اول تیموتائوس 2 - کتاب مقدس به زبان لکی - گویش مرکزی

اَرِه کُل کس دوعا بِهَن

¹ اِسَه، وِر اژ هرچی، تشویقَ مَهَم گه درخواستَل، دوعائَل، شِفاعتَل ئو شگِرگزاریَل اَرِه کُل مردِم باءَ جا،

² اَرِه پاتِشائَل ئو کُل کارَدَسَل، تاگَه بتونیم زِنِه‌ی آروم ئو آسودَه‌مونی داشدوئی گه اِ کُل لِحاظی باوِ دل خدا ئو سنگین بو.

³ اَرِیَگه، یَه اَر تک خدا، نجاددهندَه ایمَه، خوءَ ئو وَه دِلَسی.

⁴ او گه مِیتی کُل مردِم نجاد بِگِرِن ئو برَسِنَ شناخت حخیخت.

⁵ اَرِیَگه فَخَد یِه خدا هَس ئو اِ بِن خدا ئو آمَل فَخَد یِه بَسخَه‌کَر هَس، یانی اَ اِنسونَ گه مسیحْ عیسیَ؛

⁶ او گه گیو ووژ اَرِه خیمت آزادی کُل آمَل داتی، ایی حخیختَ اِ زَمو دُریس ووژ شاتی هاوِنتیَ بی.

⁷ اَژونَسَ مِه اِنتخاو بیم تا موعظَه‌کَر ئو رسول ئو مَلِم خِرِیهودیَل اِ ایمون ئو حخیخت بوئم -مِه حخیختَ موشِم ئو دِرو نِموشِم.

⁸ ایلَهَه آواخدِم یَسَ گه پیال اِ کُل جا، بی خِض ئو مِرافَه، دَسَل مقدّس اَرِه دوعا بِگِرِنِ رُ.

⁹ هَمیش مِم گه ژِنَل وَه جِنِکَلی گه لائقونَ ووژون ‌اِربِرازِنِن، سنگین‌رنگین ئو نجیم، نه وَه گیسَل آچِنیا، یا طِلا ئو مِرواری، یا کِراسَل گِرو خیمت،

¹⁰ بلکِم وَه کارَل خو، اَجورَ گه لائق ژِنَلی کَ گه ادعاءَ مَهَن خداپِرَسِن.

¹¹ ژَن باس بی‌کِش ئو وَه اطاعت کامل، تیَلیم بِگِری.

¹² صِلا نِمیَمَ ژَن گه تیَلیم دِ یا اَر پیا سُوار بو؛ بلکِم باس بی‌کِش بو.

¹³ اَرِیَگه اول‌بار آدم خَلک بی ئو دُماخِرِ حوّا.

¹⁴ ئو آدم فن نَهُاردی، بلکِم ژَن بی گه فن هُاردی ئو کورفِربونا بی.

¹⁵ مِنتائای ژَن اَرّ سنگین بوسی اَر سر ایمون ئو مِحبت ئو مقدّس‌بیئین ووژ، وَه آویل آوِردِن نجادَ مَگِری.