسا خدا اِ شیَر قُرَنتُس، ئو وَه کُل ایمودارَل مسیح اِ سِرُسَر هیال اَخائیَه: 2 فیض‌وسِلامتی اژ جونِم خدا، باوَه آسمونیمو، ئو خداون عیسی مسیح اَر هُمَه بو! خدا کُل دلگُوئیَل 3 بِمارِکَ خدا ئو باوَه خداونمو عیسی مسیح، گه باوَه ریَمَتَل ئو خدا کُل دلگُوئیِلَ؛ 4 اَوَه گه اِ کُل سخدیَلمو دلگُوئیَ مِئَه ایمَه تاگَه ایمِه‌یش بتونیم وَه اَ دلگُوئیَ گه اژ خدا دیریم، کسَلی‌تِر گه هانِ هر سخدی، دلگُوئی بِیم. 5 اَرِیَگه هَر اَخَ گه ایمَه اژ عذاوَل مسیح چَل‌چَل بیَرَ میَریم، هر اَخِه‌یشَ وَه‌سونگَ مسیح چَل‌چَل اژ دلگُوئی بیَرَ میَریم. 6 اَرّ هایمونِ سخدی، وَه خاطر دلگُوئی ئو نجاد هُمِئَه، ئو اَرّ دلگُوئی دیریم، هَنی اَرِه دلگُوئی هُمِئَه، گه وخدی هُمِه‌یش هَراَ عذاوِلَ مَکیشینو گه ایمَه مَکیشیم ئو وَه صبِر طاخَتَ مارینو، وَه کارَ مای. 7 امید ایمَه اِبارَه هُمَه هَر هار جا، اَرِیَگه مَذانیم هَرهُنَ گه اِ عذاوَل ایمَه هُم‌بیَرینو، اِ دلگُوئیَل ایمِه‌یش هُم‌بیَرَ موئینو. 8 اَرِیَگه اِاِ بِرال، نِمِم اژ سخدیَلی گه اِ هیال آسیا هاتَ سرمو، بی‌خَوَر بوئینو. اَرِیَگه بار گِرونی اَر کولمو بی گه ویشتِر اژ قُوه‌مو بی، هُنَ گه امید اَر زِنی مَنِنمون‌یش ناآشد. 9 اِراسی‌ش گُمونمو کِرد گه حکِم مِردِنمو هاتیَ. مِنتائای یوئنَ اَرِه یَه بیَ گه ایمَه نه اَر ووژمو بلکِم اَر خدای توکل بِهِیم گه مِردیَل زِنیا مِهِه. 10 خدا ایمَه اژ هُنَ خطری گه مرگَ دُما بیتی نجاد داتی، ئو هَنی نجادَ مِ ئو ایمَه امیدمو هار او گه هَنی نجادمونَ مِ. 11 هُمِه‌یش باس وَه دوعائَلتو ایمَه یاری دِینو، تاگَه آمَل فِرِه، وَه خاطر ایمَه اَرِه بِرَکتَلی گه خدا وَه‌سونگَ دوعائَل فِرَه کسَل داسیَ ایمَه، شگِرگزاری بِهَن. نشقَه سفر پولُس عوضَ ماو 12 اَرِیَگه افتخار ایمَه شاتی وژدانمونَ، گه ایمَه اِنوم ایی دنیاءَ ئو مصقوصاً چَنی ویشتِر وَه‌گَرد هُمَه، وَه ساده‌ی ئو رُی‌راسی گه اژ خداءَ رفدارمو کِرد، نه وَه حکمت بشری بلکِم وَه فیض خدا. 13 اَرِیَگه چیئی بِخِر اژ اَوَه گه مَحیوَنینون ئو مَفیَمینو اَرِه هُمَه نِمَنُیسِنِم، ئو امیدَوارِم گه هُمَه خو بِفیَمینو، 14 دُریس هَراَ جورَ گه کم‌تا‌کُتی ایمَه‌تو فیَمیَ، تاگَه اِ روژ خداونمو عیسی، هَرهُنَ گه ایمَه وَه هُمَه افتخارَ مِهِیم، هُمِه‌یش وَه ایمَه افتخار بِهِینو. 15 مِه اَرِیَگه اطمینونم اَر یَه داشد، مِهِستِم اول‌بار بام اِرَه تک هُمَه تاگَه اِدوارَه اژ فیض بیَردارا بوئینو. 16 اَرِیَگه مِهِستِم اَر سر رئی هیال مقدونیَه هُمَه بوئینِم ئو وخدی اژ مقدونیَه گِلماهُارد بام اِرَه تَکتو تاگَه مِه رِ کِینون اَرِه هیال یهودیَه. 17 یانی وخدی مِهِستِم ایی کارَ بِهَم، دودل بیم؟ یانی مِن اِجور آمَل ایی دنیا قَصَ مَهَم، ’اَاَ‘ ’اَاَ‘ ئو ’نه‘ ’نه‘ وَه‌گَرد یَکَ موشِم؟ 18 وَه وفاداری خدا قسم، قصَه ایمَه وَه‌گَرد هُمَه ’اَاَ‘ ئو’نه‘ نوئیَ. 19 اَرِیَگه کُر خدا، عیسی مسیح، گه ایمَه، مِن ئو سیلاس ئو تیموتائوس، اومون اِنوم هُمَه موعظَه کِرد، ’اَاَ‘ ئو ’نه‘ نوئی، بلکِم اِنوم مسیح هَر ’اَاَ‘ هَس. 20 اَرِیَگه کُل وَدَه‌لی گه خدا اِنوم مسیح داسی ’اِاِ‘ءَ. اَژونَسَ گه وخدی اَرِه ستائشت خدا، وَه‌سونگَ مسیح ’آمینَ‘ ماریمَ زوئو، خدا جِلالَ مِیم. 21 ئو یَه خداءَ گه ایمَه وَه‌گَرد هُمَه اِنوم مسیح پایارَ مِهِه. او ایمَه مسح کِردیِ، 22 ئو میر مالکیت ووژ داسی اَر ایمَه ئو روحِ ووژ اِجور بِعونَه ناسی اِنوم دلَلمو. 23 خدا شاتَ مَگِرِم گه اَرِیَگه ناراحتتو نَهَم، اِدوارَه نِهاتِم اَرِه قُرَنتُس. 24 نه یَگه اَر ایمونتو آقایی بِهِیم، بلکِم وَه‌گَرد هُمَه، اَرِه خَوشیتو تقِلاءَ مِهِیم، اَرِیَگه اِنوم ایمونتو پایارینو. |
@ 2024 Korpu Company