اول تیموتائوس 3 - کتاب مقدس به زبان لکی - گویش مرکزی

اُسقُفَل ئو شمّاسَل کلیسا

¹ ایی قصَه ماو اِتِمادَ بی کِینی گه اَرّ کسی آواخد یَه بوتیَ گه اُسقُف کلیسا بو، ها دُم کار خوئیکا.

² اِسَه، یِه اُسقُف باس چیئی اِ زِنِه‌ی ناوتی تا وَه‌سونگَ اَوا لارَه بوتی اَری، میردَه یِه ژَن بو ئو وَه سر ووژا بو، بتونی نوا ووژ بِگِری، آوِری‌دار ئو هُن‌هاوو بو ئو بتونی تیَلیم بِ؛

³ نه یَگه شِراوی بو، یاگَه زور بوشی، بلکِم فَخیر ساگوش‌کَتی بو، ئو نه جنگَری، یا پیل‌دوس.

⁴ هَمیش باس عتِ‌عیال ووژ خو ادارَه بِهِه ئو آیلَلی جوری باریَ عمل گه وَه عزّت کامل اَژی فِربو بیَرنی.

⁵ اَرِیَگه اَرّ کسی نَذانی چطور عتِ‌عیال ووژ ادارَه بِهِه، چطورَ مَتونی مِتیَه‌جی کلیسا خدا بو؟

⁶ ئو نَباس تازَه ایمو آوِردوئیتی، ناخواد قُراتا بو ئو اِجور ابلیس مَکوم بو.

⁷ اِلانَه باس اِنوم کسَلی‌شی گه اِ کلیسا هانَ دِریر نیکنُم بو تا رُسبا ناو ئو نَکُوءِ تِلَه ابلیس.

⁸ هَمیش شمّاسَل کلیسا باس سنگین بوئن؛ نه وَر آینَه پِشت مخِراض یا شِراوی ئو یا اِ تَما نفع نادُریس.

⁹ اونَل باس وَه وِژدان پِرچِ‌پاک سِرّ ایمو حفظ بِهَن.

¹⁰ ئو باس اول‌بار اِنتحو بوئن، اَرّ بی‌عِو بین، اَسَه بِیلِن اِ کار شمّاسی خِلمت بِهَن.

¹¹ هَرِ ایی جوریشَ ژِنَلو باس سنگین بوئن، بُختِم‌چی نوئن، بلکِم وَه سر ووژونا بوئن ئو اِ کُل چی وفادار بوئن.

¹² هر شمّاسی باس میردَه یِه ژَن بو ئو هَمیش باس آیلَل ئو عتِ‌عیال ووژ خو ادارَه بِهِه.

¹³ اَرِیَگه اونَلی گه اِ کار شمّاسی خو خِلمتَ مَهَن، مقوم خوئی اَرِه ووژونَ مارِنَ دس ئو اِنوم ایمو وَه مسیحْ عیسی مَرَسِنَ اطمینو فِرِه‌ی.

¹⁴ امیدَوارِم وَه ایی زویَ بام اَرِه تَکِت، مِنتائای یوئنَتَ اَرِنَ مَنُیسِنِم،

¹⁵ تا اَرّ دیر بی، بِذانین گه اِنوم مال خدا گه کلیسا خداءِ زِنی ئو کول ئو پِ حخیختَ باس چطور رفدار بو.

¹⁶ اِراسی گه سِرّ دینداری فِرَه کَلِنگَ: او گه اِنوم جسم ظاهر بی، وَه‌سونگَ روحِ خدا ثابت بی، فریشدَه‌ل اوُ دی، اِنومجا قومَل اِلوم بی، اِنوم دنیا ایمونو آوِردَ بی، ئو وَه جِلال، ویرِ بِلِنگ بَریا.