اول تیموتائوس 4 - کتاب مقدس به زبان لکی - گویش مرکزی

بِری اژ ایمون اِرَمَگیردِن

¹ مِنتائای روحِ خدا، آشگاراءَ موشی گه بِری اِ زمونَل آخِر، اژ ایمون اِرَمَگیردِن ئو مَچِنَ تُرّ روحَلی گه اژ رئی اِرَمارِن ئو تیَلیمَل مِلاکَتَل.

² وَه‌سونگَ ریاکاری دِروزِنَلی گه وِژدانو کار نِمِهِه.

³ اُوُ شوی کِردِن ئو ژَن هُاستِن قِدَخَنَ مَهَن ئو فِربونَ میَنَ پیَریز کِردِن اژ خوراکَلی گه خدا خَلک کِردیِ تا کسَلی گه ایمون اَر حخیخت دیرِن ئو مَشتاسِنی، وَه شگِرگزاری، اَژینو بیرِن.

⁴ اَرِیَگه هر چیئی گه خدا خَلک کِردیِ، خوءَ ئو هُیچی نَباس رد بو، اَرّ وَه شگِرگزاری قبول بیَ.

⁵ اَرِیَگه وَه کلوم خدا ئو دوعا تقدیسَ ماو.

⁶ اَرّ ایی چیئِلَ بِینَ بِرال، موئینَ خادم خو مسیحْ عیسی، گه اِنوم کلوم ایمون ئو اَ تیَلیم خوءَ گه چینَسیَ تُرّا، تربیت بینَ.

⁷ کارتِ پاچائَل پُیچ ئو کِفِر ناو، بلکِم ووژت اِ دینداری تربیت بِهَه.

⁸ اَرِیَگه وَه‌یاآگه تربیت لار فادَه کَمَسی، مِنتائای دینداری اَرِه کُل چی فادَه دیری، ئو هم زِنِه‌ی اِسگَه وَدَه مِ، هم ژییاینی گه میا بای.

⁹ ایی قصَه ماو اِتِمادَ بی کِینی ئو سزاوارَ گه تمومِ‌کمال قبول بو،

¹⁰ اَرِیَگه ایمَه امیدمو بَسدیَسَ خداءِ زِنی گه نجاددهندَه کُل مردِمَ، مصخوصاً ایمودارَل؛ اَرِیَگه هَر اَرِه یَه زیَمَتَ مَکیشیم ئو تقِلاءَ مِهِیم.

¹¹ یوئنَ فِربو بیَ ئو تیَلیم دَ.

¹² نِیل هُیچ‌کس وَه خاطر جِهالیِت خوارِت کِ، بلکِم اِ قصَه کِردِن ئو کردار ئو مِحبت ئو ایمون ئو پاکی، سرمقش کُل ایمودارَل بو.

¹³ تا موقَع هاتِنِم، ووژِت وَخم یَه بِهَه گه کلوم خدا اَرِه مردِم بحیوَنین ئو تشویقو کِین ئو تیَلیمو دِین.

¹⁴ بی‌اِتِنائی نِهَه اَر عطای گه ها نومت‌اِر، عطای گه وَه‌سونگَ نبوّت هاوِنتَ بینِت هَراَ وخدَ گه شورا شیخَل دَسو نا اَر سرِت.

¹⁵ ایی چیئِلَ بارَ جا ئو ووژِت وَخمو کَ تا تَرَخدی تو آشگارا بو اَر کُل کس.

¹⁶ خو، ویرت اَر ووژت ئو تیَلیمی گه مِین، بو. بوس اَرسر یَه، اَرِیَگه اَرّ هُنَ بِهِین هم ووژِت ئو هم کسَلی گه گوشتَ میَنَ بی نجادَ مِین.